1 Qbeř i Řɛid n Tɣarṣt n Useɛdu, umi issen Yeccu aqa tasaɛɛet nnes tiweḍ-dd belli ad iffeɣ zi ddunect-a ɣar Babas, tuɣa ittexs inni iǧan nnes, inni iǧan di ddunect, ittexs i-ten ař aneggaru. ^■   2 Řami ikemmeř umensi, umi iɛarn cciṭan uř n Yahuda, mmis n Cimɛun Isxariyuṭi, maḥend ad t isellem, ^■  

3 ibedd Yeccu, - tuɣa issen belli Tababat iwca as kuřci deg ifassen nnes u belli iffeɣ-dd zi ɣar AREBBI u ɣar AREBBI i ɣa iɛqeb -, ^■   4 ikkar-dd x umensi, ikkes arruḍ nnes. Iksi ijj n umendiř uca ibyes i-t i yixef nnes. 5 Xenni ifarreɣ aman di tbanyut uca ibda issirid iḍaren n imeḥḍaren, imesseḥ asen s umendiř i zi tuɣa ibyes.

6 Řami dd-yusa ɣar Cimɛun Buṭrus, inna as Cimɛun: “A Sidi, ma texsed ad tessirded iḍaren inu?” ^■   7 Yarra-dd Yeccu, inna as: “Cek war tefhimed ca řexxu min tteggeɣ, maca ad tfehmed man aya awarni manawenni.” 8 Inna as Cimɛun Buṭrus: “Qaɛ ɛemmarṣ ad tessirded iḍaren inu.” Yarra-dd xas Yeccu: “Mařa war d ac ssirdeɣ, war ɣarek tᵉttiři bu tasɣart akidi.” 9 Inna as Cimɛun Buṭrus: “A Sidi, xenni war tessirid iḍaren inu waha, maca uřa d ifassen inu d uzeǧif inu.”

10 Yeccu inna as: “Wenni ittwasirden qaɛ, war iḥdij mɣir ad ttwasirden iḍaren nnes waha, minzi netta d amezdag amen ikmeř. Kenniw tizdigem, maca war iǧi marra.” ^■  

11 Yeccu tuɣa issen wi t ɣa iɣdaren, s uyenni inna: “Kenniw war teǧim ca marra d imezdag.” ^■  

12 Awarni řami issird iḍaren nsen, yarḍ arruḍ nnes, xenni iqqim ɛawed, inna asen: “Ma tfehmem min daywem ggiɣ?

13 Kenniw tᵉttřaɣam ayi ‘Amseřmad nneɣ!’ d ‘Siditneɣ!’, uca tidett i tennam, minzi wa d Necc. ^■  

14 Mařa Necc d Sidi nwem d Amseřmad nwem uca ssirdeɣ iḍaren nwem, řexdenni ittxeṣṣa uřa i kenniw ad tessirdem iḍaren ijjen i wenneɣni! ^■  

15 Minzi Necc zeɛma wciɣ awem ijj n umedya, ḥima, am mammec ggiɣ Necc akidwem, ad teggem kenniw ɛawed ak-d wayawya. ^■  

16 S tidett, s tidett, Necc ad awem iniɣ: War din iǧi umsexxar wenni yuɛřan x sides, uřa d areqqas yuɛřan x wenni i-t-i-dd-issekken. ^■  

17 Mařa tessnem timesřayin-a, ad tiřim tᵉttwabarkem mařa teggim zzaysent.

18 War t qqareɣ ca xawem marra, maɣar ssneɣ inni i xḍareɣ, maca ḥima ad ittwakemmeř min yuran deg Wedlis, ad iniɣ: ‘Wenni i ɣa iccen zeg weɣrum akidi, aqa issgeɛɛed xafi anirz nnes.’ ^■  

