1 Xenni ijja Pilaṭus ad hettken Yeccu s urekkuḍ. ^■   2 Awarni řami muden iɛeskariyyen ijj n ttaj s isennanen, ssarsen as tt x uzeǧif nnes uca yarḍen as ijj n useřham d arjuwani, 3 nnan: “Sřam xak, a Ajeǧid n Wudayen!”, uca wtin t x igemmizen nnes.

4 Iffeɣ-dd ɛawed Pilaṭus, inna asen: “Ad awem t-i-dd-ssuffɣeɣ, ḥima ad tessnem belli necc war dayes ufiɣ ssibbet i ucetci, uřa d ict.” 5 Xenni iffeɣ-dd Yeccu s ttaj n isennanen d ujeǧab ajurwani. Inna asen Pilaṭus: “Xzarem, Bnadem!”

6 Řami t ẓrin imeqqranen n ikehhanen d iɛessasen, sɣuyyen, nnan: “Ṣellb i-t, ṣellb i-t” Inna asen Pilaṭus: “Awyem t-i-dd kenniw, ṣellbem t, minzi necc war dayes ufiɣ uřa d ijj n řɛib.” 7 Arrin-dd xas Wudayen: “Ɣarneɣ Ccariɛa, u ɛlaḥsab Ccariɛa nneɣ ittxeṣṣa ad immet, minzi Netta ittarra ixef nnes d Mmis n AREBBI.” ^■  

8 Řami isřa Pilaṭus awař-a, yarni di tiggʷudi. 9 Yudef ɛawed ɣar taddart n ccreɛ, inna i Yeccu: “Manis Cek?” Maca Yeccu war xas dd-yarri ca.

10 Inna as Pilaṭus: “Ma war texsed ad kidi tessiwiřed? Ma war tessined ca aqa ɣari ṣṣulṭa ḥima ad ac ssarrḥeɣ u ɣari ṣṣulṭa ḥima ad Cek ṣellbeɣ?”

11 Yarra-dd xas Yeccu: “War ɣarek tᵉttiři bu ṣṣulṭa xafi, mařa war d ac dd-temmewc zi sennej. S uya, wenni d ayi ɣa isellmen, aqa xas ddenb imɣar zeg wenni i iǧan xak.”

12 Zi řexdenni tuɣa Pilaṭus yarezzu ad as isarreḥ, maca Udayen sɣuyyen, nnan: “Mařa tsarrḥed i Weryaz-a, war teǧid ca d ameddukkeř n qayṣar. Kuř ijjen wenni ittarran ixef nnes d ajeǧid, ittɛekkas qayṣar.” ^■  

13 Řami isřa Pilaṭus i wawař-a, issuffeɣ Yeccu, iqqim x řkursi n ccreɛ deg wemcan umi qqaren ‘Azzay n luṣa’, maca qqaren as s Tɛibranit ‘Gpipta’. ^□  

14 Tuɣa d ass n Usewjed i Tɣarṣt n Useɛdu. Tuɣa ɛřaḥař d tsaɛɛet wiss setta, inna i Wudayen: “Xzarem, Ajeǧid nwem!”

15 Maca nitni sɣuyyen: “Ksi t, ksi t, ṣellb i-t!” Inna asen Pilaṭus: “Ma ad ṣellbeɣ xenni Ajeǧid nwem?” Arrin-dd xas imeqqranen n ikehhanen: “War ɣarneɣ bu ujeǧid mɣir qayṣar!” ^■  

16 Xenni isellem asen t ḥima ad t ṣellben. Uca nitni ksin Yeccu, iwyen t ssenni. ^■  

17 Yarbu simant nnes ṣṣalib ɣar wemcan umi qqaren ‘Taceqquft’, maca s Tɛibranit qqaren as ‘Juljuta’. ^□  ■  

18 Ṣellben t dinni, uca ṣellben akides tnayen nneɣni, ijjen ɣar ijj n uɣezdis u wenneɣni ɣar uɣezdis nneɣni, u Yeccu di řwest.

19 Yura Pilaṭus ɛawed deg ict teřwiḥt, issars i-tt x ṣṣalib. Ammu i ittwari dayes: ‘Wanita d Yeccu Nnaṣiri, Ajeǧid n Wudayen’. ^■   20 Tira aya ɣrin tent aṭṭas n Wudayen, minzi amcan mani tuɣa ṣellben Yeccu yudes-dd i tendint. Tira aya ttwarint s lḥuruf n Tɛibranit d Tlatinit d Tyunanit. 21 Nnan imeqqranen n ikehhanen i Pilaṭus: “War ttari ca: ‘Ajeǧid n Wudayen’, maca aqa inna: ‘Necc d Ajeǧid n Wudayen!’ ” 22 Yarra-dd Pilaṭus: “Min uriɣ, aqa uriɣ t.”

