1 A imɛizzen, ařami ɣarneɣ lwuɛud-a, ejj aneɣ ad nessizdeg ixef nneɣ zi marra řexmej n arrimet u n arruḥ, u ad nqeddes ixef nneɣ zi tiggʷudi n AREBBI.

2 Qebřem aneɣ, a aytma, uřa d ijj war dayes neggi řɣar, uřa d ijj war t nɣecc, uřa d ijj war zzayes nestenfeɛ. 3 Min zi izzareɣ nniɣ, war t qqareɣ ḥima ad xawem ḥekmeɣ, aqa kenniw deg wuřawen nneɣ maḥend ad nemmet jmiɛ uca ad neddar jmiɛ. ^■   4 Taryast inu qibač i kenniw temɣar uca asemɣar inu xawem imɣar. Aqa ayi ccureɣ s ufewwej, aqa řefraḥet tfeyyeḍ dayi aṭṭas di kuřci řemḥayem inu. ^■  

5 Minzi zeg wami dd-nusa ɣar Makiduniya, arrimet nneɣ war tufi ca arraḥet, maca tuɣa nessḥissif zi marra iɣezdisen, zi barra aqa din imcubbcen, zi daxeř aqa din tiggʷudi. ^■   6 Maca AREBBI, wenni issfewwajen x imwaḍɛen, issfewwej-dd xaneɣ s twasit n Titus, ^■   7 war iǧi s twasit nnes waha, maca ɛawed s ufewwej i zi tuɣa ittwasfewwej zzaywem, maɣar issargeb aneɣ x tayri nwem d wecḍan nwem d cḍaret nwem xaneɣ. Umi sřiɣ aya, farḥeɣ aṭṭas.

8 Minzi waxxa ssfugmeɣ kenniw s ict n tebrat, war ndimeɣ ca, waxxa necc ttwařiɣ aqa tabrat nni tessfugem i kenniw i ict n tsaɛɛet. 9 Maca farḥeɣ aṭṭas, war iǧi řami tᵉttwasfugmem, maca umi afugem nwem yarra kenniw ɣar ttubet, minzi afugem nwem yusa-dd zi AREBBI, ařami uřa d ict n txessart war kenniw třeqqef ca zzayneɣ di ca n tmesřact.

10 Minzi afugem nni iǧan di ṭṭweɛ n AREBBI, ineddeh ɣar ttubet n buḥbeř u ɣar wedwař i Tudart, maca afugem n ddunect ittawi ɣar řmewt. ^■  

11 Maca xzar, aqa d man aya imsar minzi tᵉttwassffugmen di ṭṭweɛ n AREBBI. Mecḥař i kenniw ittejjan n cḍaret d udafeɛ n yixef nwem d warzam n uqemmum d tiggʷudi d tayri d tusmi d uwebbex! Di min di ma iffeɣ-dd aqa kenniw s ixef nwem d imezdag di tmesřact-a.

12 Min d awem uriɣ, war iǧi x ssibbet n wenni ixeṭṭan niɣ x ssibbet n wenni umi i di ittwagg řɛib, maca ḥima ad tban jar awem cḍaret nwem i neccin zzat i wudem n AREBBI.

13 S uyenni aqa nettwasfewwej u s ufewwej nneɣ aqa nfarreḥ s ufeyyeḍ ktar zi řefraḥet n Titus umi arruḥ nnes ittwasareyyeḥ akidwem marra.

14 Minzi di min di ssemɣareɣ daywem ɣares, aqa war ttwasḥecmeɣ ca, maɣar am d awem nenna tidett kuřci, ammu ɛawed iban-dd asemɣar nneɣ ɣar Titus aqa tbedd x tidett.

15 Aqa řeḥnunect nnes xawem temmarni aṭṭas umi ittfekkar di ṭṭaɛet nwem marra, aqa tqebřem t s tiggʷudi d tarjijit.

16 Farḥeɣ umi zemmareɣ ad xawem ttecřeɣ di min di mma.