1 “S tidett, s tidett, Necc ad awem iniɣ: Wenni war ittidfen zi tewwart ɣar řkuri n wuǧi, maca ad igeɛɛed manis nneɣni, aqa-t d aceffar d axewwan. 2 Maca wenni i ɣa yadfen zi tewwart, netta d ameksa n tḥimart. 3 Aɛessas n tewwart ad as yarzem i wanita uca ad tseř tḥimart i tmijja nnes. Netta ad iřaɣa i wuǧi nnes s ismawen nsen uca ad ten issuffeɣ ɣar barra. 4 Awarni řami issuffeɣ marra taḥimart nnes, ad yuyur zzates, uca ad t-i-dd-ḍfaren wuǧi nnes minzi ssnen tmijja nnes. 5 Maca abarrani war t tḍeffar tḥimart ɛemmarṣ, maca ad zzayes tarweř, minzi war tessin tmijja n ubarrani.”

6 Inna asen Yeccu amettiř-a, maca nitni war fhimen ca i tmesřayin min xef tuɣa akidsen issawař.

7 Yeccu inna asen ɛawed: “S tidett, s tidett, Necc ad awem iniɣ: NECC d Tawwart n tḥimart. 8 Marra inni dd-yusin qbeř inu aqa aten d iceffaren d ixewwanen. Maca taḥimart war d asen tesři ca. 9 NECC d Tawwart. Wenni zzayi i ɣa yadfen, ad iddar. Netta ad yadef, ad iffeɣ uca ad yaf mani i ɣa yarwes. ^■  

10 Aceffar war dd-ittis mɣir ḥima ad yacar, ad iɣarṣ uřa ḥima ad isshellek. Necc maca usiɣ-dd ḥima ad ɣarsen tiři Tudart d ufeyyeḍ.

11 NECC d Ameksa Aṣebḥan. Ameksa Aṣebḥan issrusa tudart nnes i wuǧi nnes. ^■  

12 Maca amcaray, wenni war iǧi ca d ameksa, war iǧi ca d bab n wuǧi, x minni i ɣa iẓar uccen yusa-dd, ad yejj taḥimart uca ad yarweř. Xenni ad dd-yas wuccen, ad ixḍef taḥimart uca ad tt izuzzar. ^■  

13 Amcaray yarweř minzi netta d amcaray, war t icqi wuǧi.

14 NECC d Ameksa Aṣebḥan. Ssneɣ uǧi inu uca uǧi inu ssnen ayi, ^■  

15 am mammec i d ayi issen Baba, ammu i ssneɣ Necc Baba u Necc wciɣ tudart inu i tḥimart. ^■  

16 Ɣari ɛad uǧi nneɣni, inni war iǧin ca zi řkuři aya. Icuwwar ayi ad ten dd-ssmuneɣ tanya uca ad sřen i tmijja inu uca ad dewřen marra d ict n tḥimart d ijj n Umeksa. ^■  

17 S man aya ittexs ayi Baba, minzi Necc wciɣ tudart inu ḥima ad tt-i-dd-ksiɣ ɛawed. ^■  

18 Uřa d ijj war zzayi tt iksi, maca Necc wciɣ tt s řxaḍar inu. Ɣari ṣṣulṭa ḥima ad tt wceɣ u ɣari ṣṣulṭa ḥima ad tt-i-dd-ksiɣ ɛawed. Tawṣeyyet-a ṭṭfeɣ tt zi Baba.” ^■  

19 Xenni imsar ɛawed ubeṭṭu jar Wudayen s ssibbet n wawařen-a. ^■   20 Aṭṭas zzaysen nnan: “Aqa dayes cciṭan, Netta d aṭemmes ameqqran. Mayemmi ɣares tᵉttesřam?” ^■   21 Inneɣni nnan: “Awařen-a war ǧin ca n ijj n umaryaḥ. Ma izemmar cciṭan ad yarzem tiṭṭawin n idarɣařen?” ^■  

22 Yiweḍ-dd Řɛid n Udeccen n Zzawect Tameqqrant di Urcalim. Tuɣa d řmecta. 23 Yeccu iggur di Zzawect Tameqqrant deg useqqif ak-d ukulwar d ipilaren n Suliman. ^■   24 Nnḍen as-dd Wudayen, nnan as: “Ař meřmi d aneɣ i ɣa tejjed nuyeř? Mařa Cek d Lmasiḥ, ini aneɣ t s bṭayṭay.” 25 Yarra-dd Yeccu, inna asen: “Nniɣ awem t uca kenniw war tuminem. Řexdayem i ggiɣ s Yisem n Baba cehhdent xafi. ^■   26 Maca kenniw war tuminem minzi kenniw war teǧim ca d uǧi inu, am mammec tuɣa d awem nniɣ. 27 Uǧi inu isřa ɣar tmijja inu u Necc ssneɣ asen uca nitni ad ayi-dd ḍfaren. ^■   28 Ad asen wceɣ Tudart ittduman uca war ttwahellken ɛemmarṣ qaɛ uca uřa d ijj war ten ixeṭṭef zeg ufus inu. ^■   29 Baba wenni d ayi ten iwcin, aqa-t d ameqqran x kuřci. Uřa d ijj war izemmar ad ten ixḍef zeg ufus n Baba. 30 Necc d Baba d Ijjen.” ^■  

31 Xenni ksin Wudayen ɛawed iẓra ḥima ad t arejmen. ^■   32 Yeccu inna asen: “Aqa ssecneɣ awem aṭṭas n řexdayem tiṣebḥanin zi Baba. I man řxedmet zzaysent i texsem ad ayi tarejmem?” 33 Nnan as Wudayen: “War Cek narejjem x ict n řxedmet taṣebḥant, maca umi tekfared u tarrid ixef nnek d AREBBI, waxxa Cek d bnadem i teǧid.” ^■   34 Inna asen Yeccu: “Ma war turi di Ccariɛa nwem: ‘Necc nniɣ, aqa kenniw d irebbiten!’? ^■   35 Mařa Netta isemma ten ‘irebbiten’, i yenni umi dd-yusa wawař n AREBBI, uca war izemmar ad ittwarẓ Wedlis Iqeddsen, 36 mammec teqqarem kenniw x wenni ittwaqeddsen zi Tbabat u x wenni issekk i-t-i-dd ɣar ddunect: ‘Aqa Cek tekfared!’, minzi Necc nniɣ: ‘Aqa Necc d Mmis n AREBBI!’? ^■   37 Mařa Necc war xedmeɣ ca řexdayem n Baba, xenni war dayi ttimnem ca. ^■   38 Maca mařa xedmeɣ tent, amnem xenni di řexdayem, waxxa kenniw ɛad war dayi tuminem, ḥima ad tessnem aqa Baba dayi u Necc aqa ayi di Baba.” ^■  

39 Arezzun ad t ṭṭfen ɛawed, maca ixtutteř asen jar ifassen nsen. ^■   40 Iruḥ ɣar ujemmaḍ n yeɣzar n L'Urdun ɣar wemcan mani tuɣa issɣeṭṭaṣ Yuḥanna deg umezwaru uca iqqim dinni. ^■   41 Usin-dd ɣares waṭṭas n iwdan, nnan: “Waxxa war iggi Yuḥanna uřa d ict n řeɛřamet, maca marra min inna x Weryaz-a d tidett!” 42 Uca umnen dayes aṭṭas diha.