1 Xenni war dinni bu lḥisab řexxu x yenni di Yeccu Lmasiḥ, inni igguren war iǧi deg webrid n arrimet tamednubt. 2 Minzi ccariɛa n Arruḥ n Tudart di Yeccu Lmasiḥ, aqa tfekk ac zi Ccariɛa n ddenb d řmewt. ^■   3 Minzi min war tzemmar Ccariɛa maɣar tuɣa teḍɛef s arrimet ifennan, AREBBI am dd-issekk Mmis di arrimet yarewsen di ddenb, uca man aya x ssibbet n ddenb, aqa iḥaseb ddenb di arrimet, ^■   4 ḥima ad dayneɣ tᵉttwakemmeř tasegda n Ccariɛa, deg inni igguren war iǧi deg webrid n arrimet tamednubt maca deg webrid n Arruḥ. 5 Minzi inni iǧan di arrimet tamednubt tteggen nneyyet nsen di arrimet tamednubt, maca inni n Arruḥ tteggen tt di Arruḥ. ^■   6 Minzi nneyyet n arrimet tamednubt d řmewt, maca nneyyet n Arruḥ d tudart d řehna. 7 Minzi nneyyet n arrimet tamednubt d řeɛdawat i AREBBI minzi war tᵉttegg ca array i Ccariɛa n AREBBI, maɣar war d as tzemmar. 8 Inni iǧan di arrimet tamednubt war izemmaren ad arḍan AREBBI.

9 Maca kenniw war teǧim ca di arrimet tamednubt, maca di Arruḥ mařa izdeɣ daywem Arruḥ n AREBBI. Maca mařa ḥed war ɣares bu Arruḥ n Lmasiḥ, d wenni war ittiři nnes. ^■  

10 Mařa daywem Lmasiḥ, aqa arrimet tamednubt temmut zi ssibbet n ddnub, maca Arruḥ iddar zi ssibbet n tsegda.

11 Mařa Arruḥ n wenni dd-issnekkaren Yeccu zi taddart n imettinen izdeɣ daywem, aqa wenni dd-issnekkaren Lmasiḥ zeg imettinen ad isseddar ɛawed arrimat nwem ifennan s Arruḥ nnes i izeddɣen daywem. ^■  

12 Xenni, a aytma, neccin s umarwas, war iǧi i arrimet tamednubt ḥima ad neddar x řeḥsab n arrimet tamednubt,

13 minzi mařa teddarem x řeḥsab n arrimet tamednubt, ad temtem, maca mařa tenɣim řexdayem n arrimet s Arruḥ, ad teddarem.

14 Minzi marra inni ittwanedhen s Arruḥ n AREBBI, nitni d arraw n AREBBI. ^■  

15 Minzi kenniw war teksim ca arruḥ n tesmuɣi wenni kenniw i ɣa yarren d isemɣan ḥima ad zzayes teggʷedem ɛawed, maca aqa teksim Arruḥ i zi nettwaqbeř d arrawen, i zi nettřaɣa: ‘Tababat, Babatneɣ!’ ^■  

16 Arruḥ nni simant nnes icehhed ak-d arruḥ nneɣ belli neccin d arrawen n AREBBI. ^■  

17 Mařa neccin d arrawen, aqa aneɣ ɛawed d iwriten, iwriten n AREBBI d iwriten ak-d Yeccu Lmasiḥ, maɣar mařa nweddeb akides, ad nettwaɛuǧi akides ɛawed. ^■  

18 Aqa ḥessbeɣ aweddeb i xaneɣ ittekken iḍa, war isdiheǧ ca ad ittwaɛbar s uɛuǧi i dd ɣa ittwasseḍharen dayneɣ. ^■  

19 Minzi marra min dd-ittwaxeřqen ixezzar s usitem d uraji ɣar usargeb n warrawen n AREBBI. 20 Minzi marra min dd-ittwaxeřqen aqa ittwagg di řbaṭeř, war iǧi s řxaḍar, maca zi ssibbet n wenni t iggin sadu, 21 s usitem belli uřa d marra min dd-ittwaxeřqen ad ittwafekk simant nnes ɛawed zi tesmuɣi i řɣecc ɣar tiřelli n uɛuǧi n warrawen n AREBBI. 22 Aqa nessen belli marra min dd-ittwaxeřqen izehhar jmiɛ s unezbar n tarwa ař ass-a.

