1 Deg wass amezwaru n simana tusa-dd Maryam n Majdala di ṣṣbeḥ zic ɣar wenḍeř, tuɣa ɛad d taǧest. Teẓra taṣḍart aqa temmeksi x wenḍeř. ^■   2 Tuzzeř-dd, tusa-dd ɣar Cimɛun Buṭrus u ɣar umeḥḍar nneɣni wenni tuɣa ittexs Yeccu, tenna asen: “Ksin Siditneɣ zeg wenḍeř, war ssineɣ mani t ggin.” ^■  

3 Iffeɣ-dd Cimɛun d umeḥḍar nneɣni uca usin-dd ɣar wenḍeř. ^■   4 Nitni uzzřen s tnayen idsen, maca ameḥḍar nneɣni izwar i Cimɛun uca yiweḍ d amezwaru ɣar wenḍeř. 5 Ixzar, iẓra řecfun n řeqṭen mmarsen din, maca war yudif ca. ^■   6 Iḍfar i-t Cimɛun, yudef ɣar wenḍeř, iẓra ɛawed řecfun mmarsen din. 7 Amendiř wenni tuɣa x uzeǧif nnes, war immars ca ak-d řecfun n řeqṭen, maca tuɣa iḍfeṣ. ittwagg deg wemcan weḥḥdes. ^■   8 Řexdenni yudef-dd uřa d ameḥḍar nneɣni, wenni dd-yusin d amezwaru ɣar wenḍeř, iẓra uca yumen. 9 Minzi nitni tuɣa ɛad war ssinen Tira Iqeddsen, belli ittxeṣṣa as ad ikkar jar n imettinen. ^■  

10 Xenni dewřen imeḥḍaren nni ɣar taddart nsen.

11 Maryam teqqim tbedd ɣar wenḍeř barra, tᵉttru. Řami tuɣa tᵉttru, tesweḍ deg wenḍeř, ^■  

12 teẓra tnayen n lmalakat s warruḍ d acemřař, qqimen mani tuɣa temmars řxecbet n Yeccu, ijjen ɣar tsummtin nnes n uzeǧif, ijjen ɣar iḍaren nnes.

13 Nnan as: “A tamɣart, mayemmi tᵉttrud?” Tenna asen: “Maɣar kksen Sidi inu, war ssineɣ mani t ssarsen.”

14 Umi tenna aya, tenneqřeb ɣar ḍeffar, teẓra Yeccu ibedd, maca war tessin ca aqa-t d Yeccu. ^■  

15 Yeccu inna as: “A tamɣart, mayemmi tᵉttrud? Min xef tarezzud?” Tᵉttɣiř as Netta d bab n teḥwict, tenna as: “A sidi mařa cek i-t iksin, ini ayi mani t tessarsed, xenni ad t ksiɣ.”

16 Yeccu inna as: “A Maryam!” Nettat tenneqřeb, tenna as s Tɛibranit: “A Rabbuli!”, ixs ad yini: ‘A Amseɣɣar’.

17 Yeccu inna as: “War dd-tqarreb ca, aqa Necc ɛad war geɛɛdeɣ ca ɣar Baba, maca ruḥ ɣar aytma, ini asen: ‘Necc aqa ad geɛɛdeɣ ɣar Baba d Babatwem, ɣar AREBBI inu d AREBBI nwem.’ ” ^■  

18 Teɛqeb-dd Maryam n Majdala txebbar imeḥḍaren belli nettat teẓra Siditneɣ u belli Netta inna as man aya. ^■  

19 Ɣar tmeddit n wass nni, netta d amezwaru n simana, tuɣa tiwwura qqnent mani tuɣa munen imeḥḍaren s tiggʷudi zeg Wudayen, yudef-dd Yeccu, ibedd di řwest nsen, inna asen: “Sřam xawem.” ^■   20 Awarni řami inna aya, immeř asen ifassen nnes d uɣezdis nnes. Farḥen imeḥḍaren řami ẓrin Siditneɣ. ^■   21 Inna asen ɛawed Yeccu: “Sřam xawem, am mammec d ayi dd-issekk Baba, uřa d Necc ad kenniw dd-ssekkeɣ.” ^■   22 Awarni řami inna man aya, iṣuḍ daysen, inna asen: “Qebřem Arruḥ Iqeddsen.” 23 Wenni umi ɣa teɣfarem ddnub, ad as ttwaɣfaren ddnub nnes. Wenni umi d as i ɣa tᵉṭṭfem di ddnub nnes, ad as ttwaṭṭfen ddnub nnes.” ^■  

24 Maca Tuma, ijjen zi tenɛac, wenni umi qqaren ‘Acniw’, war tuɣi ca akidsen řami dd-yusa Yeccu. 25 Nnan as imeḥḍaren: “Aqa neẓra Siditneɣ!” Maca netta inna asen: “Mařa war ẓriɣ řimařt n imesmiren deg ifassen nnes, ad ssarseɣ aḍaḍ inu deg wemcan n imesmiren uca ad ssarseɣ afus inu deg uɣezdis nnes, war ttimneɣ.”

26 Awarni tmenya n wussan tuɣa imeḥḍaren nnes ɛawed ɣar daxeř u Tuma tuɣa akidsen. Yudef-dd Yeccu, waxxa tiwwura tuɣa qqnent, uca ibedd-dd di řwest nsen, inna: “Sřam xawem!” 27 Inna i Tuma: “Awi-dd aḍaḍ nnek uca xzar deg ifassen inu, sars afus nnek danita u sidef i-t deg uɣezdis inu, war ttiři d akafriw, maca d řmumen.” ^■   28 Yarra-dd Tuma, inna as: “A Sidi inu d AREBBI inu!” 29 Inna as Yeccu: “Umi teẓrid ayi řexxu, aqa tumned, a Tuma! Sseɛd n yinni yumnen, waxxa nitni war d ayi ẓrin.” ^■  

30 Yeccu igga aṭṭas n řeɛřamat nneɣni qibač i imeḥḍaren nnes, tinni war yurint ca deg wedlis-a, ^■   31 maca tina urant ḥima ad tamnem belli Yeccu Netta d Lmasiḥ, Mmis n AREBBI, uca xmi i ɣa tamnem, ad ɣarwem tiři Tudart s Yisem nnes.