1 S uyenni necc, Bulus, aqa ayi d ameḥbus n Yeccu Lmasiḥ, i kenniw inni iǧan zi řegnus, ^■   2 mařa zeɛma aqa tesřam x tsexxart n arḍa n AREBBI i d ayi immewcen jarawem, ^■   3 belli ittwassargeb ayi-dd ssirr-a, am izzareɣ uriɣ awem-dd s drus. ^■   4 Xmi i ɣa tɣarem man aya, tzemmarem ad tfehmem řefhamet inu n ssirr n Lmasiḥ, 5 wenni war ittwasargeb ca di tarwa n bnadem di řecyur n zic, am mammec ittwaɛarra xas řexxu s Arruḥ i rrusul imqeddasen nnes u i inabiyyen nnes, ^□  ■   6 aḥeqqa inni zi řegnus ad iřin d iwriten akidsen, u iɣezdisen n Arrimet nnes u n lwaɛd nni dayes immewcen s Řexbar Aṣebḥan, ^□   7 i zi dewřeɣ d amsexxar ɛlaḥsab tawhibt n arḍa n AREBBI i d ayi immewcen ɛlaḥsab jjehd nnes i dayi ixeddmen. ^■   8 Aqa immewc ayi arḍa aya, i necc d amuqřiř qaɛ jar marra imqeddasen, ḥima ad barrḥeɣ s Řexbar Aṣebḥan, iwa agřa n Lmasiḥ i war nzemmar ad nefhem, ^■   9 u ḥima ad ssuffɣeɣ ɣar tfawt i marra min ixs ad yini uwekkeř n ssirr i tuɣa inuffaren deg ikuden n zic di AREBBI, wenni i dd-ixeřqen kuřci, ^■  

10 ḥima tiɣit n AREBBI ak-d waṭṭas n iɣezdisen nnes ad tiři tᵉttwasnen s tmesmunt ɣar ṣṣulaṭat d řḥukkam deg ujenna, ^■  

11 min tuɣa issewjed Netta qbeř zi řebda uca ikemmeř i-t di Siditneɣ Yeccu Lmasiḥ,

12 wenni dayes aqa ɣarneɣ taryast d wadaf ak-d ttiqet s l’iman nnes. ^■  

13 S uyenni ttzawgeɣ kenniw maḥend war ttiḥřem ca s řemḥayem inu di ṭṭweɛ nwem. Aqa man aya i uɛuǧi i kenniw. ^■  

14 Ad adareɣ s ifadden inu zzat i Tbabat n Siditneɣ Yeccu Lmasiḥ

15 i Wenni umi semman kuř ijj n tbabat i iǧan deg ijenwan d temmurt,

16 ḥima ad awem iwc ɛlaḥsab agřa n uɛuǧi nnes u ḥima ad tᵉttwasjehdem s jjehd s Arruḥ nnes di bnadem n daxeř, ^■  

17 ḥima Lmasiḥ ad izdeɣ deg wuřawen nwem s l’iman u s tayri, x minni teccatem iẓewran u ad tesmetnen dsas nwem, ^■  

18 ḥima ad tzemmarem ad tfehmem ak-d marra imqeddasen min teɛna tiru d tuzzeggart d řuɛřa d řaǧaɣ,

19 u ad tessnem ɛawed řemɣaret n tussna n tayri n Lmasiḥ, uca ad tiřim tɛemmarem s marra aɛemmar n AREBBI.

20 Maca i Netta umi ɣares tizemmar ifeyyḍen ḥima ad igg di ṭṭweɛ nneɣ sennej i min nettᵉttar niɣ nettxarreṣ, ɛlaḥsab jjehd nnes i ixeddmen dayneɣ, ^■   21 i Netta ikkar as-dd uɛuǧi di Tmesmunt s Yeccu Lmasiḥ, di marra řecyur i řebda qaɛ. Amin. ^□