1 Setta n wussan qbeř Řɛid n Tɣarṣt n Useɛdu, yusa-dd Yeccu ɣar Bayt-Ɛanya, mani tuɣa iǧa Aliɛazar, wenni dd-issnekkar Yeccu zi taddart n imettinen. ^■   2 Uca ggin as din ijj n umensi. Marta tuɣa tsexxar u Aliɛazar tuɣa d ijjen zeg inewjiwen inni tuɣa akides. 3 Teksi-dd Maryam ijj n uɣarraf n řefwaḥet n ṣṣenbel teṣfa tiɣřa, tedhen iḍaren n Yeccu, xenni temseḥ iḍaren nnes s ucuwwaf nnes. Taddart teccur s řefwaḥet n zzect n wedhan. 4 Ijjen zeg imeḥḍaren nnes wenni umi qqaren Yahuda Isxariyuṭi wenni t i ɣa iɣdaren, inna: 5 “Mayemmi war temmenz ca řefwaḥet-a n ṣṣenbel s teřt mya n dinar, ḥima ad temmewc i imezřaḍ?” ^■   6 Netta inna aya, war iǧi minzi cqan t imezřaḍ, maca minzi netta d aceffar, tuɣa ɣares ssenduq uca ittekkes zi min dayes immarsen. ^■   7 Yeccu inna: “Jjem tt, aqa txemmeř i-tt i wass n wenḍeř inu. ^■   8 Minzi imezřaḍ aqa aten řebda akidwem, maca Necc war kidwem ǧiɣ i řebda.” ^■  

9 Aṭṭas n řɣaci n Wudayen ssnen belli Yeccu aqa-t dinni uca usin-dd, war iǧi ḥaca zi ssibbet n Yeccu, maca ɛawed ḥima ad ẓaren Aliɛazar wenni dd-issnekkar zi taddart n imettinen. ^■  

10 Mcawaren imeqqranen n ikehhanen ḥima ad nɣen uřa d Aliɛazar,

11 minzi aṭṭas n Wudayen ffɣen-dd zi ssibbet nnes uca umnen di Yeccu.

12 Tiwecca nnes, umi sřin aṭṭas n řɣaci inni dd yusin ɣar Řɛid belli Yeccu yusa-dd ɣar Urcalim, ^■  

13 ksin ifetwan n tini uca ffɣen ḥima ad t řqan, řaɣan:

“Uṣanna!

Sseɛd n wenni dd-yusin

s Yisem n SIDI,

Ajeǧid n Israil!” ^■  

14 Yufa Yeccu ijj n wesnus uca inya xas, am mammec tura:

15 “War tteggʷed ca, a tayeǧit Ṣihyun,

xzar, Ajeǧid nnem ad dd-yas,

iqqim x wesnus, aḥenjir n teɣyuč.” ^■  

16 Imeḥḍaren nnes war fhimen ca timesřayin-a deg umezwaru. Maca awarni řami ittwasuɛřa Yeccu, řexdenni ɛeqřen belli man aya tura xas uca belli nitni ggin zzayes man aya.

17 Řɣaci i tuɣa iǧan akides umi iřaɣa-dd x Aliɛazar zeg wenḍeř, tuɣa iched aqa Netta issnekkar i-t-i-dd zi taddart n imettinen.

18 S man aya iřqa t-i-dd řɣaci ameqqran, minzi nitni sřin belli igga řeɛřamet-a.

19 Ifarisiyyen xenni nnan jar asen: “Ma tᵉttwařam mliḥ belli kenniw tᵉttakkwaḍem ɣar walu, xzarem, aqa qaɛ ddunect teḍfar i-t-i-dd.” ^■  

20 Tuɣa din ca n iwdan zi řegnus jar asen, inni dd-igeɛɛden ɣar Urcalim ḥima ad ɛebden di Řɛid. ^■   21 Ina ruḥen ɣar Filippus, wenni zi tendint n Baytṣayda di Ljalil, sseqsan t, nnan: “A Sidi, nexs ad nẓar Yeccu.” ^■   22 Yusa-dd Filippus, inna tt i Andrawus, Andrawus d Filippus ɛawed nnan tt i Yeccu. 23 Yeccu yarra-dd, inna asen: “Aqa tiweḍ-dd tsaɛɛet i di i ɣa ittwassɛuǧ Mmis n bnadem. ^■   24 S tidett, s tidett, Necc ad awem iniɣ: Mařa war dd-iwḍi řḥebb n yirden di temmurt, ad immet, xenni ad iqqim weḥḥdes, maca mařa immut, xenni ad dd-yawi řɣiǧet aṭṭas. ^■   25 Wenni ittexsen tudart nnes, ad tt ixsar u wenni i ɣa icarhen tudart nnes di ddunect-a, ad tt ixemmeř i Tudart ittduman. ^■   26 Mařa ca n yijjen isexxar ayi, ejj i-t ad ayi iḍfar. Mani i ɣa iřiɣ Necc, dinni i ɣa yiři ɛawed umsexxar inu. Mařa ca n ijjen ixdem ayi, ad t icenneɛ Tbabat. ^■   27 Řexxu uř inu innehweř, min ɣa iniɣ? A Baba, senjem ayi zi tsaɛɛet-a? Maca x uyenni i dd-usiɣ ɣar tsaɛɛet-a. ^■   28 A Tababat, sɛuǧi Isem nnek.” Xenni tusa-dd ict n tmijja zeg ujenna: “Sɛuǧeɣ t uca ad t sɛuǧeɣ ɛawed!” 29 Řɣaci i tuɣa ibedden din isřa i-tt, nnan nitni: “Aqa imsar wajjaj.” Inneɣni nnan: “Aqa issiweř-dd ijj n lmalak akides.”

