1 Degga aqa ggiɣ t deg yixef inu, aqa war ɣarwem dd-usiɣ twařa nneɣnit s wecḍan. 2 Minzi mařa zeɛma necc ssffugmeɣ kenniw, wi xenni d ayi ɣa issfarḥen mɣir wenni di ggiɣ afugem? 3 Uriɣ awem-dd man aya, ḥima necc, xmi dd ɣa yawḍeɣ din, war ttwasffugmeɣ ca zeg inni ittxeṣṣa ad zzaysen farḥeɣ. Aqa ttiqqeɣ daywem marra, belli řefraḥet inu, aqa-tt d řefraḥet nwem marra. ^■   4 Minzi uriɣ awem-dd di řeḥṣaret temɣar s waṭṭas n imeṭṭawen uřa s wuř yarejfen, war iǧi ḥima ad tffugmem, maca ḥima ad tessnem tayri i ɣari i kenniw s ufeyyeḍ.

5 Maca mařa din wenni issffugmen, netta war d ayi issffugem waha, maca zeg ijj n uɣezdis i kenniw marra, ařami war kenniw ssḍeqřeɣ s wawař-a. 6 Cfa-y-as i wanita, aqa azyen ameqqran zzaywem tuɣa iwebbex i-t. ^■   7 Zi jjihet nneɣni aqa ittxeṣṣa awem řexxu ad as tsamḥem uca ad xas tessfewwjem, ḥima war xas yarenni ufugem ař aneggaru. 8 S uyenni zawgeɣ kenniw maḥend ad as tesstebbtem tayri nwem i netta, 9 Minzi ɛawed i man aya uriɣ awem-dd, ḥima ad ssneɣ s tidett, ma tᵉṭṭaɛem di marra.

10 Wenni umi tsamḥem, necc ɛawed ad as samḥeɣ. Minzi mařa tuɣa din x mixef samḥeɣ, mixef umi samḥeɣ, samḥeɣ t di ṭṭweɛ nwem qibač i wudem n Lmasiḥ,

11 ḥima xenni cciṭan war d aneɣ izemmar, minzi nessen ixarriṣen nnes.

12 Xenni řami dd-iwḍeɣ ɣar Truwas s Řexbar Aṣebḥan n Lmasiḥ uca tennurzem ayi-dd tewwart s ufus n SIDI, ^■  

13 tuɣa war areyyḥeɣ ca di arruḥ inu, minzi war ufiɣ ca uma Titus. S uyenni mmsebḍiɣ xasen uca uyureɣ ɣar Makiduniya.

14 Maca aqadi i AREBBI wenni d aneɣ dd-ittawyen d afurrej di Lmasiḥ řebda, uca isscan zzayneɣ řefwaḥet n tussna nnes di marra imucan. ^■  

15 Minzi neǧa d ict n řefwaḥet icnan i AREBBI di Lmasiḥ, i yenni iddaren u i yenni i ɣa ittwahellken,

16 i ineggura d arriḥet n řmewt i řmewt uca i inni imezwura d řefwaḥet n Tudart i Tudart. Uca man wen d as iqedden i ssuq-a? ^■  

17 Neccin war neǧi anect inneɣni inni issfarraɣen awař n AREBBI, maca nessiweř di Lmasiḥ qibač i AREBBI ɛlaḥsab tidett u ɛlaḥsab min iǧan zi AREBBI.