1 Ejj aneɣ ad nettwaḥseb zzaywem am imsexxaren n Lmasiḥ u am iwkiřen n řesrar n AREBBI. ^■   2 Xenni aqa ittxeṣṣa i iwkiřen ad ttwafen d imtiqqan. ^■   3 Necc war d ayi icqi ca mařa ttwaḥekmeɣ zzaywem niɣ zeg ijj n bnadem. Uřa d necc war ḥekkmeɣ ca x ixef inu. 4 Minzi necc war uciɣ s ca war iḥřin dayi, maca s man aya war ttwaseggdeɣ, maɣar aqa SIDI d Řqaḍi inu. ^■   5 S uyenni war ḥekkmem ca x walu ař dd ɣa yas SIDI wenni i ɣa issuffɣen ɣar tfawt min innufaren di taǧest, ad isseḍhar ixarriṣen n wuřawen, uca řexdenni kuř ijj ad ɣares yiři usemɣar zi AREBBI. ^■  

6 Aqa man aya, a aytma, iwyeɣ t-i-dd xafi u x Apullus amecnaw ijj n umedya di ṭṭweɛ nwem, ḥima ad zzayneɣ třemdem maḥend war tᵉttxarriṣem ca barra i min iǧan di tira, ḥima uřa d ijj ma ad issemɣar ixef nnes ḍidd i umqarreb nnes di ssibbet n yijjen nneɣni. ^■   7 Man wen yarezzun daywem? Niɣ min ɣarwem nni war t tᵉṭṭifem? Uca mařa tᵉṭṭfem t, mayemmi tcennɛem axmi war t tᵉṭṭifem ca? ^■   8 Řexxu aqa tejjiwnem, u tdewřem tᵉttejjarem uca břa neccin aqa tḥekmem am ijeǧiden. Maɛlik kenniw tḥekkmem am ijeǧiden, ad yiři neccin xenni ad neḥkem ɛawed akidwem! 9 Minzi ittɣiř ayi belli AREBBI igga aneɣ, neccin inni iǧan d rrusul, ɣar uneggar, axmi xaneɣ ḥekmen s řmewt, minzi aqa nedweř d afurrej i ddunect u i lmalakat d iwdan. ^■  

10 Neccin neǧa d ibuhařiyyen x ssibbet n Lmasiḥ, maca kenniw teǧam d imiɣisen di Lmasiḥ. Neccin nheyyef, kenniw tjehdem. Kenniw tᵉttwacennɛem, neccin nettwaseḥqara. ^■  

11 Ař řexxu neccin dayney řaẓ d ufadi d tuɛaryent, ccaten aneɣ, war ɣarneɣ bu tzeddiɣt, ^■  

12 narebber am nxeddem s ifassen nneɣ. Nitni sseḥqaran aneɣ, aqa ad nbarek, darrcen xaneɣ, maca aqa nkessi armeḥ, ^■  

13 ceqqfen dayneɣ, aqa nettḥeccem i-ten di řxir. Ař řexxu nedweř amecnaw tazubač n ddunect d ifuraḍ n marra, ař i řexxu.

14 War ttariɣ aya ḥima ad kenniw sseḥcimeɣ, maca ttziyyareɣ kenniw amecnaw tarwa iɛizzen. ^■  

15 Waxxa mařa tuɣa din ɣarwem ɛecra-ařaf n yinni i kenniw yarebban di Lmasiḥ, aqa war ɣarwem aṭṭas n ibabaten, minzi necc jjiɣ-dd kenniw di Yeccu Lmasiḥ s Řexbar Aṣebḥan. ^■  

16 S uyenni ttarreɣ zzaywem: Arewsem ayi! ^■  

17 S uyenni ssekkeɣ awem-dd Timutiyu, wenni iǧan d mmi iɛizzen d amtiqqi di SIDI, wenni kenniw i ɣa issfekkaren ibriden inu i iǧan di Lmasiḥ, am mammec ten sseřmadeɣ di marra timesmunin.

18 Maca ca zzaywem aqa ttneffaxen axmi necc war ɣarwem ttiwiḍiɣ.

19 Maca mařa ixs SIDI ad ɣarwem dd-aseɣ deɣya. Xenni war ttexseɣ zeɛma ad ssneɣ awařen n yinni issgeɛɛden ixef nsen, maca jjehd nsen. ^■   20 Minzi Tageldit n AREBBI war teǧi ca deg wawařen, maca di jjehd. ^■   21 Min texsem? Ma ad ɣarwem dd-aseɣ s weɛmud niɣ s tayri d arruḥ n temhint?