1 Tuɣa din ijj n bnadem ihřec, qqaren as Aliɛazar, zi dcar n Bayt-Ɛanya. Netta tuɣa d umas n Maryam d Marta. 2 Maryam tanita nettat d tenni i tuɣa idehnen Yeccu s řefwaḥet n mirru u temseḥ iḍaren nnes s ucuwwaf nnes, u umas Aliɛazar tuɣa ihřec. ^■   3 Ssekkent-i-dd yessmas ijjen ɣares, nnant: “A Siditneɣ, xzar, wenni texsed, aqa ihřec.”

4 Maca Yeccu inna: “Řehřac-a war iǧi ca i řmewt, maca i uɛuǧi n AREBBI, ḥima ad zzayes ittwassɛuǧ Mmis n AREBBI.” ^■   5 Tuɣa Yeccu ittexs Marta d Maryam d Aliɛazar.

6 Ařami isřa aqa Aliɛazar ihřec, řexdenni iqqim ɛad tnayen n wussan deg wemcan mani t tuɣa. 7 Awarni man aya inna i imeḥḍaren nnes: “Ejj aneɣ ad nraḥ ɛawed ɣar temmurt n Yahudiyya!” 8 Imeḥḍaren nnan as: “A Amseřmad nneɣ, drus zeg wami tuɣa Udayen arezzun ad Cek arejmen, waxxa amenni, ma Cek ad traḥed dinni ɛawed?” ^■   9 Yarra-dd Yeccu: “Ma war din tenɛac n tsaɛɛetin deg uziř? Mařa ca n yijjen yuyur s uziř, war ittneqriḍ ca, minzi ittwařa tafawt n ddunect-a.

10 Maca mařa ca n yijjen ad yuyur s ǧiřet, ad inqareḍ, minzi war dayes bu tfawt.”

11 Awarni řami inna man aya, inna asen: “Aliɛazar, ameddukkeř nneɣ aqa iṭṭeṣ, maca ad raḥeɣ ḥima ad t-i-dd ssnekkareɣ.” ^■  

12 Nnan as imeḥḍaren: “A Siditneɣ, mařa netta iṭṭeṣ, xenni ad iggenfa!”

13 Yeccu maca tuɣa issawař x řmewt nnes, maca ittɣiř asen belli Netta issawař x arraḥet n yiḍeṣ.

14 Xenni inna asen Yeccu s bṭayṭay: “Aqa Aliɛazar immut.

15 U Necc farḥeɣ awem umi Necc war din ǧiɣ, ḥima ad tamnem. Maca ittxeṣṣa kenniw ad traḥem dinni.”

16 Xenni inna Tuma, wenni umi qqaren ‘Acniw’, i imeḥḍaren imɛacaren nnes: “Ejj aneɣ ad nraḥ uřa d neccin ḥima ad nemmet akides.”

17 Řami dd-yiweḍ Yeccu ɣar Bayt-Ɛanya, yufa aqa ɛdun arebɛa n wussan zeg wami tuɣa-t deg wenḍeř.

18 Bayt-Ɛanya tuɣa tudes Urcalim ɛřaḥař xemmesṭac ‘istadiyyen’, ɛřaḥař třata kilumitr. ^□  

19 Aṭṭas n Wudayen usin-dd ɣar Marta d Maryam ḥima ad tent ɛezzan x umatsent. 20 Řami tesřa Marta, aqa Yeccu yiweḍ-dd, teffeɣ ḥima ad t teřqa, maca Maryam teqqim di taddart. 21 Tenna Marta i Yeccu: “A Sidi, maɛlik Cek tuɣa da, iři war ittmetti ca uma. 22 Maca řexxu ɛad ssneɣ ɛawed belli marra min ɣa tᵉttared zi AREBBI, Netta ad ac t iwc.” 23 Yeccu inna as: “Ad dd-ikkar umam.” 24 Tenna as Marta: “Ssneɣ belli ad dd-ikkar di tnukra deg wass aneggaru.” ^■   25 Yeccu inna as: “NECC d Tanukra d Tudart. Wenni zzayi i ɣa yamnen, ad iddar, waxxa immut. ^■   26 Marra wenni iddaren uca yumen zzayi, war ittmetti i řebda. Ma tumned di man aya?” ^■   27 Tenna as: “Wah, a Sidi inu, umneɣ aqa Cek d Lmasiḥ, Mmis n AREBBI wenni tuɣa i d ttasen ɣar ddunect.” ^■  

28 Awarni řami tenna aya, truḥ třaɣa i učmas Maryam s řḥess, tenna: “Amseřmad nneɣ aqa-t danita, ittřaɣa-dd xam.” 29 Řami tesřa Maryam aya, tekkar s tazřa, tusa-dd ɣares. 30 Tuɣa Yeccu war dd-yusi ca ɛad ɣar dcar, maca tuɣa-t ɛad deg wemcan mani t teřqa Marta. 31 Řami ẓrin Udayen inni iǧan akides di taddart u tuɣa ttɛezzan tt, aqa Maryam tekkar s tazřa, teffeɣ, ḍfaren tt xenni, minzi ittɣiř asen aqa truḥ ɣar wenḍeř ḥima ad tru dinni. 32 Řami dd-tusa Maryam ɣar mani tuɣa Yeccu uca teẓra i-t, tewḍa ɣar iḍaren nnes, tenna as: “A Sidi, maɛlik Cek tuɣa danita, iři uma war ittmetti ca!”

