1 A aytma, ameẓri n wuř inu u taẓaǧit tenni ẓuǧeɣ ɣar AREBBI di ṭṭweɛ n Israyil, aqa-tt ḥima ad ɣarsen tiři Tudart. 2 Aqa cehhdeɣ xasen aqa nitni ɣarsen cḍaret i AREBBI, maca břa tussna. ^■   3 Maɣar war ssinen tasegda n AREBBI, maca arezzun ad ṭṭfen di tsegda n ixef nsen. S uya war sswaḍɛen ixef nsen i tsegda n AREBBI.

4 Minzi akemmeř n Ccariɛa netta d Lmasiḥ, i tsegda i kuř ijjen i ittamnen. ^■   5 Minzi Musa yura zi jjihet n tsegda di Ccariɛa:

“Wenni itteggen man aya,

ad zzayes iddar.” ^■  

6 Maca tasegda tenni zi l’iman teqqar ammu:

“War teqqar deg wuř nnek:

‘Wi i ɣa igeɛɛden ɣar ujenna uca issehwa Lmasiḥ?” ^■  

7 niɣ:

“Wi i ɣa ihwan deg weḥfur n řaxart,

uca issgeɛɛed Lmasiḥ zi taddart n imettinen?”

8 Maca min ɣa tini tsegda?

“Awař yudes i cek, aqa-t deg uqemmum nnek uřa deg wuř nnek.”

Wa d Awař n l’iman i zi nettbarreḥ.” ^■  

9 Mařa tcehded Siditneɣ Yeccu s uqemmum nnek uca ad tamned s wuř nnek belli AREBBI issnekkar i-t zi taddart n imettinen, ad teddared.

10 Minzi uř i dayes ittamen, ad ittwasegged, uca aqemmum i zzayes icehhden, ad iddar.

11 Minzi Tira Iqeddsen qqarent:

“Marra wi zzayes i ɣa yamnen,

war ittseḍḥi ca.” ^■  

12 Minzi war ittegg bu řfarz jar Wuday d Iramiyyen, minzi Netta d Ijjen, SIDI nsen marra, wenni d bu-wagřa i marra inni xas dd-ittřaɣan. ^■  

13 “Minzi kuř ijjen wenni i ɣa iřaɣan s Yisem n SIDI,

ad injem.” ^■  

14 Mammec i ɣa řaɣan x wenni di war uminen ca? Niɣ mammec i ɣa yamnen deg wenni umi war sřin, niɣ mammec i ɣa sřen mařa uřa d ijj war zzayes ibarreḥ ca?

15 Mammec i ɣa barrḥen mařa war dd-ttwasekken? Am mammec tura:

“Mecḥař ḍarfen iḍaren n yinni ittbarrḥen s řehna,

n yinni ittbarrḥen s tebratin tiṣebḥanin.” ^■  

16 Xenni maci marra ṭṭaɛen i Řexbar Aṣebḥan, minzi Icaɛya iqqar:

“A Sidi inu, wi i ɣa yamnen zi tebrat nneɣ?” ^■  

17 Aqa l’iman zeg usḥessi uca asḥessi zeg Wawař n AREBBI.

18 Maca ad iniɣ:

“Ma zeɛma nitni war sřin?”,

u:

“Xzar, řḥess nsen iffeɣ-dd ɣar marra tammurt,

uca awařen nsen ɣar tneggura n ddunect.” ^■  

19 Maca ad iniɣ:

“Ma Israil war tefhim ca man aya?”

Ɣar umezwar Musa inna:

“Ad daywem ggeɣ tusmi zeg inni war iǧin ca d řgens

uca s yijj n řgens afɣuř ad daywem ggeɣ axeyyeq.” ^■  

20 Xenni Icaɛya izɛem ad yini:

“Aqa ufin ayi, inni war xafi yarezzun,

aqa dewřeɣ baneɣ-dd i yenni war xafi isseqsin.” ^■  

21 Maca zi jjihet n Israil iqqar:

“Ass ikmeř sswiẓẓḍeɣ ifassen inu

i ijj n řgens ittemcebbcen, iɛeṣṣan.”^■