1 Řexxu necc Bulus simant inu, zawgeɣ kenniw s temhint d řeḍrafet n Lmasiḥ, necc d wenni iǧan d amedřuř xmi ḥḍareɣ, maca xmi i ɣa ɣabeɣ aqa ayi s teryast. 2 Maca ttzawageɣ kenniw, xmi ɣarwem dd ɣa yaseɣ, nhřa ma ad iřiɣ s teryast nni ḥessbeɣ aqa-tt ɣari, maḥend ad mmɛarriɣ ak-d inni iḥessben aqa neccin neddar di ddnub n arrimet.

3 Minzi waxxa neggur di arrimet, war nettmenɣi ca ɛlaḥsab arrimet tamednubt, 4 s minzi řesnaḥ n umenɣi nneɣ war ǧin zi arrimet tamednubt, maca zi jjehd n AREBBI, u zzayes i ntarra lburjat iɣewwɣen sadu afus nneɣ. ^■   5 ḥima ad nareyter ixarriṣen d marra řuɛřa igeɛɛden x tussna n AREBBI uca ad nḥebbes marra taxarreṣt i ṭṭaɛet n Lmasiḥ, 6 uca nekkar maḥend ad nentaqem inni war iṭṭiɛen xmi i ɣa tiři ṭṭaɛet nwem tekmeř.

7 Ma txezzarem ɣar tmesřayin s wudem? Mařa ḥed ittiqq deg ixef nnes belli netta n Lmasiḥ, xenni ad ixarreṣ ɛawed, belli amecnaw netta n Lmasiḥ amenni ɛawed neccin n Lmasiḥ i neǧa. 8 Maɛlik necc mařa ssemɣareɣ s cwayt n ufeyyeḍ ktar di ttesriḥ nneɣ tenni d ayi iwca Siditneɣ, xenni ad yiři nehřa ma ad sseḍḥiɣ, maɣar Netta iwca aneɣ tt i řebni nwem, war iǧi i wareddeǧ nwem, 9 maca ssbeɛɛdeɣ aya, ḥima war ittɣiř ca n ijj aqa xseɣ ad kenniw ssiggʷedeɣ s tebrat inu.

10 Minzi aqa din inni iqqaren: “Tibratin nnes qesḥent jehdent, maca řḥaḍar n bnadem s arrimet iheyyef uca awařen nnes ttwaseḥqaren.”

11 Inni issawařen ammu ejj i-ten ad ɛeqřen, aqa, am mammec neǧa neccin deg wawař s tebratin mařa war neḥḍar, ammu i neǧa s tmegga nneɣ xmi i ɣa neḥḍar.

12 Minzi war nezɛim ca ad neḥseb niɣ ad nessemqudda ixef nneɣ ak-d ca n yinni issemɣaran ixef nsen, maɣar umi ɛbaren nitni ixef nsen s yixef nsen, aqa nitni war fhimen walu.^■  

13 Maca neccin war nessemɣari ca barra i řeɛbar, maca ɛlaḥsab řeɛbar n wazzay i d aneɣ iwca AREBBI, ḥima ad ɣarwem dd-naweḍ. ^■  

14 Minzi war iǧi amecnaw mammec war ɣarwem dd-niweḍ, minzi aqa niweḍ-dd ɣarwem s Řexbar Aṣebḥan n Lmasiḥ.

15 Aqa war nessemɣar ca am nekka sennej i řeɛbar s řexdayem n inneɣni, maca nessitim, umi imeqqar l’iman nwem, ad nettwawesseɛ aṭṭas zzaywem di ttasiɛ nneɣ,

16 ḥima xenni ad nbarreḥ s Řexbar Aṣebḥan deg imucan aɣirin xawem, ḥima war nessemɣari ca x tesɣart n inneɣni, min ggin nitni qbeř.

17 Maca wi ixsen ad issemɣar, ad issemɣar di SIDI. ^■  

18 S minzi war iǧi wenni iweṣṣan x yixef nnes, maca wenni xas iweṣṣa SIDI, aqa d wenni ittwafen d amqeǧeb. ^■