1 S uyenni, a aytma, farḥem di Siditneɣ. War xafi yewɛar ad awem ariɣ timesřayin-a twařa nneɣnit uca ɣarwem daysent řaman. ^■  

2 Ḥḍam ixef nwem zeg yiṭan, ḥḍam zeg iɛeffanen, ḥḍam zeg inni iqeṭṭɛen aysum. ^■   3 Minzi neccin d axtan, neccin inni ittsexxaren i AREBBI s Arruḥ, inni issemɣaren di Yeccu Lmasiḥ uca war ttiqqen ca di min neǧa ɛlaḥṣab ṭṭbiɛet nneɣ tamednubt, ^■  

4 Necc zemmareɣ ad ttiqqeɣ di min ǧiɣ ɛlaḥsab ṭṭbiɛet inu tamednubt, minzi mařa ittɣiř i ḥed ad ittiqq di min iǧa netta ɛlaḥsab ṭṭbiɛet nnes, necc ktar: ^■   5 aqa ayi d amextan zeg wami ɣari tmenya n wussan, zi řgens n Israil, zeg ayt n Binyamin, necc d Aɛibrani zeg Iɛibraniyyen, zi jjihet n Ccariɛa necc d Afarisi, ^■   6 zeg uɣezdis n cḍaret tuɣa darrceɣ x Tmesmunt n Lmasiḥ, zeg uɣezdis n tsegda tenni di Ccariɛa aqa ayi břa řɛib. ^■   7 Maca min tuɣa ɣari arbeḥ, aqa ggiɣ t d taxessart x ssibbet n Lmasiḥ. ^■   8 Necc ggiɣ marra man aya d taxessart zi ssibbet n tussna n Siditneɣ Yeccu Lmasiḥ, wenni di ṭṭweɛ nnes xsareɣ kuřci, ggiɣ t amecnaw afraḍ yurṣuḍen ḥima ad arebḥeɣ Lmasiḥ, ^■   9 maḥend ad ttwafeɣ dayes, war iǧi s tsegda n ixef inu tenni zi Ccariɛa, maca s tenni zi l’iman n Lmasiḥ, aqa-tt d tasegda tenni zi AREBBI s l’iman, ^■  

10 ḥima ammu i ɣa ssneɣ Yeccu d jjehd n tnukra nnes d uɛacar deg uweddeb nnes, u maḥend ad dewřeɣ amecnaw Netta di řmewt nnes, ^■  

11 ḥima s ca n webrid ad awḍeɣ ɣar tnukra zi taddart n imettinen.

12 Necc war ttiwiḍeɣ niɣ ttwakemmřeɣ ɛad, maca yemmareɣ i man aya, ḥima, mařa iɛeddeř, ad ṭṭfeɣ min zi d ayi iṭṭef Yeccu Lmasiḥ.

13 A aytma, war d ayi ittɣiř aqa ṭṭfeɣ t, maca tteggeɣ ict n řḥajjet, ttuɣ min awarni ayi, ad sswiẓẓḍeɣ ixef inu ɣar min din zzati.

14 Ttizzareɣ ɣar lɣaraḍ, ɣar arbeḥ n třaɣit n AREBBI, tenni zi sennej di Yeccu Lmasiḥ. ^■  

15 Ejj inni iwḍen ɣar řekmaret, ad ɣarsen tiři nneyyet-a. Uca mařa ɣarwem nneyyet nneɣni di ca, aqa AREBBI ad awem isscen man aya ɛawed.

16 Maca ař mani ma niweḍ, ejj aneɣ ad nuyur xenni deg webrid d icten s ixariṣṣen nneɣ d ijjen. ^■  

17 Ḍfarem ayi-dd, a aytma, ksim tiweṣṣaf i yenni yuyuren ammu, am mammec ɣarwem d amedya dayneɣ. ^■  

18 Minzi aqa din aṭṭas inni yuyuren war iǧi amenni, nniɣ awem tt aṭṭas n imuren, uca řexxu ad t iniɣ s imeṭṭawen, aqa aten d řɛedyan n ṣṣalib n Lmasiḥ. ^■  

19 Aneggaru nsen d ahellek, arebbi nsen d aɛeddis nsen uca aɛuǧi nsen d abehdeř nsen, u nneyyet nsen di tmesřayin n ddunect. 20 Tasexxart nneɣ deg ujenna i zzayes nettraja ɛawed Řɛunṣar nneɣ n Tudart, Siditneɣ Yeccu Lmasiḥ. ^■   21 wenni i ɣa ibeddřen arrimet n temmurt, ḥima ad tedweř amecnaw arrimet n uɛuǧi nnes, x řeḥsab n jjehd i zi i ittwagg marra min iǧan sadu Netta. ^■