1 “War ttejjim ad nhewřen wuřawen nwem. Kenniw tumnem di AREBBI, amnem ɛawed dayi. 2 Di taddart n Baba dayes aṭṭas n tzeddiɣin. Maɛlik war iǧi amenni, iři nniɣ awem t, minzi Necc ad raḥeɣ ḥima ad awem ssewjdeɣ amcan. 3 Awarni řami ruḥeɣ uca ssewjdeɣ awem amcan, xenni ad ɛeqbeɣ, ad kenniw dd-awyeɣ ɣari, ḥima, mani ǧiɣ Necc, ad din tiřim uřa d kenniw. ^■   4 U mani i ɣa raḥeɣ aqa tessnem tt, uca tessnem abrid.”

5 Inna as Tuma: “A Siditneɣ, war nessin mani i ɣa traḥed i mammec nzemmar ad nessen abrid?” 6 Yeccu inna as: “NECC d Abrid d Tidett d Tudart, war dd-ittis uřa d ijj ɣar Baba mɣir zzayi. ^■   7 Mařa tuɣa tessnem ayi, ad tiři aqa tessnem uřa d Baba. Zi řexxu aqa tessnem t, teẓrim t.”

8 Filippus inna as: “A Siditneɣ, scen aneɣ Tababat uca ikfa.” 9 Yeccu inna as: “Anect uya n řweqt qaɛ Necc akidwem, ma war d ayi tessined ɛad, a Filippus? Wenni d ayi iẓrin, iẓra Tababat. Mammec teqqared: ‘Scen aneɣ Tababat!’? ^■  

10 Ma war tumined ca aqa Necc aqa ayi di Baba d Baba aqa-t dayi? Awařen i qqareɣ, war ten qqareɣ ca zi ɣari, maca Baba wenni dayi izeddɣen, Netta ittegg řexdayem-a. ^■  

11 Amnem ayi aqa Necc aqa ayi di Baba u Baba aqa-t dayi, u mařa lla, amnem ayi x ssibbet n řexdayem simant nsent.

12 S tidett, s tidett, Necc ad awem iniɣ: Wenni dayi yumnen, aqa řexdayem i tteggeɣ, ad zzaysent igg uřa d netta uca ad igg tinni iǧan d timeqqranin x man aya, minzi Necc ad raḥeɣ ɣar Baba, ^■  

13 uca marra min ɣa tᵉttarem s Yisem inu, ad t ggeɣ ḥima ad ittwassɛuǧ Tbabat di Mmis. ^■  

14 Mařa d ayi ɣa tᵉttarem s Yisem inu, ad t ggeɣ.

15 Mařa texsem ayi, ṭṭfem di tweṣṣa inu, ^■  

16 uca Necc ad ẓẓaǧeɣ i Baba u Netta ad awem iwc ijj n Umefdi nneɣni ḥima ad kiwem iqqim i řebda:

17 Arruḥ n tidett tenni mani ddunect war tzemmar ad t teqbeř, minzi war t tᵉttwiři, war t tessin. Maca kenniw tessnem t, minzi Netta ittɣima akidwem u Netta aqa-t daywem.”

18 “War kenniw ttejjiɣ ca d iyujiřen, maɣar awarni drus n řweqt Necc ad ɣarwem dd-aseɣ ɛawed. ^■  

19 Ddunect war d ayi tẓarr ɛad, maca kenniw ad ayi twařam. Minzi Necc ddareɣ, ad teddarem uřa d kenniw. 20 Deg wass nni ad tessnem, aqa Necc aqa ayi di Baba, kenniw dayi u Necc daywem.

21 Wenni ɣar iǧa tiweṣṣa inu uca ad daysent iṭṭef d wenni d ayi ittexsen, u wenni d ayi ittexsen, uřa d Baba ad t ixs u Necc ad t xseɣ ɛawed uca ad as ssecneɣ Ixef inu.” 22 Inna as Yahuda, war iǧi d Isxariyuṭi: “A Sidi, mammec d aneɣ i ɣa tessecned Ixef nnek, war iǧi ca i ddunect?” 23 Yeccu yarra-dd, inna as: “Mařa ca n yijjen ixs ayi, xenni ad iṭṭef deg wawař inu uca Baba ad t ixs uca ɣares i dd ɣa nas u ɣares i ɣa nezdeɣ. 24 Wenni war d ayi ittexsen, war ittᵉṭṭif ca deg wawař inu, uca awař-a i tesřim, war iǧi ca zi ɣari, maca zi Tbabat wenni d ayi dd-issekken. ^■  

25 Ssiwřeɣ akidwem man aya umi Necc ɛad akidwem. 26 Maca Amefdi, Arruḥ Iqeddsen, wenni i dd ɣa issekk Baba s Yisem inu, ad awem isseřmed kuřci, ad awem issfekkar marra min d awem nniɣ. ^■  

27 Řehna ad awem t jjeɣ, Necc ad awem wceɣ řehna inu. Necc ad awem wceɣ, war iǧi ca am mammec daywem tᵉttic ddunect. War tejjim ad nhewřen wuřawen nwem, war tteggʷeden ca. ^■   28 Aqa tesřim Necc nniɣ awem: ‘Necc ad uyureɣ uca ad ɣarwem dd-aseɣ ɛawed’. Mařa texsem ayi, ad tfarḥem, minzi aqa ad raḥeɣ ɣar Baba, minzi Baba imɣar xafi! ^■   29 Uca řexxu, xzar, Necc nniɣ awem tt qbeř ma i ɣa imsar, ḥima kenniw, x minni i ɣa yiři uya, ad tamnem. ^■   30 War kiwem ssiwiřeɣ ɛad aṭṭas ktar, ad dd-yas umeqqran n ddunect-a, war ɣares ittiři walu dayi, ^■   31 ḥima ad tessen ddunect aqa Necc ttexseɣ Baba uca ggiɣ min d ayi iweṣṣa Baba. Kkarem, ad nuyur ssanita.” ^■