30 Yarra-dd Yeccu, inna asen: “Tmijja aya war teǧi ca di ṭṭweɛ inu maca di ṭṭweɛ nwem. ^■   31 Řexxu ad yiři řḥukm x ddunect-a. Řexxu ad immenḍar umeqqran n ddunect-a ɣar barra. ^■   32 U Necc, x minni i ɣa ttwasgeɛɛdeɣ zi temmurt, ad ɣari dd-jebdeɣ marra.” ^■   33 Inna man aya ḥima ad isscen ɣar man řmewt i ɣa immet.

34 Řɣaci yarra-dd xas: “Neccin nesřa zi Ccariɛa aqa Lmasiḥ ad iqqim i řebda. I mammec teqqared Cek belli ittxeṣṣa i Mmis n bnadem ad ittwassgeɛɛed? Min iɛna Mmis-a n bnadem?” ^■   35 Yeccu inna asen: “Tafawt ad tiři akidwem drus n řweqt ɛad. Uyurem, řami ɛad ɣarwem Tafawt, ḥima war kenniw tᵉṭṭef taǧest. Wenni igguren di taǧest, war issin mani iggur. ^■   36 Amnem di Tfawt maḥend Tafawt ɛad aqa-tt ɣarwem, ḥima kenniw ad tiřim tarwa n Tfawt.” Ammu i tuɣa issawař Yeccu, řexdenni yuyur uca innufar zzaysen.

37 Waxxa tuɣa Netta ittegg marra řeɛřamat-a zzatsen, waxxa amenni nitni war zzayes uminen, 38 ḥima ad ittwakemmeř wawař n unabi Icaɛya i innan:

“A Sidi, wi yumnen s řexbar nneɣ

u i umi ittwassargeb ufus n SIDI?” ^■  

39 S uyenni war zemmaren ad amnen, minzi Icaɛya inna ɛawed:

40 “Nitni ssdarɣřen tiṭṭawin nsen,

sseqseḥen uřawen nsen,

ḥima war tᵉttwiřin s tiṭṭawin nsen,

war fehhmen s wuř nsen,

ad tuben uca Necc ad ten ssgenfiɣ.” ^■  

41 Inna Icaɛya ammu, minzi iẓra aɛuǧi nnes uca tuɣa issawař xas. ^■   42 Waxxa amenni umnen zzayes aṭṭas n imeqqranen n řgens, maca s ssibbet n Ifarisiyyen, war zzayes cehden ca, ḥima war xasen ttiẓẓřen zi temzida. ^■   43 Minzi nitni tuɣa xsen aɛuǧi zeg iwdan x uɛuǧi zi AREBBI. ^■  

44 Maca Yeccu iřaɣa, inna: “Wenni dayi ittamnen, war dayi ittimen ca, maca deg wenni d ayi dd-issekken. 45 Wenni d ayi iẓrin, iẓra wenni d ayi dd-issekken. ^■   46 Usiɣ-dd d Tafawt ɣar ddunect, ḥima kuř ijjen wenni dayi ittamnen, war ittɣimi ca ɛad di taǧest. ^■   47 Mařa ca n yijjen isřa i wawařen inu, maca war daysen yeṭṭif, Necc war xas ḥekkmeɣ ca. Necc war dd-usiɣ ca ḥima ad ḥekmeɣ x ddunect, maca ḥima ad ssnejmeɣ ddunect. ^■   48 Wenni d ayi isseḥqaren uca war iqbiř awařen inu, ɣares wenni xas i ɣa iḥekmen: awař i nniɣ, ad xas iḥkem deg wass aneggaru. ^■   49 Minzi Necc war ssiwřeɣ ca zi ɣari, maca Tababat wenni d ayi-dd-issekken iwca ayi ict n tewṣeyyet x min ɣa iniɣ d min xef ɣa ssiwřeɣ, ^■   50 u Necc ssneɣ tiweṣṣa nnes, aqa atent d Tudart ittduman. S uya, min ssawařeɣ, ssawařeɣ t am mammec d ayi inna Baba.”