1 Awarni řami ɛdun arbeɛṭac n iseggʷusa, ruḥeɣ ɛawed ɣar Urcalim ak-d Barnaba uca iwyeɣ akidi ɛawed Titus. ^■   2 Maca tuɣa ruḥeɣ ɛlaḥsab ijj n usargeb n Arebbi u mřeɣ asen Řexbar Aṣebḥan i ttbarrḥeɣ jar řegnus, i yenni ɣar iǧa uweqqar weḥḥedsen, ḥima war ttizzřeɣ niɣ ad azzřeɣ baṭeř. ^■   3 Ɛawed Titus wenni tuɣa akidi, waxxa netta d Aramiyu, war xas ggen s uɣiř maḥend ad ittwaxten. ^■   4 Maca minzi udfen-dd awmaten issxarriqen ɣar aneɣ ḥima ad cekkmen x tiřelli nneɣ tenni ɣar aneɣ di Yeccu Lmasiḥ, ḥima ad aneɣ ggen d isemɣan, ^■   5 aqa neccin war d asen nwaḍeɛ uřa d ict n tzeḥziḥt i řeḥṣaret nsen, ḥima tidett n Řexbar Aṣebḥan ad teqqim akidwem.

6 Maca inni tuɣa ittbanen d ca jar asen, - min ma ɛnan war d ayi icqi, minzi AREBBI war ikessi s tifras n bnadem - , aqa war xafi nnan walu. ^■   7 S řɛeks, umi ẓrin belli ttkellfeɣ x Řexbar Aṣebḥan i yenni břa axtan, am mammec ittkellef Buṭrus x Řexbar Aṣebḥan i yenni s wextan, 8 - minzi wenni iɛarrnen Buṭrus di řxedmet nnes am rrasul jar inni ixetnen, iɛarren ayi ɛawed ḥima ad ggeɣ řxedmet n rrasul jar řegnus - ^■   9 uca umi Yaɛqub d Kifa d Yuḥanna inni ittwaḥesben d imɣaren ẓrin arḍa i d ayi immewcen, wcin aneɣ afus n tmunt i necc d Barnaba, ḥima ad nraḥ ɣar řegnus uca nitni ɣar yenni s wextan.

10 Tuɣa ittxeṣṣa aneɣ ad nfekkar deg imezřaḍ waha uca xenni cḍareɣ ɛawed maḥend ad ggeɣ man aya. ^■  

11 Maca umi dd-yusa Buṭrus ɣar Antiyuxiya, mmɛařeɣ akides s bṭayṭay, minzi nitni ufin dayes řɛib.

12 Minzi qbeř ma dd-usin ca zi Yaɛqub, tuɣa ittett ak-d yenni zi řegnus, maca awarni ma usin-dd nitni, iɛqeb uca issbeɛɛed ixef nnes zzaysen, minzi tuɣa iggʷed zeg inni s wextan.

13 Uřa d Udayen inneɣni ḍfaren t di nnifaq nnes, amenni ɛawed Barnaba, aqa nedhen t di nnifaq nsen.

14 Maca umi ẓriɣ belli war gguren ca nican x webrid n tidett n Řexbar Aṣebḥan, nniɣ i Buṭrus zzat i marra: “Mařa cek, am teǧid d Uday, teddared am ijj n Aramiyu, war iǧi amecnaw Uday, mayemmi teggid aɣiř x yenni zi řegnus ḥima ad ddaren am Wudayen? ^■  

15 Aqa neccin nettwaxřeq d Udayen, war neǧi d imednab zi řegnus,

16 maca nessen belli bnadem war ittwasegged ca s řexdayem n Ccariɛa, maca s l’iman di Yeccu Lmasiḥ, aqa numen uřa d neccin belli ad nettwasegged s l’iman di Lmasiḥ, war iǧi s řexdayem n Ccariɛa, minzi s řexdayem n Ccariɛa uřa d ijj n bnadem war ittwaseggad ca ɛemmarṣ. ^■  

17 Maca mařa narzu ad nettwasegged di Lmasiḥ, nufa belli neccin ɛawed d imednab, s uyenni ma Yeccu Lmasiḥ d amsexxar n ddnub? Wayyaw!

18 Minzi mařa bniɣ ɛawed min hedmeɣ, ad ssecneɣ belli necc s ixef inu d amednub,

19 minzi s Ccariɛa aqa necc mmuteɣ i Ccariɛa, ḥima ad ddareɣ i AREBBI. ^■   20 Aqa ttwaṣellbeɣ ak-d Lmasiḥ uca zi ssa d tsawent war qqimeɣ ddareɣ ɛad necc, maca Lmasiḥ iddar dayi. Uca min ddareɣ řexxu ɛad di arrimet, ddareɣ s l’iman n Mmis n AREBBI wenni d aneɣ ittexsen u iwca ixef nnes xaneɣ. ^■   21 War beḍřeɣ ca arḍa n AREBBI, minzi mařa tuɣa tasegda s Ccariɛa, ad yiři immut Lmasiḥ x walu.” ^■