1 Ad iniɣ: Ma yugi AREBBI xenni řgens nnes? Ɛemmarṣ! Aqa necc simant inu ɛawed d Ayisraili zi zzariɛet n Ibrahim, zi teqbič n Binyamin. ^■   2 AREBBI war ineṭṭar ca řgens nnes i tuɣa issen zeg umezwaru. Niɣ war tessinem ca min iqqar Wedlis Iqeddsen x Iliya, am mammec tuɣa iksi tanfuč x Israil ɣar AREBBI, inna:

3 “A Sidi, nɣin inabiyyen nnek,

areddǧen iɛalṭaren nnek.

Qqimeɣ necc waha,

uca nitni arezzun řeɛmar inu.” ^■  

4 Ittwanna as s ijj n řewḥiy:

“Aqa jjiɣ i yixef inu sebɛa-ařaf n yeryazen,

inni war ḍrin ca ɣar iḍaren zzat i Baɛal,

war ɛebden i Baɛal.” ^■  

5 Ammu di řweqt n yiḍa ɛawed, aqa teqqim yijj n řbaqi am t ixḍar Netta x řeḥsab n arḍa. ^■   6 Mařa teǧa s arḍa, aqa war tᵉttiři ɛad s řexdayem niɣ xenni arḍa war iǧi ɛad d arḍa. Maca mařa s řexdayem, war teǧi ɛad d arḍa. Mařa lla, aqa řxedmet war teǧi ɛad d řxedmet. ^■  

7 Min i ɣa nini xenni? Min tuɣa tarezzu Israil war t tᵉṭṭif, maca inni ittwafarzen ṭṭfen t uca inneɣni dewřen d idarɣařen deg wuřawen nsen, ^■   8 am mammec tura:

“Aqa AREBBI iwca asen arruḥ iḍbaren

d tiṭṭawin i war ittwiřin,

d imezzuɣen i war ittesřin,

ař ass n yiḍa.” ^■  

9 Dawud inna ɛawed:

“Ad tedweř taẓewḍa n tiɣarṣin nsen d taxceft

d tafḍuč d uxeǧeṣ aɛeffan d tɛenkrift i nitni. ^■  

10 Ejj ad darɣřent tiṭṭawin nsen ḥima war ttwiřin,

u ejj ad qewsen iɛurar nsen i řebda.” ^■  

11 Ɛawed ad iniɣ: Ma nderfen ḥima ad wḍan? Ɛemmarṣ! Maca s uweṭṭu nsen tiweḍ-dd Tudart i řegnus, ḥima ad dewřen ttasmen.

12 Mařa idweř unedref nsen d agřa d ameqqran i ddunect uca taxessart nsen d agřa i řegnus, mecḥař qaɛ i ɣa tiři řekmařet nsen ktar.

13 Aqa ssawařeɣ akidwem, a řegnus, necc d wenni d rrasul i řegnus, maḥend ad ssemɣareɣ di řxedmet n tsexxart inu: ^□  ■  

14 Ad taɣ ad zemmareɣ ad ggeɣ tusmi deg ayt n řgens inu uca ad ittwassenjem ca zzaysen.

15 S minzi, mařa amenḍar nsen aqa-t d aṣřaḥ s ufeyyeḍ i ddunect, mammec i ɣa yiři wedwař nsen mɣir Tudart zi taddart n imettinen!

16 Mařa tuɣa asuffeɣ amezwaru n ṣṣabet tqeddes, amenni uřa d řɛejnet n arecti tqeddes! Mařa tuɣa aẓwar iqeddes amenni uřa d řefruɛ. ^■  

17 Maca mařa tuɣa ittwaqeṣṣ ca n řefruɛ u xenni cek am ijj n uzemmur n řexřa tᵉttwařeqqmed deg wemcan nsen, tdewřed tnefɛed zeg iẓewran d zzect n tzitunt,

18 war tuff ca x řefruɛ. Mařa tuffed, war tucid ak-d yixef nnek, aqa cek war teksid ca aẓwar, maca aẓwar iksi cek.