23 War iǧi nitni waha, maca uřa d neccin inni ɣar teǧa dayneɣ tmenzut n Arruḥ, nzehhar ɛawed deg ixef nneɣ, nettraja ad nettwaqbeř d mmis u maḥend ad nettwafekk zi arrimet nneɣ. ^■   24 S uyenni neddar deg usitem nni. Maca asitem ittbanen war iǧi d asitem, minzi min ittbanen i ḥed, mammec i ɣa yegg ad dayes issitem ɛad? 25 Maca mařa nessittim di min war nettwiři, aqa nettraja t s ṣṣbar. 26 Di man aya ittiɛawan aneɣ Arruḥ ɛawed mani neḍɛef, minzi war nessin ca mammec d aneɣ i ɣa icuwwar ad neẓẓaǧ, maca Arruḥ simant nnes ittẓaǧa di ṭṭweɛ nneɣ s zzhir war ineṭqen. ^■  

27 Maca wenni ittbeqqcen deg wuřawen issen min iǧan d nneyyet n Arruḥ, aqa ittẓaǧa di ṭṭweɛ n imqeddasen am mammec t ixs AREBBI. 28 Neccin nessen aqa AREBBI iɛawen inni ittexsen di kuřci, aqa inni ittwařaɣan ɛlaḥsab min ixs Netta. 29 Minzi inni izwar issen i-ten, aqa izwar iɛeǧem i-ten ḥima ad arwesen di ṣṣifet n Mmis ḥima ad yiři Netta d amenzu jar waṭṭas n wawmaten. ^■   30 Uca inni Netta izzar iɛeǧem i-ten, aqa d inni x d iřaɣa ɛawed, u inni x d iřaɣa, aqa d inni isegged ɛawed, u inni isegged aqa d inni issɛuǧa ɛawed.

31 Min i ɣa nini xenni di man aya? Mařa AREBBI akidneɣ wi d aneɣ i ɣa iḍadden? ^■   32 Wenni war iceṭṭaren ca x Mmis maca iwca i-t di ṭṭweɛ nneɣ marra, mayemmi war d aneɣ ittic kuřci ak-d Mmis ɛawed? ^■   33 Wi i ɣa iksin tanfuč i yenni ittwafarzen zi AREBBI? AREBBI d wenni ittseggaden. ^■   34 Wi i ɣa iqḍan řḥukm? Lmasiḥ immut u ikkar-dd u Netta iqqim ɣar ufusi n AREBBI u ittẓaǧa i neccin. ^■   35 Min d ayi ɣa ibḍan x tayri n Lmasiḥ? Ma řmeḥnet niɣ řḥebs niɣ adarrec niɣ řaẓ niɣ tuɛaryent niɣ lxaṭar niɣ ssif? 36 Am mammec tura:

“Aqa x ssibbet nnek nettwaneɣ kuř ass,

nettwaḥseb amecnaw iḥuřiyyen i tɣarṣt.” ^■  

37 Maca di man aya marra nedweř ktar zeg inni iɣellben s Wenni d aneɣ ixsen. 38 Aqa necc ttwasqenɛeɣ belli niɣ řmewt niɣ tudart niɣ lmalakat niɣ řḥukkam niɣ ṣṣulaṭat niɣ min n yiḍa niɣ min i dd ɣa yasen 39 niɣ řuɛřa niɣ raǧaɣ niɣ uřa d ict n řḥajjet nneɣni zi min dd-ittwaxeřqen tzemmar ad ayi tebḍa x tayri n AREBBI tenni di Siditneɣ, Yeccu Lmasiḥ.