Aqbař n wayawya
14
1 Wi iḍeɛfen di l’iman, wcem as afus, war ttemsebḍam deg ixarriṣen nwem jar awem. 2 Aqa din ḥed yumen izemmar ad icc kuřci, maca wenni iḍeɛfen ad icc tibbi waha. ■ 3 Wenni ittetten, war isseḥqari wenni war ittetten, d wenni war ittetten, war iḥekkem x wenni ittetten, minzi AREBBI iqbeř i-t. 4 Min teɛnid cek wenni iḥekkmen x umsexxar n wenneɣni? Ma ibedd niɣ iwḍa, d man aya i bab nnes. Maca ad ibedd, minzi AREBBI izemmar ad t issbedd d abeddi. ■ 5 Aqa din ḥed ittɣiř as aqa din ass sennej i wass nneɣni, u wenneɣni ittɣiř as aqa kuř ass kifkif. Ejj kuř ijjen ad iqneɛ di řbař nnes nican. ■ 6 Wenni iweqqaren ijj n wass, i Sides i t ɣa iweqqar. Wenni war iweqqaren ass, i Sides i war t iweqqar. Wenni iccen, ad icc i Sides, minzi ad icekkar AREBBI. Wenni war iccin ca, i Sides war icci ca uca netta ad icekkar AREBBI ɛawed. ■ 7 Minzi uřa d ijj zzayneɣ aqa iddar i yixef nnes, uca uřa d ijjen immut i yixef nnes. ■ 8 Minzi mařa neddar, ad neddar i Siditneɣ, niɣ mařa nemmut ad nemmet i Siditneɣ. S uyenni ma neddar niɣ nemmut, aqa neccin i Siditneɣ. 9 Minzi i uya i immut Lmasiḥ, xenni ikkar-dd uca idweř iddar ɛawed, ḥima ad yiři d SIDI i yenni immuten uřa i yenni iddaren.
10 Maca cek, mayemmi i ɣa tḥekmed x umac? Niɣ mayemmi ɛawed tesseḥqarad umac? Minzi neccin marra ad nbedd qibač i řkursi n ccreɛ n Lmasiḥ. ■
11 Am mammec tura:
“S tidett, am ddareɣ Necc, iqqar SIDI,
ad ayi aḍaren marra ifadden,
u kuř iřes ad xafi iched.” ■
12 Xenni ejj kuř ijjen zzayneɣ ad igg řeḥsab x yixef nnes qibač i AREBBI. ■
Nbřa asebbi
13 Zi řexxu d tsawent war ḥekkmem ijjen x wenneɣni, maca ḥsen ad teksed awař maḥend war tessarsed ca ijj n weẓru maḥend ad dayes inqařḍ umac. ■
14 Minzi necc ssneɣ, aqa ttwasqenɛeɣ di SIDI Yeccu, belli uřa d ict n řḥajjet texmej i Netta, mɣir i wenni tt iḥesben d řexmej, aqa i netta waha umi texmej. ■
15 Mařa ixeyyeq umac x ssibbet n macca, aqa cek war tuyured di tayri. War tteḥḥi ca s macca nnek wenni i xef immut Lmasiḥ. ■
16 Min iǧan d řxar i neccin, war tejji ḥed ad xas issiweř s řɣar.
17 Minzi Tageldit n AREBBI war teǧi di macca d tissit, maca di tsegda d řehna d řefraḥet s Arruḥ Iqeddsen. ■
18 Minzi wenni isexxaren i Lmasiḥ di man aya, aqa yarḍa AREBBI uca netta d ameqbuř ɣar iwdan.
19 Ad neḍfar xenni min iǧan i řehna d řebni n ijjen i wenneɣni. 20 War ttareddeǧ ca řxedmet n AREBBI x ssibbet n macca. Marra timesřayin aqa atent d timezdag, maca uct x bnadem wenni i ɣa igg aẓru n uneqraḍ s macca nnes. ■ 21 Mliḥ umi war tᵉttetted ca aysum u war tsessed ca binu niɣ war tᵉttegged uřa d ict n řḥajjet i di i ɣa inqarḍ umac. ■ 22 Ma tᵉttwassqenɛed i yixef nnek? Ad ac yiři man aya i yixef nnek zzat i AREBBI. Sseɛd n wenni war ittikkwiḍ ccreɛ x yixef nnes di min d as ittɣiř mliḥ. 23 Maca wenni ittcekkan xmi ittett, ittwaḥaseb, minzi man aya war iǧi zi l’iman. Qaɛ min war iǧin zi l’iman, aqa-t d ddenb. ■