1 Ejj kuř ijj ad iwaḍeɛ i ṣṣulaṭat n yinni iḥekkmen, minzi war din ṣṣulṭa mɣir s AREBBI, d tinni iǧan aqa issbedd i-tent AREBBI. ^■   2 S uyenni wenni i ɣa immɛařan ak-d ṣṣulṭa, ittemɛařa ak-d min issbedd AREBBI, d yenni ittemɛařan ad ksin řḥukm nsen. 3 Maca řḥukkam war ǧin i tiggʷudi n yinni itteggen řxar, maca n yinni itteggen řɣar. Ma texsed ad tiřid břa tiggʷudi zi ṣṣulṭa? Egg min icnan, ad ac yiři ccan zzayes, 4 minzi ṣṣulṭa d tamsexxart n AREBBI i řefḍeř nnek. Maca mařa teggid řɣar, ggʷed, minzi war tkessi ca ssif baṭeř umi nettat d tamsexxart n AREBBI, aqa tneqqem s weɣḍab iqesḥen x yenni itteggen řɣar. 5 Xenni ittxeṣṣa ad neṭṭaɛ, war iǧi x ssibbet n weɣḍab waha, maca ɛawed x ssibbet n tnefsect. 6 X ssibbet-a tᵉttxeǧṣem ḍḍariba i kuř azeǧif umi nitni d imsexxaren n AREBBI i ittwaggen i man aya simant nnes. 7 Wcem i marra min d asen ittxeṣṣan: ḍḍariba i wenni umi dd-tusa ḍḍariba i kuř azeǧif, řexřaṣ i wenni umi dd-yusa řexřaṣ, aweqqar i wenni umi dd-yusa uweqqar, ccan i wenni isdaheǧen ccan.

8 War tteggem amarwas ɣar ḥed mɣir wenni n tayri ak-d wayawya, minzi wenni ittexsen amqarreb nnes, aqa ikemmeř Ccariɛa. ^■   9 Minzi Ccariɛa teqqar ɛawed: “War zenni!”, “War neqq!”, “War tticar!”, “War ttasem!”, uca mařa din ca n tewṣeyyet nneɣni, aqa atent munent deg wawař-a: “Ad texsed amqarreb nnek amecnaw ixef nnek!” ^■  

10 Tayri war ttḍarri ca amqarreb. S uyenni tayri nettat d řekmař n Ccariɛa.

11 Aqa ssneɣ aqa ta d řweqt d tsaɛɛet ḥima ad nfaq zeg iḍeṣ, minzi řexxu Tudart nneɣ tudes-dd ktar zeg wami numen. ^■  

12 Řexxu teɛdu ǧiřet, yiweḍ-dd uziř. Ejj aneɣ ad nessars řexdayem n taǧest, ad neksi řesnaḥ n tfawt. ^■  

13 Ad nuyur s ucuwwar axmi d aziř, war iǧi di zzhu abarcan d uɣelli uřa di texmuji n farq-ccɣeř niɣ deg umenɣi d řeḥsed, ^■  

14 maca arḍem Siditneɣ Yeccu Lmasiḥ, war tticem taynit i nnecwat n arrimet tamednubt. ^■