1 Awarni man aya tuɣa Yeccu iggur di Ljalil, war ixs ad yuyur di Yahudiyya, minzi Udayen tuɣa arezzun ad t nɣen. 2 Iqarreb-dd Řɛid n Wudayen umi qqaren Řɛid n Iɛuccuten. ^■   3 Nnan as aytmas: “Ffeɣ ssanita, ruḥ ɣar temmurt n Yahudiyya ḥima uřa d imeḥḍaren nnek zemmaren ad ẓaren řexdayem nni tᵉttegged. 4 Uřa d ijj war ittegg ca n tmesřact s tnuffra, mařa ixs ad t igg s bṭayṭay. Mařa teggid timesřayin-a, scen Ixef nnek i ddunect.” 5 Minzi uřa d aytmas war dayes uminen ca. ^■   6 Inna asen Yeccu: “Řweqt inu ɛad war dd-tiwiḍ, maca řweqt nwem aqa-tt řebda akidwem. 7 Ddunnit war tzemmar ad kenniw tcarh, maca nettat tcarh ayi, minzi Necc cehhdeɣ xas belli řexdayem nnes d tiɛeffanin. ^■   8 Ruḥem kenniw ɣar Řɛid-a. Necc war ttriḥeɣ ca ɣar Řɛid-a, minzi řweqt inu ɛad war tkemmeř.” ^■   9 Awarni řami i d asen inna ammu, iqqim di Ljalil.

10 Maca umi geɛɛden aytmas ɣar Řɛid, iruḥ uřa d Netta ɣar Řɛid, war dd-iḍhar ɣar barra, maca igga axmi innufar.

11 Udayen arezzun xas di Řɛid, nnan: “Mani iǧa Wanita?” ^■  

12 Aṭṭas zi řɣaci temtumen xas. Ca zzaysen nnan: “Netta d aṣebḥan” Maca inneɣni nnan: “Lla, maɣar issxarriq x řɣaci!” ^■  

13 Maca uřa d ijj war xas issiweř s bṭayṭay zi ssibbet n tiggʷudi zeg Wudayen. ^■  

14 Maca ařami iɛdu wezyen zi Řɛid, igeɛɛed Yeccu ɣar Zzawect Tameqqrant, isseřmad din.

15 Udayen dehcen, nnan: “Mammec igga Netta issen Idlisen am war ten iɣri ca?”

16 Yeccu yarra-dd xasen, inna: “Taɣuri inu war teǧi ca inu, maca n wenni d ayi dd-issekken. ^■  

17 Mařa ijjen ixs ad igg min ixs Netta, ad issen ma aqa taɣuri aya zi AREBBI niɣ aqa ssawařeɣ Necc zeg uxarreṣ n yixef inu.

18 Wenni issawařen zeg uxarreṣ ɣar ixef nnes yarezzu aɛuǧi nnes, maca Wenni yarezzun aɛuǧi n Wenni t-i-dd issekken, aqa Netta d tidett, war dayes bu řɣecc.

19 Ma war iǧi d Musa i d awem iwcin Ccariɛa? Maca uřa d ijj zzaywem war ittegg Ccariɛa? I mayemmi xenni tarezzum ad ayi tenɣem?” ^■  

20 Řɣaci yarra-dd, inna: “Dayek cciṭan, wi yarezzun ad Cek ineɣ?” ^■   21 Yeccu yarra-dd, inna asen: “Ggiɣ ict n řxedmet uca kenniw tᵉttbehtem marra. 22 I uya Musa iwca awem-dd axtan, waxxa axtan war iǧi ca zi Musa, maca zi řejdud nwem, u xenni txettnem i bnadem di ssebt. ^■   23 Mařa iqbeř bnadem ad ittwaxten di ssebt ḥima war tᵉttwareẓẓi Ccariɛa n Musa, mammec i xafi i ɣa tcetcam řami ssgenfiɣ bnadem ikmeř di ssebt? 24 War ḥekkmem x teqcurt n bnadem, maca ḥekmem s yijj n řḥukm iseggden.” ^■  

