1 Xenni neccin, am nettwasegged s l’iman, aqa ad ɣarneɣ yiři řehna ak-d AREBBI s Siditneɣ Yeccu Lmasiḥ, ^■   2 wenni zzayes ɛawed idweř aneɣ-dd adaf s l’iman ɣar arḍa aya min di nbedd u nessemɣar deg usitem n uɛuǧi n AREBBI. ^■   3 War iǧi di man aya waha, maca nessemɣar ɛawed di řemḥayem, nessen belli řmeḥnet tᵉttaru-dd dayneɣ ṣṣbar, ^■   4 d ṣṣbar ad yawi taqeǧebt uca taqeǧebt ad tawi asitem 5 uca asitem war ittseḥcim ca, minzi tayri n AREBBI aqa tᵉttwafarreɣ deg wuřawen nneɣ s Arruḥ Iqeddsen i d aneɣ immewcen.

6 Maɣar di ssibbet n tuḍɛeft nneɣ, immut Lmasiḥ di řweqt-a di ṭṭweɛ n iɛeffanen. ^■   7 Maɣar war tᵉttifed ḥed ad immet di ṭṭweɛ n uɛeffan, minzi di ṭṭweɛ n uṣebḥan ad taɣ izemmar ad izɛem ḥed ad immet. 8 Maca AREBBI imřa aneɣ tayri nnes, minzi umi tuɣa aneɣ ɛad d imednab, immut Lmasiḥ di ṭṭweɛ nneɣ. ^■   9 Mecḥař qaɛ řexxu i ɣa nettwasegged s idammen nnes uca ad zzayes nettwasenjem zeg weɣḍab!

10 Minzi řami tuɣa aneɣ ɛad d řɛedyan, nettwaseṣřeḥ ak-d AREBBI s řmewt n Mmis, mecḥař qaɛ řexxu, awarni řami nufa aṣřaḥ, ad nettwasenjem s Tudart nnes.

11 War iǧi man aya waha, maca ad nessemɣar di AREBBI ɛawed s Siditneɣ Yeccu Lmasiḥ, wenni zi neksi řexxu aṣřaḥ s ufeyyeḍ.

12 Maɣar axmi s yijj n bnadem yudef-dd ddenb ɣar ddunect uca s ddenb tudef-dd řmewt, ammu dd-tudef řmewt ɣar iwdan marra, minzi xḍan marra. ^■  

13 Minzi qbeř ma tuɣa teǧa Ccariɛa, tuɣa ddenb di ddunect, maca ddenb war ittwaḥsib ca minzi war din teǧi Ccariɛa.

14 Maca řmewt tuɣa teḥkem zi Adam ař Musa uřa x yenni war ixḍin amecnaw mammec ixḍa Adam ak-d Ccariɛa, Adam wenni d ṣṣifet n wenni dd ɣa yasen.

15 Maca war iǧi s uxeṭṭu amecnaw s tewhibt n arḍa. Minzi mařa mmuten aṭṭas x ssibbet n ijj n uxeṭṭu, mecḥař qaɛ i ɣa ifeyyeḍ arḍa n AREBBI u tawhibt s yijj n bnadem, Yeccu Lmasiḥ i waṭṭas.

16 Maca s min immewcen s arḍa war ittiři amecnaw s uxeṭṭu n yijjen. S minzi řḥukm ittawi-dd lḥisab zeg ijj n uxeṭṭu, maca tawhibt n arḍa tᵉttawi-dd zeg waṭṭas n ixeṭṭan ař ɣa nettwasegged.

17 Minzi mařa s uxeṭṭu n ijjen aqa teḥkem řmewt, mecḥař qaɛ i ɣa ḥekmen di Tudart inni iksin afeyyeḍ n arḍa d tmewci n tsegda s Yijjen, aqa-t d Yeccu Lmasiḥ.

18 Am mammec xenni s yijj n uxeṭṭu aqa idweř řḥukm x marra iwdan, ammu i dd-ittas arḍa ɣar marra iwdan s tsegda n Yijjen, ḥima ad ttwaseggden i Tudart.

19 Minzi amacnaw s řmuɛṣiyyet n ijj n bnadem dewřen aṭṭas d imednab, ammu ɛawed s ṭṭaɛet n Ijjen ad dewřen aṭṭas d imseggaden. 20 Maca umi dd-tusa Ccariɛa, immarni ddenb, u mani immarni ddenb, immarni arḍa ktar s waṭṭas, ^■   21 ḥima, am mammec iḥkem ddenb ař řmewt, ad iḥkem arḍa tanya s tsegda ař Tudart ittduman s Yeccu Lmasiḥ, Siditneɣ.