1 Maca neccin inni ijehden, ittxeṣṣa aneɣ ad narbu tuḍɛeft n yinni iḍeɛfen, war nettiwi ca arḍa i yixef nneɣ. ^■   2 Kuř ijjen ad issarḍa amqarreb nnes i tcuni d řebni. 3 Minzi Lmasiḥ ɛawed war issarḍi ca ixef nnes, maca am mammec tura:

“Tikkwura n yinni i Cek ikkwaren,

wḍant-i-dd xafi.” ^■  

4 Minzi marra min tura zic, tura i useřmed nneɣ, ḥima s ṣṣbar d ucejjeɛ s min iǧan di Tira Iqeddsen ad ɣarneɣ yiři usitem. ^■   5 AREBBI n ṣṣbar d ufewwej ad awem iwc maḥend ad tḥesbem ijj wenneɣni ɣares řqimet d ict di Yeccu Lmasiḥ, ^■   6 ḥima s yijj n array d ict n tmijja ad tessɛuǧam AREBBI, Babas n Siditneɣ Yeccu Lmasiḥ.

7 S uyenni qebřem ijjen wenneɣni, am mammec d aneɣ iqbeř Lmasiḥ ɛawed i uɛuǧi n AREBBI. 8 Ad iniɣ, aqa Yeccu Lmasiḥ idweř d amsexxar n wextan di ṭṭweɛ n tidett n AREBBI, ḥima ad iḍmen lwuɛud i iwaɛd i řejdud, 9 u ḥima řegnus ad ssemɣaren di AREBBI x ssibbet n arreḥmet i xasen dd-tusa am mammec tura:

“S uyenni ad cehdeɣ xak jar řegnus,

uca ad ṣebbḥeɣ Isem nnek.” ^■  

10 Uca iqqar ɛawed:

“Farḥem, a kenniw řegnus, jmiɛ ak-d řgens nnes.” ^■  

11 Uca inna ɛawed:

“Ḥemdem SIDI, a marra řegnus,

sebbḥem t, a marra ccuɛub!” ^■  

12 Ɛawed Icaɛya iqqar:

“Ad yiři weẓwar n Yassa,

u Wenni dd-ikkaren ad iḥkem x řegnus,

ad dayes yiři usitem n řegnus.” ^■  

13 AREBBI n usitem ad kenniw iccur s řefraḥet d řehna di l’iman ḥima ad tfeyyḍem s usitem nnes zi jjehd n Arruḥ Iqeddsen.

14 Necc simant inu ttwasqenɛeɣ zi jjihet nwem, a aytma, aqa kenniw tɛemmarem s tcuni, teccurem s marra tussna, ḥima ad tessřemdem ɛawed inneɣni.

15 Maca zeg uɣezdis aqa uriɣ awem s teryast, a aytma, maḥend ad kenniw ssɛeqřeɣ, s arḍa i d ayi immewcen zi AREBBI,

16 ḥima ad iřiɣ d amsexxar n Yeccu Lmasiḥ i řegnus, umi ttsexxareɣ i Řexbar Aṣebḥan n AREBBI, ḥima ad tiři taɣarṣt n řegnus d tameqbuč, tᵉttwaqeddes s Arruḥ Iqeddsen.

17 S uyenni ssemɣareɣ di Yeccu Lmasiḥ zzat i AREBBI.

18 Minzi war zeɛmeɣ ad ssiwřeɣ deg imezzuɣen n řegnus x ca war zzayi t iggi Lmasiḥ s wawař d řxedmet.

19 S jjehd n řeɛřamat d řeɛjayeb uca s jjehd n Arruḥ n AREBBI, aqa tuɣa ggureɣ ttenḍeɣ zi Urcalim ař Illirikun uca kemmřeɣ abarreḥ n Řexbar Aṣebḥan n Lmasiḥ. 20 Ammu tuɣa arezzuɣ ad barrḥeɣ, war iǧi mani ittwasemma Lmasiḥ qbeř ḥima war benniɣ x dsas n wenneɣni, 21 maca am mammec tura:

“Inni war zzayes ittwabarrḥen ad t ẓaren,

u yenni war xas isřin, ad amnen.” ^■  

22 S uyenni tuɣa war iwiḍeɣ aṭṭas n imuren maḥend ad ɣarwem dd-aseɣ. ^■  

23 Maca řexxu war ɣari bu ttasiɛ ḥima ad beccareɣ ɛad di jjwayeh-a u tuɣa ɛawed xseɣ ad ɣarwem dd-aseɣ aṭṭas n iseggʷusa zeg wami. ^■   24 Xmi i ɣa raḥeɣ ɣar Seppanya, ad ɣarwem dd-aseɣ, ad kenniw ẓareɣ, u ad ttwassqebbḍeɣ ɣar dinni zi ca zzaywem, awarni řami i ɣa arreɣ meẓri d amezwar umi ɣa ẓriɣ kenniw.

25 Maca řexxu aqa ruḥeɣ ɣar Urcalim ḥima ad sexxareɣ i imqeddasen. ^■   26 Minzi tuɣa yarḍa i inni iǧan di Makiduniya d Axaya ad ggen ca n twiza i imqeddasen imezřaḍ inni iǧan di Urcalim. 27 Tuɣa arḍan x man aya, maca tuɣa t ɛawed daysen d amarwas. Minzi mařa tuɣa řegnus carcen di min ɣarsen d agřa x řeḥsab n arruḥ, aqa-t ɛawed d amarwas di řegnus maḥend ad ten sexxaren ɛawed s min ɣarsen d agřa x řeḥsab n ddat. 28 Xmi i ɣa kemmřeɣ man aya uca ad asen ssiwḍeɣ řɣiǧet n twiza aya s řaman, ad dd xawem kkeɣ d abrid xmi i ɣa raḥeɣ ɣar Seppanya. 29 Maca ssneɣ belli mařa usiɣ-dd ɣarwem, ad dd-aseɣ s řmud iccuren s lbaraka n Řexbar Aṣebḥan n Lmasiḥ. ^■  

30 Ttareɣ zzaywem, a aytma, s Siditneɣ Yeccu Lmasiḥ uca s tayri n Arruḥ, ad tbeddem nican akidi di tẓaǧit ɣar AREBBI x ssibbet inu, ^■   31 ḥima ad ssareɣ ixef inu zeg inni war yuminen ca di Yahudiyya, ḥima ad tiři tsexxart inu i imqeddasen di Urcalim d tameqbuč, ^■   32 ḥima ad ɣarwem dd-aseɣ ccureɣ s řefraḥet s array n AREBBI uca ad areyyḥeɣ akidwem. ^■   33 AREBBI n řehna ad kiwem yiři marra idwem. Amin.