19 Řexxu ad awem t iniɣ qbeř ma ad imsar, ḥima, x minni i ɣa imsar, ad tamnem belli aqa d NECC. ^■   20 S tidett, s tidett, Necc ad awem iniɣ: Wenni i ɣa iqebřen wenni dd ɣa ssekkeɣ, ad ayi iqbeř, u wenni d ayi ɣa iqebřen, ad iqbeř uřa d Wenni d ayi dd-issekken.” ^■   21 Řami inna Yeccu man aya, innehweř Arruḥ nnes aṭṭas, uca iched, inna: “S tidett, s tidett, Necc ad awem iniɣ: Ijjen zzaywem ad dayi iɣder!” ^■   22 Imeḥḍaren xzaren ɣar wayawya, minzi war ssinen di min xef tuɣa issawař. 23 Tuɣa din ijjen zeg imeḥḍaren nnes i tuɣa ittexs Yeccu, tuɣa isenned x idmaren n Yeccu. ^■   24 Isscen Cimɛun Buṭrus ɣares, ḥima netta ad t isseqsa min iɛna wenni min xef tuɣa issawař ammu. 25 Wanita xenni, umi isenned x idmaren n Yeccu, inna as: “A Sidi, min iɛna?” 26 Yarra-dd Yeccu, inna: “D wenni umi ɣa ssisneɣ ařeqqim n weɣrum, ad as t wceɣ.” Řexdenni issisen ařeqqim n weɣrum, iwca as t-i-dd i Yahuda, mmis n Cimɛun Isxariyuṭi.

27 Awarni i uřeqqim-a n weɣrum, yudef i-t cciṭan. Inna as Yeccu: “Min texsed ad t tegged, egg i-t deɣya.” 28 Uřa d ijj zeg inni tuɣa issennden war issin mayemmi Netta i d as inna man aya. 29 Maɣar ittɣiř asen i ca zzaysen, umi Yahuda aqa-t x ssenduq, aqa Yeccu yumur i-t ḥima ad iseɣ ca min ḥdajen nitni i Řɛid, niɣ ḥima ad iwc ca i imezřaḍ. ^■   30 Wanita, awarni řami iṭṭef ařeqqim n weɣrum, iffeɣ deɣya. Tuɣa d ǧiřet umi iffeɣ.

31 Xas uca inna Yeccu: “Aqa řexxu ittwassɛuǧ Mmis n bnadem uca ittwasɛuǧ AREBBI dayes. 32 Mařa AREBBI aqa ittwassɛuǧ dayes, řexdenni AREBBI ad t ittwassɛuǧ ɛawed deg ixef nnes, wah ad t ittwassɛuǧ deɣya. ^■   33 A iḥenjiren inu imeẓyanen, Necc aqa ayi akidwem drus n řweqt ɛad. Kenniw ad xafi tarzum uca am mammec nniɣ i Wudayen: ‘Mani i ɣa raḥeɣ Necc, war tzemmarem ad dd-tasem!’, ammu i d awem ɣa iniɣ ɛawed řexxu. ^■  

34 Tawṣeyyet n jdid i d awem ɣa wceɣ ḥima ad texsem ijjen wenneɣni. Am mammec Necc ttexseɣ kenniw, ittxeṣṣa uřa d kenniw ad texsem ayawya ammu. ^■   35 S man aya ad ssnen marra aqa kenniw d imeḥḍaren inu, mařa din ɣarwem tayri jar awem.” ^■  

36 Cimɛun Buṭrus inna as: “A Siditneɣ, mani i ɣa traḥed?” Yarra-dd Yeccu, inna as: “Mani i ɣa raḥeɣ Necc, war tzemmared řexxu ad ayi-dd teḍfared, maca awarni manawenni ad ayi dd-teḍfared ɣar uneggaru.” ^■   37 Cimɛun Buṭrus inna as: “A Sidi, mayemmi war zemmareɣ ad Cek dd-ḍfareɣ řexxu? Necc ad wceɣ tudart inu i Cek.” ^■   38 Inna as Yeccu: “Ma ad ayi tewced tudart nnek? S tidett, s tidett, Necc ad ac iniɣ: War issququɛ uyaẓiḍ, qbeř ma ad ayi tenkared třata n twařawin.” ^■