1 Ma ittxeṣṣa aneɣ ad awem nweṣṣa ixef nneɣ min neɛna twařa nneɣni? Niɣ neḥdaj, am inneɣni, tibratin n uweṣṣi i kenniw? Niɣ ittxeṣṣa aneɣ ad awem nari ḥima kenniw ad aneɣ tweṣṣam? ^■   2 Aqa kenniw d tabrat nneɣ i yuran deg wuřawen nneɣ, ittwassen u ittwasɣaren zeg iwdan marra. 3 Minzi tessnem, aqa kenniw d tabrat n Lmasiḥ i ittwaggen s tsexxart nneɣ, tabrat yuran, war teǧi s ssmex maca s Arruḥ n AREBBI iddaren, war teǧi di teřwiḥin n weẓru, maca di teřwiḥin n wuřawen n weysum. ^■  

4 Ammu i teǧa ttiqqet i ɣarneɣ di Lmasiḥ zzat i AREBBI. 5 War nzemmar ad neḥseb ca n řḥajjet axmi dd-tusa zzayneɣ, maca tizemmar nneɣ tusa-dd zi AREBBI. 6 Netta yarra aneɣ aqa nesdaheǧ ad niři d imsexxaren i Řɛahd n Jdid, war iǧi i yijj n řɛahd s tira, maca s Arruḥ, minzi tira neqqen, maca Arruḥ isseddar. ^■  

7 Maca mařa tuɣa tsexxart n řmewt i ittwaxebcen s tira deg iẓra s wanect uɛuǧi maḥend tarwa n Israil war zemmaren ad sewḍen ɣar wudem n Musa x ssibbet n uɛuǧi n uɣembub nnes, waxxa aɛuǧi nni iɛeddun, ^■   8 mecḥař ktar i ɣa tiři tsexxart n Arruḥ deg uɛuǧi? 9 Minzi mařa tasexxart i ineddhen ɣar lḥisab tuɣa-tt s uɛuǧi, mahu ɛad tasexxart i ineddhen ɣar tsegda ad dd-tawi aɛuǧi ař afeyyeḍ.

10 Minzi min ittwassɛuǧen, iban-dd war ittwasɛuǧi ca deg wudem n uɛuǧi aya i xas iɛuǧen.

11 Minzi mařa min iɛeddun tuɣa ɣares aɛuǧi, mahu min iqqimen ad ɣares yiři uɛuǧi.

12 Ejj aneɣ xenni, mařa ɣarneɣ asitem am wanita, ad nuyur s teryast,

13 war ntegg ca amecnaw Musa, wenni iggin ltam x wudem nnes maḥend tarwa n Israil war sekkweḍen ca aneggar n min ɣa iɛdun. ^■  

14 Maca ixarriṣen nsen ttwassdarɣřen, minzi ař ass-a ittɣima ltam d ijjen x teɣri n Řɛahd Aqdim břa ma d asen ittwassargeb, aqa ltam ittwabḍeř di Lmasiḥ. ^■  

15 Maca ař ass-a, xmi d ɣa ɣaren zi Musa, ltam aqa-t x wuř nsen.

16 Maca xmi dd ɣa idweř ḥed ɣar SIDI, ltam ad zzayes ittwakkes. ^■  

17 Aqa SIDI s yixef nnes d Arruḥ uca mani iǧa Arruḥ n SIDI, aqa din tiřelli. ^■  

18 Maca marra neccin nettwařa aɛuǧi n SIDI s iɣembab war iřeḥḥfen, axmi nxezzar di tisit, uca ad nbeddeř zeg uɛuǧi ɣar uɛuǧi ɣar ṣṣifet d icten, am zi SIDI, Arruḥ. ^■