1 Awarni uya tuɣa Yeccu immeř ixef nnes ɛawed i imeḥḍaren ɣar řebḥar n Tibiriyas, iḍhar-dd ammu. 2 Tuɣa din jmiɛ Cimɛun Buṭrus d Tuma, wenni umi qqaren Acniw, d Natanayil, wenni tuɣa zi Qana di temmurt n Ljalil, d tarwa n Zabdi, uřa d tnayen nneɣni zeg imeḥḍaren nnes. ^■  

3 Inna asen Cimɛun Buṭrus: “Necc ad raḥeɣ ad gmareɣ iseřman.” Nnan as: “Ad kik nraḥ uřa d neccin.” Ffɣen-dd uca nyin deɣya di tɣarrabut. Di ǧiřet nni war ṭṭifen walu. 4 Ɣar ṣṣbeḥ zic, ibedd-dd Yeccu x tma n řebḥar, maca imeḥḍaren war ssinen ca aqa d Yeccu. 5 Inna asen Yeccu: “A ibřiɣen, ma ad taɣ ɣarwem ca n macca?” Arrin-dd xas “Lla!” 6 Inna asen: “Nḍarem tracca nwem ak-d uɣezdis afusi n tɣarrabut, ad tafem.” Xenni nḍaren tracca uca war zemmaren ad tt-i-dd-jebden zi ssibbet n ubarru n iseřman i dayes ittwaṭṭfen. ^■  

7 Inna umeḥḍar wenni tuɣa ittexs Yeccu i Buṭrus: “Aqa Netta d Siditneɣ.” Řami isřa Cimɛun aqa Netta d Sidi, iṭṭef tcamir nnes minzi tuɣa d aɛaryan, inḍar ixef nnes di řebḥar ařami i ɣa dd-iqarreb ɣar Yeccu. ^■   8 Maca imeḥḍaren inneɣni usin-dd s tɣarrabut minzi war iggʷijen ca x řbarr mɣir mitayen n iɣaǧen, uca jebden-dd tracca ak-d iseřman. ^□  

9 Řami dd-ffɣen ɣar řbarr, ẓrin diha aqa ittwassewjed ijj n ufennic n řefḥem mani mmarsen iseřman d weɣrum.

10 Inna asen Yeccu: “Awyem-dd zeg iseřman i tegmarem řexxu.” ^■  

11 Cimɛun Buṭrus yuyur, ijbed tracca teccur s iseřman imeqqranen ɣar řbarr, aqa-tt dayes mya u-třata u-xemsin. Waxxa dayes s wanect uya aṭṭas, war tcarreg ca tracca.

12 Inna asen Yeccu: “Araḥem-dd da, ad tariyyqem!” Uřa d ijj zeg imeḥḍaren war izɛim ad t isseqsa, min teɛnid Cek, minzi ssnen aqa-t d Siditneɣ.

13 Řexdenni yusa-dd Yeccu, iksi aɣrum d iseřman, iwca asen.

14 Wanita d twařa wiss třata i dd-iḍhar Yeccu i imeḥḍaren nnes awarni řami dd-ittwassnekkar zi taddart n imettinen.

15 Awarni řami ariyyqen, inna Yeccu i Cimɛun Buṭrus: “A Cimɛun, mmis n Yuna, ma tᵉttexsed ayi ktar zeg yina?” Inna as: “Wah, a Sidi, Cek tessned aqa necc ttexseɣ Cek.” Inna as: “Arwes izmaren inu!”

16 Inna as ɛawed, i twařa wiss tnayen: “A Cimɛun, mmis n Yuna, ma tᵉttexsed ayi?” Inna as: “Wah a Sidi, Cek tessned aqa necc ttexseɣ Cek.” Inna as: “Arwes icarriyyen inu!”

17 Inna as wiss třata: “A Cimɛun, mmis n Yuna, ma tᵉttexsed ayi?” Icḍen Buṭrus minzi inna as t wiss třata: ‘Ma tᵉttexsed ayi?’, uca inna as: “A Sidi, Cek tessned kuřci, tessned aqa necc ttexseɣ Cek.” Inna as Yeccu: “Arwes tixsiwin inu! ^■  

18 S tidett, s tidett, Necc ad ac iniɣ: Řami cek tuɣa d ameẓyan, tbeysed i yixef nnek, truḥed mani texsed, maca x minni i ɣa tewsared, ad tesswiẓẓḍed ifassen nnek uca wenneɣni ad cek ibyes uca ad cek yawi ɣar mani war tᵉttexsed.” ^■  

19 Inna ammu ḥima ad isscen i man řmewt i zi ɣa issɛuǧ AREBBI. Awari řami d as inna ammu, inna as: “Ḍfar ayi-dd!” ^■  

20 Inneqřeb Cimɛun Buṭrus, iẓra ameḥḍar wenni tuɣa ittexs Yeccu, iḍfar i-t, netta d wenni tuɣa isennden x idmaren n Yeccu ɣar umensi, wenni innan: “A Sidi inu, wi Cek i ɣa iɣdaren?” ^■   21 Řami iẓra Buṭrus wa, inna i Yeccu: “A Sidi, i wa, min d as ɣa imsaren?” 22 Inna as Yeccu: “Mařa xseɣ ad iqqim ař dd ɣa ɛeqbeɣ, min d ac iruḥen? Cek ḍfar ayi-dd!” 23 Uca iffeɣ-dd wawař-a jar wawmaten belli ameḥḍar nni war ittmetti ca, maca Yeccu war d as inni ca belli netta war ittmetti ca, maca: “Mařa xseɣ ad iqqim ař dd ɣa ɛeqbeɣ, min d ac iruḥen?”

24 D wa d ameḥḍar wenni icehhden s man aya uca netta yura man aya, u neccin nessen aqa cchadet nnes d tidett. ^■   25 Aqa din ɛad aṭṭas n tmesřayin nneɣni i igga Yeccu. Mařa ttwarint ict awarni tenneɣnit, ittɣiř ayi, ad tiři ddunect simant nnes war dayes ca ttasiɛ ḥima ad teksi idlisen i ɣa ittwarin. Amin!

Aneggar n Řexbar Aṣebḥan Iqeddsen am mammec t ibarreḥ Yuḥanna.

Aneggar n tira n řectab n arebɛa n Řexbarat Iṣebḥen.

Aɛuǧi i Tbabat, i Mmis u i Arruḥ Iqeddsen, řexxu u řebda u i řebda n řebdat. ^■