1 Xenni, a aytma, nessargeb i kenniw arḍa n AREBBI i immewcen i tmesmunin di Makiduniya, 2 maɣar umi xasen dd-ikka uqeǧeb imɣar n řmeḥnet nsen, tfeyyeḍ řefraḥet nsen, u umi daysen zzeřḍ imɣaren, yarni ɛad s waṭṭas i wagřa n tecrimet nsen, 3 minzi cehdeɣ, aqa ɛlaḥsab jjehd nsen u ɛad sennej i jjehd nsen, řami ttexsen s wuř nsen, 4 aqa zawgen aneɣ s jjehd maḥend ad carcen di arḍa n tsexxart i imqeddasen. ^■   5 Uca nitni war ggin min tuɣa nessitim waha, maca aqa wcin ixef nsen amezwar i Siditneɣ, xenni uřa i neccin ɛlaḥsab min ixs AREBBI, 6 ařami nzaweg Titus, amecnaw mammec tuɣa ibda qbeř, ḥima ad ikemmeř ɣarwem tecrimet-a n ṣṣdaqi ɛawed. 7 Maca am mammec tfeyyḍem di marra, - di l’iman, deg wawař, di tussna, di marra cḍaret - , u s tayri nneɣ i ɣarwem iǧan, ad tfeyyḍem ɛawed di tecrimet-a n ṣṣdaqi nwem.

8 War ǧiɣ ttumureɣ kenniw waha, maca arezzuɣ ad qeǧbeɣ tidett n tayri nwem s cḍaret n inneɣni. 9 Minzi aqa tessnem arḍa n Siditneɣ Yeccu Lmasiḥ, belli idweř d amezřuḍ di ṭṭweɛ nwem, waxxa tuɣa-t s wagřa, ḥima kenniw ad tdewřem d twajjar s zzeřḍ nnes.

10 Ad kenniw weṣṣiɣ mliḥ, - minzi man aya i nnfeɛ nwem - , maḥend min tebdam ad tenwam deg useggʷas iɛdun, ad t teggem ɛawed.

11 Kemmřem řexxu s tmegga min tuɣa tmeẓẓrem, kemmřem aya s tmegga ɛlaḥsab min iǧan ɣarwem.

12 Maca mařa din meẓri, aqa ittwajeb ɛlaḥsab min ɣares, war iǧi ɛlaḥsab min war ɣares iǧi. ^■  

13 Minzi war ittřiq ḥima ad din tiři řefsaset i inneɣni u ad xawem yiři ddqeř,

14 maca ejj afeyyeḍ nwem ad iɛemmar řeɣben nsen di řweqt-a, ařami afeyyeḍ nsen di man aya ad iɛemmer řeɣben nwem, ḥima xenni ad yiři řmizan,

15 am mammec tura:

“Wenni issmunen aṭṭas,

war d as iceṭṭ ca,

d wenni tuɣa iyarrwen drus,

war dayes iqqim řexṣeṣ.” ^■  

16 Maca aqadi i AREBBI wenni iggin deg wuř n Titus cḍaret d icten xawem,

17 minzi iqbeř tutra nneɣ, uca am tuɣa dayes amnus xawem, iṭṭewweɛ maḥend ad ɣarwem dd-yas.

18 Uca nessekk-dd akides ɛawed umatneɣ wenni ɣar iǧa uweqqar di Řexbar Aṣebḥan di marra timesmunin,

19 wenni ittwafarzen ɛawed zi tmesmunin maḥend ad yuyur akidneɣ ak-d tecrimet-a n ṣṣdaqi i ittwaggen s tsexxart nneɣ i uɛuǧi n AREBBI u i ucejjeɛ i neccin.

20 Maca nḥeṭṭa maḥend war d aneɣ iḍeǧem ḥed mařa nseyyar tacrimet-a n ṣṣdaqi ifeyyḍen, 21 minzi min d aneɣ icqan ad iɛdu mliḥ, war iǧi waha qibač i AREBBI maca ɛawed zzat i iwdan. ^■   22 Nessekk ɛawed akidsen umatneɣ, wenni d aneɣ isscanen řebda deg waṭṭas n tmesřayin, aqa netta ittceṭṭar, maca řexxu ittceṭṭar ktar minzi netta ittcař xawem aṭṭas. 23 Mařa xenni Titus d amɛacar d amɛawen inu jar awem, u mařa xenni aytmatneɣ inneɣni aqa aten d rrusul n tmesmunin u n uɛuǧi n Lmasiḥ, ^□   24 seccnem asen zi řexxu tayri nwem u belli asemɣar nneɣ daywen zzat i marra tmesmunin aqa-t d tidett.