1 Iřim d imeḍfaren n AREBBI am tarwa iɛizzen, 2 uyurem di tayri amecnaw uřa d Lmasiḥ tuɣa ittexs aneɣ, iwca ixef nnes xaneɣ d tawhibt d tɣarṣt i AREBBI, aqa-tt d ict n řefwaḥet taṣebḥant. ^■  

3 Maca x farq-ccɣeř d marra řexmej d ṭṭmeɛ, war xas ittiři bu wawař am mammec icuwwar i imqeddasen, - ^■   4 uřa x řhard issbehdřen niɣ x wawařen ixwan niɣ x tqeṣṣart, timesřayin aya war neffɛent di walu - , maca mammec nneɣni ittxeṣṣa aqadi. 5 Minzi tessnem aqa uřa d ijj wenni itteggen farq-ccɣeř, niɣ amexmuj niɣ aḍemmaɛ, aqa wanita iɛebbed l’aṣnam, war ɣares teǧi tesɣart di tgeldit n Lmasiḥ u n AREBBI. ^■  

6 War ttejjim uřa d ijjen ad kenniw iɣekkwi s wawařen ixwan, aqa zi man aya dd-ihekkwa weɣḍab n AREBBI x tarwa n řmuɛṣiyyet. ^■   7 War carrcem ca akidsen! 8 Minzi zic tuɣa kenniw d taǧest, maca aqa řexxu kenniw d tafawt di Siditneɣ. S uyenni uyurem am tarwa n tfawt, ^■   9 minzi řɣiǧet n Tfawt tᵉttiři di marra tcuni d tsegda d tidett. ^■  

10 Farzem min ɣa yarḍan Siditneɣ.

11 War carrcem ca di řexdayem tibarcanin i war dd-ittiwyen řɣiǧet deg yixef nsent, maca webbxem ten. ^■  

12 Minzi min tteggen di tnuffra, aqa-t d nnɛi i war tzemmared uřa ad t tɛawded.

13 Marra man aya ad ittwawebbex u ad ittwassargeb s tfawt, u marra min dd-issbanen, aqa-tt d tafawt. ^■  

14 Aqa mayemmi qqaren:

“Faq cek, a bu yiḍeṣ.

Kkar-dd zi taddart n imettinen,

uca ad xak igg Lmasiḥ tafawt.” ^■  

15 Ḥḍam ad tuyurem s uweqqar, maci am ibuhařiyyen maca am imiɣisen, ^■  

16 inni i ɣa yawyen ariqqi i řweqt-a, minzi ussan aya d iɛeffanen. ^■  

17 Xenni war ttiřim d ibuhařiyyen, maca fehmem min ixs AREBBI. ^■  

18 War seccaram ca s binu i ittawyen ɣar řeqjaḥet, maca iřim tɛemmarem s Arruḥ. ^■  

19 Siwřem jar awem s izehhiden d izřan n uṣebbeḥ d izřan n Arruḥ, ɣennjem deg wuřawen nwem i SIDI. ^■   20 Qadam řebda AREBBI Tababat i kuř ijjen deg Yisem n Siditneɣ Yeccu Lmasiḥ. ^■   21 Swaḍɛem ixef nwem i wayawya di tayri n Lmasiḥ.

22 A timɣarin, waḍḍɛent i yeryazen nkent am mammec tᵉttwaḍḍɛent i Siditneɣ, ^■   23 minzi aryaz aqa d azeǧif n temɣart amecnaw uřa d Lmasiḥ i yeǧan d Azeǧif n Tmesmunt, d Řɛunṣar n Tudart n Arrimet. ^■   24 Amecnaw tamesmunt i yeǧan adu i Lmasiḥ, amenni ɛawed timɣarin i iǧan adu i yeryazen nsent di marra.

25 A iryazen, xsem timɣarin nwem am mammec tuɣa ixs Lmasiḥ Tamesmunt uca isellem Ixef nnes di ṭṭweɛ nnes, ^■   26 ḥima ad tt yarr d tamqeddast u ad as issizdeg s usird n waman u s Wawař. ^■   27 Netta ad igg tamesmunt qibač i yixef nnes s uɛuǧi břa abeqqiḍ niɣ acebriq, maca ad tiři d tamqeddast u břa řɛib. ^■  

28 Ammu ittxeṣṣa ad xsen yeryazen timɣarin nsen am arrimet nsen. Aqa wenni ittexsen tamɣart nnes, aqa ittexs ixef nnes. 29 Uřa d ijj war icarh ddat nnes, maca issecca t, ittḥawař xas am mammec ittḥawař ɛawed Lmasiḥ x Tmesmunt. 30 minzi neccin d ixfawen n Arrimet nnes, n weysum nnes u n iɣsan nnes. ^■  

31 S uyenni aryaz ad yejj yemmas d babas maḥend ad iqqen ɣar temɣart nnes, ad iřin s tnayen idsen d ict n arrimet. ^■   32 Ssirr-a d ameqqran, maca necc qqareɣ t zi jjihet n Lmasiḥ d Tmesmunt. 33 Waxxa amenni ittxeṣṣa i kuř ijj zzaywem ad ixs tamɣart nnes am mammec ixef nnes, maca tamɣart ad tweqqar aryaz.