1 Uca necc, a aytma, řami dd-usiɣ ɣarwem, war dd-usiɣ ca ḥima ad awem barrḥeɣ Řexbar Aṣebḥan n ssirr n AREBBI s tbezzaḥt n wawař niɣ s tiɣit, ^■   2 minzi aqa tuɣa ɛewwřeɣ ḥima war ttesneɣ ca jar awem mɣir Yeccu Lmasiḥ d wenni ittwaṣellben. 3 Tuɣa ayi akidwem s waṭṭas n tiggʷudi d uqdides. ^■   4 Ni awař inu uřa d tbarreḥt inu tuɣa aten s wawařen izewwqen n tiɣit n bnadem, maca s wescan n Arruḥ d jjehd, ^■   5 ḥima l’iman nwem war ittbeddi ca x tiɣit n iwdan, maca x jjehd n AREBBI. ^■  

6 Maca nessawař s tiɣit i yenni t iwḍen, aqa s ict n tiɣit tenni war iǧin n ddunect-a niɣ n řḥukkam n ddunect-a, inni i ɣa ittwassbeṭṭřen, ^■   7 maca nessawař tiɣit n AREBBI s ijj n ssirr i tuɣa inuffaren, wenni tuɣa izzar ifarz i-t AREBBI i uɛuǧi nneɣ qbeř ma i ɣa tiři ddunect, ^■   8 ijj n ssirr nni war t issin uřa d ijj zi řḥukkam n ddunect-a, minzi mařa tuɣa ssnen t, iři war ṣellben ɛemmarṣ Sidi n uɛuǧi. ^■   9 Maca am mammec ittwari:

“Min war teẓri tiṭṭ d min war isři umezzuɣ

d min war yudifen ca ɣar wuř n bnadem,

aqa man aya issewjed i-t AREBBI i yenni t ittexsen.” ^■  

10 Maca AREBBI immeř aneɣ t s Arruḥ, minzi Arruḥ tarezzu kuřci uřa d řaǧaɣ n AREBBI. ^■  

11 Minzi man wen zeg iwdan issnen min iǧan n bnadem mɣir arruḥ n bnadem wenni dayes iǧan? Ammu ɛawed uřa d ijj war issin ca min iǧan n AREBBI mɣir Arruḥ n AREBBI. ^■  

12 Aqa neccin war neksi ca arruḥ n ddunect, maca Arruḥ wenni dd-yusin zi AREBBI, ḥima ad nessen min d aneɣ iwca AREBBI. ^■  

13 S uyenni awařen i zi nessawař, war ǧin d tɣuri n wawařen s tiɣit n bnadem, maca d tɣuri zi Arruḥ, ḥima ad nessemqudda min iǧan n arruḥ ak-d min iǧan n arruḥ. ^■  

14 Maɣar bnadem s yixef nnes war iqebbeř ca min iǧan n Arruḥ, minzi iḥesb i-t d tubbuheřya uca war izemmar ad t ifhem, minzi man aya izemmar ad ittwafarz s Arruḥ waha.

15 Maca bnadem arruḥani aqa izemmar ad ifarz kuřci, maca netta simant nnes war xas iḥekkem uřa d ijj. ^■  

16 Minzi wi issnen axemmem n SIDI ařami izemmar ad t icawar? Maca neccin ɣarneɣ axemmem n Lmasiḥ. ^■