1 Am umeḥbus di Siditneɣ, ziyyareɣ xawem, ḥima ad tuyurem am mammec dd-tusa ak-d třaɣit i zi tᵉttwařaɣam, ^■   2 s marra awaḍeɛ n buḥbeř, s temhint u s ttasiɛ n řxaḍar, aqa ad tqebbřem ijj wenneɣni di tayri, ^■   3 ad tecḍarem ad tmunem d ijj di Arruḥ s tseɣwin n řehna, 4 maḥend ad tiřim d ict n Arrimet d ijj n Arruḥ am mammec umi tᵉttwařaɣam deg usitem n třaɣit nwem d ijjen. 5 Maɣar SIDI d Ijjen, d l’iman d ijjen uřa d aseɣḍeṣ d ijjen, ^■   6 u AREBBI d Ijjen, Tababat n marra u x marra u ak-d marra u dayneɣ marra.

7 Maca arḍa immewc aneɣ marra idneɣ ɛlaḥsab min d aneɣ iwca Lmasiḥ. ^■   8 S uyenni qqaren:

“Am igeɛɛed ɣar řuɛřa, iḥebbes řeḥbes, iwca timewca i iwdan.” ^■  

9 Min iɛna ɛawed wawař-a, aqa Netta igeɛɛed sennej, mɣir aqa Netta ɣar umezwar tuɣa ihwa-dd ɣar ṭṭrufa n temmurt n wadday qaɛ?! ^■  

10 Wenni tuɣa dd-ihwan, Netta ɛawed d Wenni tuɣa igeɛɛden sennej i marra ijenwan, ḥima ad issiweḍ marra ɣar řekmařet.

11 Netta yarra ca d rrusul, ca d inabiyyen, ca d imbeccaren, ca d imeksawen u ca d imseřmaden, ^□  ■  

12 ḥima ad zzaysen ttwakemmřen imqeddasen i řxedmet n tsexxart, i řebni n Arrimet n Lmasiḥ, ^■  

13 ař i ɣa naweḍ marra ɣar umuni n l’iman d ijj u n tussna n Mmis n AREBBI, uřa d ijj n bnadem ikmeř di ṣṣifet tmun n Lmasiḥ.

14 Ittxeṣṣa war nettiři am iḥenjiren inni ittwaɛarran zi ṭṭarf ɣar wenneɣni s kuř asemmiḍ n useřmed uca dewřen ggʷejen s yenni yarezzun ad ɣarren s teḥraymect nsen. ^■  

15 Beddem nican di tayri nneɣ, maḥend ad negma di marra i Lmasiḥ wenni d azeǧif, aqa-t d Lmasiḥ, ^■  

16 Zzayes tennejru u tᵉttwasmun Arrimet marra s marra řemfaṣeř ɛlaḥsab řqedd i immewcen i mkuř aɣezdis i tyumi n Arrimet ař ɣa ittwakemmeř řebni nnes di tayri. ^■  

17 Necc qqareɣ u cehhdeɣ man aya di SIDI, ḥima war teggurem ɛad amecnaw mammec uyuren řegnus inneɣni, inni iddaren di řbaṭeř n ixarriṣen nsen, ^■  

18 barcnen di řeɛqeř nsen u ggʷejen x Tudart n AREBBI, minzi war daysen bu tussna u x ssibbet n tqubbanect i daysen iǧan u x ssibbet n řeqsaḥet n wuř nsen. ^■  

19 Nitni dewřen war tticin ca, sellmen ixef nsen i ufucceḥ, ḥima ad ggen marra řexmej s meẓri. 20 Maca war iǧi ammu i tessnem Lmasiḥ, 21 řami zeɛma kenniw tuɣa tesřam ɣares uca třemdem zzayes ɛlaḥsab tidett i iǧan di Yeccu, 22 Maca ittxeṣṣa ad tenḍarem ticři nwem n zic, ad tejjem bnadem aqdim i ittwasexsaren s nnecwat iɣeccen. ^■   23 Ttwaɛedřem zi jdid s arruḥ n řeɛqeř nwem. 24 Arḍem bnadem n jdid i dd-ittwaxeřqen di AREBBI di tsegda u di tuqeddsi n tidett. ^■  

25 S uyenni jjem ixarriqen, siwřem tidett kuř ijj ak-d umqarreb nnes, minzi neccin d ixfawen ijjen i wenneɣni. ^■   26 Xeyyqem, maca war tteggem ca ddnub, war tejji ad teɣri tfuct x uxeyyeq nwem. ^■   27 War tticem ca amcan i ibřis. ^■   28 War tejji wenni ittacaren ad yacar ɛad, maca ḥsen ad yarber s ifassen nnes maḥend ad issuffeɣ ict d řḥajjet d taṣebḥant maḥend ad tt iwc i yenni iḥdajen. ^■   29 War dd-ittekk ca wawař ixemjen zeg uqemmum nwem, maca min iṣebḥen i řebni am mammec ittxeṣṣa, ḥima ad tessiwḍem arḍa i yenni i ɣa isřan. ^■   30 War ttessffugmem ca Arruḥ Iqeddsen n AREBBI i zi tᵉttwaṭebɛem ař ass n weṣřaḥ. ^■   31 Jjem ad zzaywem kksen marra tarzugi d lɣaḍab d uṣeddeɛ d uceqqef ak-d marra tuɛeffna i dd-ittasen ak-d man aya. ^■   32 Iřim tḍarfem u ggem řeḥnunect deg wayawa. Samḥem i wayawya amecnaw AREBBI ɛawed aqa iɣfar aneɣ di Lmasiḥ. ^■