1 Ttřaɣiɣ kenniw, a aytma, s arreḥmet tameqqrant n AREBBI, ad tqeddmem arrimat nwem d taɣarṣt iddaren, iqeddsen, yarḍan i AREBBI, wa d aɛbad nwem icuwwaren. ^■   2 War temquddam ak-d ddunect-a, maca beddřem s uřeqqem n řeɛqeř nwem zi jdid ḥima ad tqeǧbem min ixs AREBBI: min icnan d min yarḍan d min ikemmřen. ^■  

3 Aqa s arḍa tenni d ayi immewcen, qqareɣ i kuř ijjen zzaywem, war ttxarreṣ sennej i min ittřiq uxarraṣ nnes, maca xarreṣ nican di min ittřiqen řqedd n l’iman i iwca AREBBI i kuř ijjen zzaywem. ^■   4 Am mammec ɣarneɣ aṭṭas n iɣezdisen deg ict n arrimet uca marra iɣezdisen n arrimet war ɣarsen bu řxedmet d icten, ^■   5 ammu neccin, waxxa d aṭṭas, aqa aneɣ d ict n arrimet di Lmasiḥ d iɣezdisen ijjen i wenneɣni. ^■   6 Aqa ɣarneɣ tiwhibin imsebḍan ɛlaḥsab arḍa i d aneɣ immewcen: ijjen ɣares tawhibt maḥend ad ittnabb ɛlaḥsab řqedd n l’iman nnes, ^■   7 niɣ nneyyet n tsexxart maḥend ad isexxar, niɣ řxedmet n umseɣɣar maḥend ad issɣar, ^■   8 niɣ tawhibt n usfewwej maḥend ad issfewwej, niɣ tawhibt maḥend ad iwc s tecrimet, niɣ tawhibt n uḍebbar s wemḥaḍ, niɣ tawhibt n arreḥmet s řefraḥet. ^■  

9 Ad tiři tayri nwem břa nnifaq. Carhem řɣar, tcebbarem di min icnan.

10 Iřim mliḥ ijjen ak-d tawmat nwem, xsem ijj i wenneɣni, izzarem ad tcennɛem ijjen wenneɣni. ^■  

11 Iřim d imḥaḍen, war ttiřim d ifinyanen. Iřim d timessi di arruḥ, ɛebdem Arebbi nwem,

12 Farḥem am tṣebbarem. Di řmeḥnet ṣbarem. Ṭṭfem řebda di tẓaǧit nwem. ^■  

13 Wcem afus di min iḥdajen imqeddasen. Ggem s řeḍrafet ak-d ibarraniyyen. ^■  

14 Barkem inni kenniw imarrten, barkem war neɛɛřem ca. ^■  

15 Farḥem ak-d inni ifarḥen, rum ak-d yenni ittrun.

16 Ḥesbem aytmatwem am mammec tḥessbem i ixef nwem, War ttiřim d imɛeffaren, maca ruḥem ak-d imwaḍɛen. War ttiřim ca d imiɣisen ak-d yixef nwem. ^■  

17 War ttarrim ca ḥed x řɣar s řɣar, maca ggem min icnan i marra iwdan. ^■  

18 Mařa tzemmarem, mecḥař ma i dd-ittasen zzaywem, ṣeřḥem ak-d marra iwdan. ^■  

19 War ttentiqimem ca i yixef nwem, a imɛizzen, maca wcem amcan i weɣḍab minzi tura: “Mařa war tarrim tasɣart s yixef nwem, xenni Necc ad awem ntaqmeɣ, iqqar AREBBI.” ^■  

20 Mařa iǧuẓ řeɛdu nwem, seccem t, mařa ifud, wcem as ad isu, minzi mařa teggid aya, ad tyarwed řefḥem itteḥduduqen x uzeǧif nnes. ^■   21 War ttejji ca řɣar ad cek iɣřeb, maca ɣřeb x řɣar s řxar.