1 A aytma, necc war zemmareɣ ad kiwem ssiwřeɣ amecnaw ak-d iwdan inni iddaren ɛlaḥsab Arruḥ, maca amecnaw inni iddaren ɛlaḥsab arrimet tamednubt waha, amecnaw iseyman di Lmasiḥ. 2 Aqa wciɣ awem ad teswem aɣi, war iǧi d ařeqqim i řebda, minzi tuɣa war d as tzemmarem, uřa řexxu war d as tzemmarem ɛad, ^■   3 s minzi aqa kenniw ɛad di arrimet tamednubt. Maɣar mařa din ɛad jar awem řeḥsed d imenɣan d umsebḍi, ma war teǧim ɛad n arrimet tamednubt niɣ teggurem ɛad am bnadem amednub? ^■   4 Minzi mařa ijjen zzaywem iqqar: ‘Necc aqa ayi zi Bulus!’ u wenneɣni iqqar: ‘Necc aqa ayi zi Apullus!’, ma xenni kenniw war teǧim ca d iwdan imednab? ^■   5 Maɣar min iɛna Apullus u min iɛna Bulus? Aqa aten mɣir d imsexxaren i zi tdewřem tumnem, uca kuř ijjen am mammec d as iwca SIDI. ^■   6 Aqa necc ẓẓuɣ, Apullus issu, maca AREBBI isseɣmi. ^■   7 Xenni wenni itteẓẓun war iǧi d ca uřa d wenni ittessun, maca AREBBI wenni issɣemmayen. 8 Wenni itteẓẓun d wenni ittessun d ijjen, waxxa kuř ijj tekkar as-dd řmunet nnes amecnaw řxedmet nnes. ^■   9 Minzi neccin d imsexxaren ak-d AREBBI uca kenniw d tafeǧaḥt d řebni n AREBBI i teǧam. ^■  

10 Ɛlaḥsab arḍa n AREBBI i d ayi immewcen, necc, amecnaw řemɛeǧem abennay amiɣis, ggiɣ dsas u wenneɣni ad ibna xas. Ejj kuř ijj ad iḥḍa mammec xas i ɣa ibna.

11 Minzi uřa d ijjen war izemmar ad igg dsas nneɣni x wenni immarsen, aqa-t d Yeccu Lmasiḥ. ^■  

12 Uca mařa ḥed ad ibna x dsas nni s wureɣ, nnuqart, iẓra iɣřan, tefrewt, řum niɣ s uxecxuc,

13 řxedmet n kuř ijjen ad tban, minzi ass ad tt isscen. Minzi s timessi ad ittwaseḍhar mammec teǧa řxedmet n kuř ijj, timessi ggur ad tt tqeǧeb. ^■  

14 Mařa teqqim řxedmet i xas tuɣa ibna ca n ijjen, aqa netta ad iṭṭef řmunet nnes s ufus n Řemɛeǧem abennay,

15 u mařa tecmeḍ řxedmet n ca n ijjen, aqa netta ad yarbu taxessart nnes, maca netta simant nnes ad injem, waxxa axmi ikka timessi.

16 Ma war tessinem ca belli teǧam d zzawect n AREBBI uca belli Arruḥ n AREBBI izeddeɣ daywem? ^■  

17 Mařa ḥed yareyyeb zzawect n AREBBI, AREBBI ad t yareyyeb, minzi zzawect n AREBBI, tenni teǧam kenniw, tqeddes i teǧa.

18 War tejji ḥed ad issecmet ixef nnes! Mařa din ḥed jar awem ittɣiř as ixef nnes d amiɣis di ddunect-a, ad idweř d abuhaři maḥend ad yiři d amiɣis. ^■  

19 Minzi tiɣit n ddunect-a teǧa d tubbuheřya ɣar AREBBI. Aqa tura:

“Iṭṭef imiɣisen s teḥraymect nsen!”, ^■  

20 uca ɛawed:

“SIDI issnen aqa ixarriṣen n imiɣisen d řbaṭeř.” ^■  

21 Ammu xenni uřa d ijj war issemɣari ca zeg iwdan, minzi marra nwem, 22 ma d Bulus, ma d Apullus, ma d Kifa, ma d tudart, ma d řmewt, ma d iḍa niɣ d tiwecca, aqa marra nwem, 23 maca kenniw n Lmasiḥ uca Lmasiḥ n AREBBI.