1 Min i ɣa nini xenni? Ma ad neqqim di ddenb ḥima ad immarni arḍa? 2 Ɛemmarṣ! Neccin inni immuten i ddenb, mammec ɛad dayes i ɣa neddar? 3 Ma war tessinem ca belli inni zzayneɣ ittwassɣeḍṣen di Yeccu Lmasiḥ, ttwassɣeḍṣen di řmewt nnes? ^■   4 Aqa nettwanḍeř akides s useɣḍeṣ di řmewt, ḥima am mammec dd-ittwasnekkar Lmasiḥ zi taddart n imettinen ɣar uɛuǧi n Babas, ammu i ɣa nuyur uřa d neccin di Tudart n jdid. ^■   5 Minzi mařa nettwaẓẓu d ijjen akides s tefras n řmewt nnes, xenni ammu i ɣa niři ɛawed d ijjen akides s tefras n tnukra nnes. ^■   6 Aqa nessen belli bnadem nneɣ aqdim ittwaṣelleb akides, ḥima ad tebḍeř arrimet n ddenb, war ndikkwiř ɛawed d imsexxaren i ddenb. ^■   7 Minzi wenni immuten, aqa ittwafekk zi ddnub. ^■  

8 Mařa tuɣa nemmut ak-d Lmasiḥ, aqa ejj aneɣ ad namen belli ad neddar ɛawed ak-d Lmasiḥ. ^■   9 minzi nessen belli Lmasiḥ ittwasnekkar-dd zi taddart n imettinen, war ittmetti ɛawed. Aqa řmewt war xas tḥekkem ɛad. ^■  

10 Minzi zeg uɣezdis n řmewt i immut, aqa immut i ddnub ijj n umur i řebda, maca zeg uɣezdis n Tudart i iddar, iddar i-tt i AREBBI. ^■  

11 Ammu kenniw ɛawed: ḥesbem ixef nwem d imettinen i ddenb, maca d imeddaren i AREBBI di Siditneɣ, Yeccu Lmasiḥ.

12 Xenni war tejjim ddenb ad iḥkem di arrimet nwem ifennan, ad as tᵉṭṭaɛem di nnecwat nnes,

13 uca war ttewcim iɣezdisen n arrimet nwem am dduzan i řmuɛṣiyyet, maca wcem ixef nwem i AREBBI, am iwdan inni idewřen ɣar Tudart jar n imettinen uca wcem iɣezdisen n arrimet nwem i AREBBI am dduzan i tsegda. ^■  

14 Ddenb war xawem iḥekkem ca, minzi war teǧim sadu Ccariɛa maca sadu arḍa.

15 Mammec xenni? Ma ad nexḍa minzi war neǧi ca sadu Ccariɛa, maca sadu arḍa? Ɛemmarṣ!

16 Ma war tessinem ca belli wenni umi tewcim ixef nwem d imsexxaren i ṭṭaɛet, aqa kenniw d imsexxaren i wenni umi tᵉṭṭaɛem, ma i ddenb i tᵉṭṭaɛem niɣ i tsegda? ^■  

17 Tqad as i AREBBI, aqa tuɣa kenniw d imsexxaren i ddenb uca tdewřem tᵉṭṭaɛem s wuř i ddab iṣfan n useřmed i zi tᵉttwasřemdem.

18 Řami tᵉttwafekkem zi ddenb tdewřem d imsexxaren n tsegda. ^■  

19 Ssawařeɣ am bnadem x ssibbet n tuḍɛeft n arrimet nwem, minzi am mammec tewcim iɣezdisen nwem d imsexxaren i řexmej u i min iǧan ḍidd n Ccariɛa ař ɣa tḍaddem Ccariɛa, amenni řexxu wcem iɣezdisen nwem d imsexxaren i tsegda ař ɣa tᵉttwaqeddsem. 20 Minzi řami tuɣa kenniw d imsexxaren n ddenb, tuɣa kenniw d iḥurriyyen zi jjihet n tsegda. ^■   21 Man řɣiǧet i tuɣa ɣarwem řexdenni? Timesřayin tinni i zi tᵉttṣeḍḥam řexxu? S minzi aneggar nsent d řmewt. 22 Maca řexxu, umi tᵉttwafekkem zi ddenb uca tdewřem d imsexxaren n AREBBI, aqa řɣiǧet nwem tᵉttwaqeddes, uca uneggar nnes Tudart ittduman. 23 Minzi řexřaṣ n ddenb d řmewt, maca tawhibt n arḍa n AREBBI d Tudart ittduman s Siditneɣ, Yeccu Lmasiḥ. ^■