1 Uřa d kenniw, tuɣa temmutem s ddnub nwem u s tubbuheřya nwem ^■   2 min di tuɣa tuyurem ɛlaḥsab tudart n kuř ass n ddunect-a, ɛlaḥsab azeǧif n ṣṣulṭa x wazzay n řeɛwin, u n ṣṣulṭa x arruḥ i ixeddmen di tarwa n řmuɛṣiyyet. ^■   3 Tuɣa necɣeř ɛawed di řexdayem nni, umi neḍfar nnecwat n arrimet tamednubt nneɣ, negga min ixs arrimet tamednubt d nneyyet nneɣ, u tuɣa aneɣ d tarwa n weɣḍab qaɛ amecnaw inneɣni.

4 Maca AREBBI iccur s arreḥmet s tayri tameqqrant nnes i zi xaneɣ iɛizz. 5 Řami tuɣa aneɣ ɛad d imettinen deg ixeṭṭan, aqa yarr aneɣ-dd ɣar tudart ak-d Lmasiḥ u s arḍa nnes issenjem aneɣ, ^■   6 u issnekkar aneɣ-dd uca issɣima aneɣ ak-d Yixef nnes deg ujenna di Yeccu Lmasiḥ, 7 ḥima ad isscen afeyyeḍ n wagřa n arḍa nnes d tcuni nnes deg ikuden i dd ɣa yasen, wenni xaneɣ dd-yusin s Yeccu Lmasiḥ. 8 Minzi s arḍa nettwasenjem, s l’iman, war iǧi zzaywem, aqa-tt d tamewci n AREBBI, ^□  ■   9 war teǧi s řxedmet, maḥend war ittuff uřa d ijj. ^■  

10 Maɣar neccin nettwagg zzayes, nettwaxřeq-dd di Yeccu Lmasiḥ ḥima ad negg řexdayem tiṣebḥanin nni d aneɣ issewjed AREBBI qbeř maḥend ad nuyur daysent. ^■  

11 S uyenni ɛeqřem, aqa zic tuɣa kenniw d řegnus ɛlaḥsab jjadira n arrimet, tᵉttwasemmam ‘nbřa axtan’ zeg inni tuɣa s wextan nni iǧan d řxedmet n ifassen deg weysum.

12 Řexdenni tuɣa kenniw tebḍam x Lmasiḥ, tᵉttwaqessem zi řeḥkamet n Israil, aqa teggʷejem am ibarraniyyen x Řɛahd n lwaɛd. War daywem tuɣi usitem, war ɣarwem tuɣi AREBBI di ddunect. ^■  

13 Maca řexxu, di Yeccu Lmasiḥ, aqa kenniw inni tuɣa iggʷejen, aqa řexxu tudsem-dd s idammen n Lmasiḥ.

14 Maɣar Netta d řehna nneɣ am dd-yarra tnayen nni ɣar yijj, aqa Netta ihdem aɣbar n řeqwar wenni tuɣa ten ibḍan. ^■  

15 uca xenni ibḍeř deg weysum n arrimet nnes řeɛdawet, tenni d Ccariɛa s řumur d tweṣṣa nnes, ḥima ad dd-ixřeq deg ixef nnes tnayen nni ɣar ijj n bnadem n jdid, am ittegg řehna.

16 Aqa netta isseṣřeḥ tnayen nni ak-d AREBBI deg ict n arrimet u inɣa řeɛdawet s ṣṣalib nnes.

17 Yusa-dd ḥima ad ibarreḥ s řehna i yenni i tuɣa iggʷejen u i yenni i tuɣa yudsen, ^■  

18 minzi zzayes nzemmar ad nadef s tnayen idneɣ s yijj n Arruḥ ɣar Tbabat. ^■  

19 Ammu kenniw war teǧim d ibarraniyyen uřa d imeɛzab, maca kenniw d tarwa n tendint n Umqeddas d aytbab n taddart n AREBBI. ^■   20 Tᵉttwabnam x dsas n rrusul d inabiyyen, uca aẓru n teɣmart aqa-t d Yeccu Lmasiḥ. ^□  ■   21 Zzayes i ɣa ittwabni řebni marra uca ad imɣar ad idweř d ict n Zzawect Iqeddsen di SIDI, ^■   22 am zzayes i ɣa tᵉttwabnam uřa d kenniw, ad tiřim d tazeddiɣt n AREBBI di Arruḥ.