1 Ma war tessinem ca, a aytma, ssawařeɣ ak-d yenni issnen Ccariɛa, aqa Ccariɛa tṣeǧeḍ x bnadem min ɣa yekk iddar? 2 Tamɣart teqqen ɣar weryaz nnes s Ccariɛa min ɣa yekk iddar, maca mařa immut weryaz nnes, aqa tᵉttwafekk zi Ccariɛa zi jjihet n weryaz nnes. ^■   3 Maca mařa tejja i-t i weryaz nneɣni, min ɣa yekk weryaz iddar, tᵉttwasemma tezna. Maca mařa immut weryaz nnes, nettat ɣares tirelli zi Ccariɛa aqa war tezni mařa temřec ak-d weryaz nneɣni. ^■   4 Xenni, a aytma, kenniw ɛawed aqa temmutem i Ccariɛa s arrimet n Lmasiḥ, ḥima ad tdewřem i Wenneɣni i wenni dd-ikkaren zi taddart n imettinen, ḥima ad tewcem řɣiǧet i AREBBI. ^■   5 Minzi umi d aneɣ tuɣa di arrimet tamednubt, tuɣa ccehwat n ddnub xeddment deg iɣezdisen n arrimet nneɣ am ttwaɛarnent zi Ccariɛa ařami i ɣa awyent řɣiǧet i řmewt. 6 Maca řexxu aqa nettwafekk zi Ccariɛa, aqa nemmut x min tuɣa di nettwaḥbes, ḥima ad neɛbed s tejdidet n Arruḥ, war iǧi s teqdimt n Tira Iqeddsen. ^□  ■  

7 Min i ɣa nini xenni? Ma Ccariɛa d ddenb? Ɛemmarṣ! Maca war ssineɣ ddenb mɣir s Ccariɛa waha, maɣar war ssineɣ nnecwet mařa war tenni Ccariɛa: “War ttasem!” ^■   8 Maca ddenb yufa lfurṣa s tewṣeyyet uca tegma dayi kuř nnecwet, minzi břa Ccariɛa ddenb immut. ^■   9 Zic tuɣa ddareɣ břa Ccariɛa, maca umi dd-tusa tewṣeyyet, ibda ddenb ad iddar, uca mmuteɣ.

10 Ufiɣ belli tawṣeyyet i iǧan i tudart, tneddeh ɣar řmewt.

11 Minzi ddenb, am yufa lfurṣa s tewṣeyyet, icmet ayi uca inɣa ayi zzayes.

12 Xenni Ccariɛa iqeddsen u tawṣeyyet iqeddsen, tsegged u teṣbeḥ. ^■  

13 Ma idweř ayi min iǧan d aṣebḥan d řmewt inu? Ɛemmarṣ! Maca ddenb, ḥima ad iban ddenb, issegma dayi řmewt s min iǧan d aṣebḥan, ḥima ad idweř ddenb d ddenb ktar s tewṣiyyet.

14 Aqa nessen belli Ccariɛa zi Arruḥ i teǧa, maca necc d bnadem d amednub, mmenzeɣ i ddenb, ^■  

15 minzi war ssineɣ min ɣa ggeɣ, uřa ɛawed min xseɣ, war t tteggeɣ, maca min carrheɣ d manawenni i tteggeɣ. ^■  

16 Mařa tteggeɣ min war ttexseɣ, ad wafqeɣ ak-d Ccariɛa, belli aqa nettat teṣbeḥ.

17 Maca řexxu necc war tteggeɣ man aya ɛad, maca ddenb i d ayi izeddɣen ittegg i-t.

18 Minzi ssneɣ war dayi izeddeɣ min icnan, ixs ad yini di arrimet tamednubt inu. Minzi ihwen xafi maḥend ad xseɣ tcuni, maca war zemmareɣ ad tt ggeɣ. ^■  

19 Minzi war tteggeɣ tcuni i xseɣ, maca řɣar i war ttexseɣ ca, d manawenni i tteggeɣ. 20 Mařa tteggeɣ min war ttexseɣ, war iǧi ɛad d necc i itteggen man aya, maca ddenb wenni d ayi izeddɣen.

21 Xenni ttafeɣ ccariɛa aya am ttexseɣ ad ggeɣ tcuni ɛlaḥṣab tanefsect inu, aqa řɣar yudes ayi-dd. 22 Minzi farḥeɣ s Ccariɛa n AREBBI zi jjihet n bnadem nni di daxeř inu, ^■   23 maca ttwařiɣ din ccariɛa nneɣni deg iɣezdisen n arrimet inu, tᵉttmenɣa ak-d ccariɛa n řeɛqeř inu uca tḥebbes ayi s ccariɛa n ddenb tenni iǧan deg iɣezdisen n arrimet inu. ^■   24 Ayeḥḥat mana wemcum-a n bnadem i ǧiɣ! Wi d ayi ɣa issnejmen zi arrimet-a n řmewt? 25 Ttqadiɣ AREBBI, s Siditneɣ Yeccu Lmasiḥ ttwasnejmeɣ! Ammu aqa necc simant inu s řeɛqeř i xeddmeɣ i Ccariɛa n AREBBI, maca s arrimet inu tamednubt i ccariɛa n ddenb.