6
1 Aqa neccin, am imɛawnen, nzaweg kenniw ḥima arḍa n AREBBI i tᵉṭṭfem, war daywem ittwassbeṭṭeř ca, ■ 2 minzi inna: “Di řweqt n arḍa sřiɣ ac,
uca deg wass n usenjem ɛawneɣ cek!”
Xzar, aqa da řexxu d řweqt n arḍa, xzar, aqa da řexxu d ass n usenjem. ■
Tamara i dd-ikkin x rrasul Bulus
3 Mayemmi i ɣa tewced ttasiɛ i ca n yijjen di ca maḥend ad zzayes inqarḍ? Ittxeṣṣa war din ittiři ca n řɛib di tsexxart nneɣ, ■ 4 maca di marra nettweṣṣa ixef nneɣ amecnaw imsexxaren n AREBBI: deg waṭṭas n ṣṣbar, di řmeḥnet, di řeɣben, di řeḥbusat, ■ 5 sadu tiyyita, di ssnaseř, deg uɣuwweɣ, di tamara, di ǧyaři břa iḍeṣ, deg wussan n uẓummi, 6 di řeṣfayet, di tussna, di ttasiɛ n řxaḍar, di řeḍrafet, di Arruḥ Iqeddsen, di tayri břa nnifaq, 7 s wawař n tidett, di jjehd n AREBBI, s řesnaḥ n tsegda ɣar ufusi d uzeřmaḍ, 8 s uɛuǧi d ddeǧ, s ccenɛet taṣebḥant u s ccenɛet taɛeffant, am iɣeccacen, waxxa amenni d imtiqqan, 9 axmi war nettwissen, waxxa nettwassen, axmi nettmetta, u xzar, aqa neddar, axmi nettwaɛaqeb maca war nettmetti ca, ■
10 axmi neccin neffugem, maca nfarḥ řebda, axmi nezřeḍ, waxxa amenni nettejjar aṭṭas, uca axmi war ɣarneɣ ca, waxxa ɣarneɣ kuřci.
11 Aqemmum nneɣ innurzem i kenniw, a Ikurintiyyen, uř nneɣ imɣar aṭṭas.
12 Kenniw war tᵉttwaḥṣarem zzayneɣ, maca tᵉttwaḥṣarem s min iǧan di daxeř nwem.
13 Maca řexxu ad ssiwřeɣ axmi ssawařeɣ ak-d iḥenjiren: Arrem ayi-dd s min tᵉttursem u swessɛem tayri nwem i necc! ■
War ttmunem ca deg uzayřu ifarɣen ak-d lkuffar
14 War ttmunem ca deg uzayřu ak-d lkuffar, maɣar man acrac i ɣar teǧa ɣar tsegda ak-d tuɛeffna, u man tamunt i ɣar teǧa i tfawt ak-d taǧest? ■
15 Niɣ, man arwas i di jar Lmasiḥ d cciṭan? Niɣ man tasɣart n řmumen ak-d ukafriw?
16 Niɣ man tasɣunt i din jar Zzawect n AREBBI d ccwaṭen? Aqa kenniw d zzawect n AREBBI iddaren, am mammec inna AREBBI:
“Necc ad zedɣeɣ akidsen uca ad uyureɣ jar asen.
Necc ad iřiɣ d AREBBI nsen, nitni ad iřin d řgens inu. ■
17 S uyenni, ffɣem-dd zi řwest nsen,
bḍam xasen, iqqar SIDI.
War ttḥadam min inegsen,
u Necc ad kenniw qebřeɣ. ■
18 Necc ad awem iřiɣ d Babatwem,
kenniw ad ayi tiřim d iḥenjiren d tḥenjirin,
iqqar SIDI, wenni d Amzemmar x kuřci.” ■