23 Řami ṣellben iɛeskariyyen Yeccu, ksin arruḍ nnes, bḍan t x arebɛa n tseqqar, i kuř aɛeskari ict n tesɣart. Maca tcamir nnes tuɣa břa taxeyyaḍt, tᵉttwaxeyyeḍ qaɛ zi sennej. ^■   24 Nnan i wayawya: “War t nettcarrig ca, ad xas negg akeccuḍ, ad nẓar wi t ɣa yawyen, ḥima ad ittwakemmeř awař n Tira Iqeddsen i iqqaren: “Bḍan arruḍ inu jar asen u x warruḍ inu ggin akeccuḍ.” Man aya i iggin iɛeskariyyen. ^■  

25 Ɣar ṣṣalib n Yeccu tbedd yemmas d učmas n yemmas d Maryam tamɣart n Kliyupas d Maryam n Majdala. ^■   26 Řami iẓra Yeccu yemmas d umeḥḍar wenni tuɣa ittexs, ibedd din, inna i yemmas: “A tamɣart, xzar, mmim!” 27 Řexdenni inna i umeḥḍar nni:“Aqa-c yemmac!” Zi tsaɛɛet nni iksi tt umeḥḍar ɣar taddart nnes.

28 Awarni man aya issen Yeccu aqa kuřci ittwakemmeř, řexdenni inna, ḥima ad yiři min yuran deg Wedlis: “Necc ffudeɣ!” ^■   29 Ittwamars din ijj n uɣarraf iccur s řxeǧ. Ssɣeḍṣen ict n spunxa n hisub s řxeǧ uca ggin tt x uɣanim n tɛelǧet, ssiwḍen as tt ɣar uqemmum nnes. 30 Řami iqqas Yeccu řxeǧ, inna: “Aqa ittwakemmeř!” Uca issaḍar azeǧif nnes, isellem Arruḥ nnes.

31 Umi tuɣa ass n Usewjed n Pasxa, nnan Wudayen: “War iɛeddeř ad qqiment arrimat nsen x ṣṣalib di ssebt, minzi ass n ssebt yudes-dd!”, minzi ass nni n ssebt tuɣa d ameqqran aṭṭas. S uya ttaren Wudayen zi Pilaṭus ḥima ad arẓen iḍaren n yinni ittwaṣellben, ad ten ssiggʷejen ssenni. 32 Xenni usin-dd iɛeskariyyen, arẓin iḍaren n umezwaru u n wenneɣni i tuɣa ittwaṣelleb akides, 33 maca řami dd-usin ɣar Yeccu, war arẓin ca iḍaren nnes umi ẓrin aqa immut. 34 Maca ijjen zeg iɛeskariyyen issnuqqeb i-t s ict n lansa deg uɣezdis nnes uca ffɣen-dd idammen d waman deɣya. 35 Wenni iẓrin man aya, tuɣa iched u cchadet nnes d tidett. Netta issen, aqa inna tidett, ḥima ad tamnem uřa d kenniw. 36 Timesřayin-a msarent, ḥima ad ittwakemmeř Wedlis i iqqaren: “War zzayes ittareẓẓi yiɣes.” ^■   37 Uca ijj n wawař nneɣni zeg Wedlis iqqar: “Nitni ad xzaren wenni t issnuqqben.” ^■  

38 Awarni man aya Yusuf zi Arimatiya, wenni tuɣa d ijj n umeḥḍar n Yeccu maca s tnuffra zi tiggʷudi zeg Wudayen, ittar as i Pilaṭus ttesriḥ ḥima ad iksi řxecbet n Yeccu uca Pilaṭus isarreḥ as. Xenni yusa-dd, iksi řxecbet n Yeccu. ^■   39 Yusa-dd ɛawed Nikudimus wenni tuɣa dd-yusin qbeř ɣar Yeccu s ǧiřet, yiwi-dd akides axeǧeḍ n řefwaḥet n mirru d wecfir ɛřaḥař mya n arḍeřat. ^□  ■   40 Xenni ksin řxecbet n Yeccu, řeḥḥfen tt di řecfun ak-d řeɛṭur, am mammec nnumen tteggen tt Wudayen i wenḍeř. 41 Tuɣa din ijj n weḥwic deg wemcan mani ṣellben Yeccu, uca deg weḥwic ijj n wenḍeř n jdid, ɛemmarṣ war dayes ssarsen uřa d ijj. 42 Ssarsen Yeccu din, minzi tuɣa yiweḍ-dd wass n ssebt, u minzi anḍeř nni tuɣa yudes.