4
1 Iwa, a aytma iɛizzen inni i weḥḥceɣ, kenniw inni d řefraḥet inu d ttaj inu, beddem nican di Siditneɣ, a imɛizzen! ■ 2 Necc ttcejjɛeɣ Uwudiya d Sintici maḥend ad imun array nsent di Siditneɣ.
3 Ttᵉttareɣ ɛawed zzayek, a amɛacar amtiqqi inu, ad tɛawned inni xeddmen akidi x ssibbet n tbarreḥt n Řexbar Aṣebḥan, ak-d Klimens d imsexxaren inneɣni inni akidi, inni ismawen nsen aqa-yen deg Wedlis n Tudart. ■
4 Farḥem řebda di Siditneɣ, u necc qqareɣ ɛawed: Farḥem! ■ 5 Ad yiři uwaḍeɛ nwem ittwassen ɣar iwdan marra. Siditneɣ aqa yudes. ■ 6 War kessim ca s wemnus x walu, maca ad yiři marra min tᵉttarem řebda ittwassen ɣar AREBBI s tẓaǧit d tkessit n řmeɛruf ak-d uqadi. ■ 7 Uca řehna n AREBBI i iɛdun marra řefhamet ad iḥḍa uřawen d ixarriṣen nwem di Yeccu Lmasiḥ. ■
8 Ɣar uneggar, a aytma, marra min iǧan d tidett, marra min iqquren, marra min iseggden, marra min izdigen, marra min iɛizzen, marra min ɣar iǧa řḥess aṣebḥan, u marra min ɣa isdaheǧen ccan d usemɣar, xarṣem dayes. ■ 9 Min teɣrim u tqebřem, min tesřim u teẓrim dayi, ggem tt, uca AREBBI n řehna ad kiwem yiři!
Awař d useǧem aneggaru
10 Aqa farḥeɣ aṭṭas di Siditneɣ umi asḥissef nwem akidi ittwařeqqem, am mammec tuɣa daywem amnus řebda, maca war tufim ca tawwart maḥend ad teggem ca. ■
11 War tt nniɣ, minzi necc ḥwajeɣ ca, minzi řemdeɣ ad qenɛeɣ mammec ma dd-tusa. ■
12 Necc zemmareɣ ad qewseɣ uca aqa ssneɣ umi qqaren afeyyeḍ. Mani mma u di marra aqa řemdeɣ, di tyawant, di řaẓ uřa di tyawant d řeɣben. ■
13 Qeddeɣ qaɛ zi Lmasiḥ wenni d ayi iwcin jjehd.
14 Waxxa amenni mliḥ řami d ayi tewcim afus di řmeḥnet inu.
15 Tessnem ɛawed simant nwem, a Ifilippiyyen, belli ɣar umezwaru n tbarreḥt n Řexbar Aṣebḥan umi dd-ffɣeɣ zi Makiduniya, uřa d ict n tmesmunt war teggi akidi řeḥsab x min wcin d min ksin, mɣir tenni nwem waha. ■
16 Minzi ɛawed di Tissalunika tessekkem ayi-dd min d ayi ittxeṣṣan, ijj n umur u ijj n umur nneɣni.
17 War arezzuɣ timewca, maca arezzuɣ řɣiǧet tenni iwessɛen aṭṭas di řeḥsab nwem.
18 Necc ṭṭfeɣ kuřci u ɣari kuřci s zzyada, aqa jjiwneɣ. Necc ksiɣ marra min d ayi i-dd tessekkem s ufus n Ipafruditus: ict n řefwaḥet ittfuḥen d taɣarṣt yarḍan qibač i AREBBI. ■
19 Maca AREBBI inu ad issyiwen marra řeɣben nwem ɛlaḥsab agřa nnes deg uɛuǧi i iǧan di Yeccu Lmasiḥ. 20 Aqa i AREBBI, Babatneɣ, ad ɣares yiři uɛuǧi i řebda qaɛ. Amin.
21 Seǧmem x kuř imqeddasen di Yeccu Lmasiḥ s řehna.
Awmaten inni akidi ttseǧamen xawem s řehna.
22 Aqa marra imqeddasen ttseǧamen xawem s řehna, amezwaru inni iǧan zi taddart n qayṣar.
23 Arḍa n Siditneɣ Yeccu Lmasiḥ ad yiři akidwem marra. Amin.