19 Ad taɣ ad tinid: “Aqa ttwaqeṣṣen řefruɛ ḥima necc ad ttwařeqqmeɣ.” 20 Mliḥ! Nitni ttwaqeṣṣen umi war uminen ca uca cek s l’iman tᵉttwařeqqmed u teksid amcan nsen. War tuff ca, maca ggʷed. 21 Minzi mařa tuɣa AREBBI war ittceṭṭar ca x řefruɛ n ṭṭbiɛet, ad taɣ war xak ittceṭṭar ca ɛawed. 22 Aqa da d řeḍrafet n AREBBI d řewɛaret nnes: řewɛaret x yenni iwḍan, maca řeḍrafet xak mařa tᵉṭṭfed di řeḍrafet nnes niɣ uřa d cek ad tᵉttwaqessed. 23 Uřa d nitni ad ttwařeqqmen ijj n umur nneɣni, mařa war qqimen břa l’iman, minzi ɣar AREBBI tizemmar ḥima ad ten iřeqqem ɛawed. ^■   24 Minzi mařa cek tᵉttwaqessed zeg uzemmur n řexřa uca tᵉttwařeqqmed di tzitunt taṣebḥant, s řɛeks n ṭṭbiɛet nnek, mecḥař ihewnen ktar ad ttwařeqqmen nitni di tzitunt nni dd-ittasen ak-d ṭṭbiɛet nsen!

25 Minzi ttexseɣ ad tessnem ssirr-a, a aytma, ḥima war ttiřim d imiɣisen ak-d yixef nwem, aqa temsar ict n usdaɣeř n wuř x Israil i drus n řweqt ař dd ɣa yadef uɛemmar n řegnus. ^■   26 Uca xenni marra Israil ad tedweř teddar am mammec tura:

“Amsenjem ad dd-iffeɣ zi Ṣihyun,

uca ad issbeɛɛed řmuɛṣiyyet x Yaɛqub. ^■  

27 Xenni ad ṭṭfen di Řɛahd i dd-yusin zzayi,

x minni i ɣa ɣfareɣ i ddnub nsen.” ^■  

28 Zi jjihet n Řexbar Aṣebḥan nitni aqa d řɛedyan n AREBBI x ssibbet nwem, maca umi ttwaxḍaren zi AREBBI aqa nitni d imɛizzen x ssibbet n řejdud. 29 Minzi AREBBI war ittbeddař tawhibt nnes s arḍa uřa d třaɣit nnes. 30 Minzi am mammec tuɣa kenniw zic war tᵉṭṭiɛem ca AREBBI, maca řexxu aqa teksim arreḥmet s řmuɛṣiyyet nsen, 31 ammu nitni ɛawed war ṭiɛen ca řexxu i arreḥmet tenni xawem dd-yusin, ḥima ad xasen dd-tas arreḥmet. 32 Minzi AREBBI iḥebbes i-ten marra sadu řmuɛṣiyyet, ḥima ad ten yarḥem marra. ^■  

33 A, raǧaɣ n wagřa d tiɣit d tussna n AREBBI, mammec i ɣa yegg bnadem ad iqeǧeb řeḥkamat nnes, mammec i ɣa yegg ad yaf ibriden nnes. ^■  

34 “Minzi wi i ɣa issnen nneyyet n SIDI?”

niɣ:

“Wi d as iǧan d amcawar?” ^■  

35 niɣ:

“Wi d as izzaren iwca as ca,

umi d as ittxeṣṣa ad ittwaxeǧeṣ zzayes?” ^■  

36 Minzi marra zzayes i iǧa, u marra dayes, u marra aqa-t s ufus nnes. Ɣares Netta aɛuǧi i řebda qaɛ. Amin. ^■