33 Řami tt iẓra Yeccu tᵉttru, uřa d Wudayen inni dd-yusin akides ttrun, innehweř Arruḥ nnes, inhezz di řeɛmar nnes, 34 inna: “Mani t tessarsem?” Nnan as: “Araḥ-d, a Siditneɣ, ad texzared!” 35 Xenni ffɣent as-dd i Yeccu imeṭṭawen. ^■   36 Udayen nnan: “Xzarem mecḥař t ittexs.” 37 Maca ca zzaysen nnan: “Ma war izemmar Wa, wenni yarezmen tiṭṭawin i udarɣař, ad igg ca maḥend uřa d wanita war ittmetti ca?”

38 Innehweř Yeccu ɛawed deg ixef nnes uca yusa-dd ɣar wenḍeř. Anḍeř aqa-t d ijj n ifri uca ict n teṣḍart tuɣa temmars x wadaf nnes. 39 Yeccu inna: “Ksim taṣḍart-a.” Tenna as Marta, učmas n wenni immuten: “A Sidi, aqa yarṣuḍ minzi teɛdu xas arebɛa n wussan.” 40 Inna as Yeccu: “Ma war d am nniɣ, mařa tumned, ad tẓared aɛuǧi n AREBBI?” 41 Kksin taṣḍart. Xenni issgeɛɛed Yeccu tiṭṭawin nnes ɣar sennej, inna: “A Tababat, ɛafak řami d ayi tesřid. 42 Necc ssneɣ aqa řebda tᵉttesřid ɣari, maca di ṭṭweɛ n řɣaci i d ayi dd-innḍen, nniɣ t, ḥima ad amnen belli Cek tessekked ayi-dd.” ^■   43 Řami inna aya, iřaɣa s jjehd: “Aliɛazar, ffeɣ-dd!” 44 Řexdenni iffeɣ-dd umettin, tuɣa ifassen d iḍaren nnes carfen s řecfen n řeqṭen u tuɣa ijj umendiř n řeqṭen ittwacarf x uɣembub nnes. Inna asen Yeccu: “Fesyem as-d. Jjem t ad iraḥ.” ^■  

45 Aṭṭas n Wudayen inni dd-yusin ɣar Maryam, uca ẓrin min igga Yeccu, umnen zzayes. 46 Maca ca zzaysen ruḥen ɣar Ifarisiyyen, nnan asen min igga Yeccu. 47 Xenni ggin imeqqranen n ikehhanen d Ifarisiyyen ijj n umuni, nnan: “Min i ɣa negg, minzi Aryaz-a ittegg aṭṭas n řeɛřamat. ^■   48 Mařa nejj i-t amya, marra ad zzayes amnen, ad dd-asen Irumaniyyen, ad kksen amcan nneɣ iqeddsen uřa d iwdan n řgens nneɣ.” 49 Inna asen ijjen zzaysen, aqa-t d Qayafa, netta d arrays n ikehhanen deg useggʷas nni: “Kenniw war tessinem walu 50 uca war tefhimem ca belli ineffeɛ i neccin x minni i ɣa immet ijj n bnadem di ṭṭweɛ n řgens uca war ittmetti ca řgens nneɣ marra.” ^■   51 War yenni ca man aya zeg ixef nnes, maca am t tuɣa d arrays n ikehhanen deg useggʷas nni, tuɣa ittnebba belli Yeccu ad immet di ṭṭweɛ n řgens. 52 War iǧi ḥaca di ṭṭweɛ n řgens nnes, maca uřa ḥima ad issmun iḥenjiren ittwazuzzaren n AREBBI ɣar ijjen. ^■   53 Zeg wass nni nwan ad t nɣen.

54 Maca Yeccu war iqqim iggur jar Wudayen s bṭayṭay, maca iruḥ ssenni ɣar ict n temmurt tudes řexřa, ɣar ict n tendint qqaren as Ifrayim uca iqqim dinni ak-d imeḥḍaren nnes.

55 Tuɣa Taɣarṣt n Useɛdu, Řɛid n Wudayen, ɛřayen yiweḍ-dd. Aṭṭas zi temmurt usin-dd ɣar Urcalim ḥima ad ṭehharen ixef nsen qbeř Řɛid n Tɣarṣt n Useɛdu. 56 Nitni tuɣa arezzun x Yeccu, nnan jar asen umi nitni bedden di Zzawect Tameqqrant: “Min tᵉttwařam? Ma zeɛma war dd-ittis ɣar Řɛid?” ^■   57 Maca imeqqranen n ikehhanen d Ifarisiyyen weṣṣan belli mařa ca n yijjen issen mani iǧa, ad t ini, ḥima ad t ṭṭfen.