1 S uyenni tasexxart i d aneɣ ittwaggen war d aneɣ tessiḥeř ca, zi ssibbet n arreḥmet i xaneɣ iǧan. 2 Maca aqa nenḍar timesřayin innufaren isseḥcimen, war neggur ca s teḥraymect u ɛawed war nettẓuwwar ca awař n AREBBI, maca aqa nessargeb ixef nneɣ am narezzem tawwart n tidett i qaɛ tanefsect n iwdan zzat i AREBBI. ^■  

3 Maca mařa Řexbar Aṣebḥan nneɣ ɛad iřeḥḥef, aqa ittřeḥḥaf i yenni i ɣa iweddaren, ^■   4 i yenni issdarɣeř asen arebbi n ddunect-a řeɛqeř nsen, ḥima xenni war xasen tareqq ṭṭya n Řexbar Aṣebḥan n uɛuǧi n Lmasiḥ wenni iǧan d ṣṣifet n AREBBI. ^■  

5 Minzi war nettbarreḥ ca ixef nneɣ, maca Lmasiḥ Yeccu, Siditneɣ, maca neccin s ixef nneɣ d imsexxaren nwem di ṭṭweɛ n Yeccu. 6 Minzi AREBBI d wenni innan: “Ad tareqq tfawt zi taǧest!”, aqa d wenni issruɣan uřawen nneɣ, ḥima ad aneɣ issarɣ s tussna n uɛuǧi n AREBBI deg wudem n Yeccu Lmasiḥ. ^■  

7 Maca ɣarneɣ řkenz-a di řeqcuɛ n třaxt, ḥima xenni řemɣaret n jjehd ad tiři n AREBBI, war teǧi zzayneɣ. ^■   8 Maɣar nettwaziyyar di marra, maca war nettwajeyyef, aqa ccaten aneɣ, maca war nettwaḥkem ca. 9 Nettwadarrec, maca war nettwasmeḥ, aqa nemmenḍar, maca war nettwahellek.

10 Aqa narebbu řmewt n Yeccu řebda di arrimet, ḥima uřa d Tudart n Yeccu ad tᵉttwaseḍhar di arrimet nneɣ. ^■  

11 Minzi mařa neccin, inni iddaren, aqa nettwasellem i řmewt di ṭṭweɛ n Yeccu, ad tesseḍhar uřa d Tudart n Yeccu di arrimet nneɣ ittmettan. ^■  

12 Ammu xenni txeddem řmewt dayneɣ, maca tudart daywem.

13 Am ɣarneɣ Arruḥ n l’iman d ijj am mammec tura: “Aqa umneɣ, x uyenni ssiwřeɣ!”, aqa nettamen neccin ɛawed, x uyenni nessawař ɛawed, ^■  

14 uca nessen belli wenni dd-issnekkaren Siditneɣ Yeccu, ad aneɣ dd-issnekkar ɛawed ak-d Yeccu uca ad aneɣ igg akidwem zzates. ^■  

15 Minzi marra timesřayin-a ttwaggent di ṭṭweɛ nwem, ḥima ad yarni arḍa i waṭṭas, uca ad idweř ufeyyeḍ n uqadi i uɛuǧi n AREBBI. ^■  

16 S uyenni war nxessar ca uřawen, waxxa amenni bnadem nneɣ n barra ittwahellek, aqa bnadem n daxeř iddakkwař d jdid zeg wass ɣar wenneɣni.

17 Maɣar řmeḥnet ifsusen d drus n řweqt-a, tᵉttawi aneɣ-dd ijj n řqedd n uɛuǧi i war ɣares iǧi uneggar i řebda qaɛ. ^■  

18 Maɣar war nfarreḥ ca zi min ittwařan maca zi min war ittwiřin, minzi min ittwařan aqa i yict n řweqt waha, maca min war ittwiřin aqa-t i řebda.