25 Nnan iryazen zi Urcalim: “Ma war iǧi d Wa i yarezzun ad t nɣen? 26 Maca xzar, issawař s bṭayṭay, war d as qqaren walu. Ad taɣ aqa ssnen imɣaren n řgens nican belli s tidett Wanita d Lmasiḥ? 27 Maca nessen Wa, manis Netta, maca xmi dd ɣa yas Lmasiḥ, uřa d ijj war issin manis Netta.” ^■   28 Řami tuɣa isseřmad di Zzawect Tameqqrant, iřaɣa Yeccu s jjehd, inna: “Kenniw tessnem ayi u tessnem manis Necc. Necc war dd-usiɣ s řxaḍar inu, maca wenni d ayi dd-issekken aqa-t d tidett, kenniw war t tessinem ca. ^■   29 Maca Necc ssneɣ t, minzi Necc zzayes u Netta d wenni d ayi-dd issekken.” ^■  

30 Xenni arezzun ad t ṭṭfen, maca uřa d ijj war xas issars afus, minzi tasaɛɛet nnes war dd-tiweḍ ɛad. ^■  

31 Aṭṭas zi řɣaci umnen zzayes, nnan: “Xmi dd ɣa yas Lmasiḥ, ma ad igg řeɛřamat ktar zi tina i igga Wa?” ^■  

32 Ifarisiyyen sřin min xas itemten řɣaci, uca nitni d imeqqranen n ikehhanen ssekken-dd iɛessasen ḥima ad t ṭṭfen. 33 Yeccu inna: “Necc ad kidwem qqimeɣ drus ɛad, xenni ad raḥeɣ ɣar wenni d ayi dd-issekken. ^■   34 Ad xafi tarzum, war dayi tᵉttᵉṭṭifem u mani i ɣa iřiɣ Necc, war tzemmarem ad dd-tadfem.” ^■   35 Nnan Wudayen jar asen: “Mani i ɣa iraḥ Netta ařami war nzemmar ad t naf. Ma xenni ixs ad iraḥ ɣar temmura n řegnus? Ma ixs ad isseřmed řegnus i war ittimnen? 36 Min iɛna wawař-a i inna: ‘Ad xafi tarzum, war dayi tᵉttᵉṭṭifem, u mani i ɣa iřiɣ Necc, war tzemmarem ad dd-tadfem!’?”

37 Deg wass ameqqran, ass aneggaru n Řɛid, ikkar ibedd-dd Yeccu, iřaɣa, inna: “Mařa ifud ḥed, ejj i-t ad ɣari dd-yas uca ad isu. ^■   38 Wenni dayi i ɣa yamnen, am mammec nnant tirra: Ad zzayes azzřen iɣezran n Waman Iddaren!” ^■   39 Inna man aya x Arruḥ i ɣa qebřen inni dayes ittamnen. Minzi Arruḥ Iqeddsen war d asen immewc ɛad, minzi Yeccu war ittwassɛuǧi ɛad. ^■  

40 Aṭṭas zi řɣaci, umi sřin awař-a, nnan: “D Wa d Anabi s tidett!” ^■   41 Inneɣni nnan: “Wa d Lmasiḥ!”, maca ca nneɣni zzaysen nnan: “Ma ggur ad dd-yas Lmasiḥ zi Ljalil? ^■   42 Ma war ini wedlis, aqa Lmasiḥ ad dd-yas zi zzariɛet n Dawud, zi Bayt-Laḥm, zi dcar n Dawud?” ^■   43 Uca imsar umsebḍi n řɣaci di ssibbet nnes. 44 Ca zzaysen xsen ad t ṭṭfen, maca uřa d ijj war xas issars ifassen.

45 Xenni dewřen-dd iɛessasen ɣar imeqqranen n ikehhanen d Ifarisiyyen. Ikehhanen nnan asen: “Mayemmi war t-i-dd-tiwyem?” 46 Arrin-dd xasen iɛessasen: “Ɛemmarṣ war issiweř uřa d ijj n bnadem am mammec issawař Weryaz-a!” 47 Nnan asen Ifarisiyyen: “Ma uřa d kenniw ɛawed tweddarem? 48 Ma xenni din ca n ijjen zeg imeqqranen n řgens niɣ zeg Ifarisiyyen yumen zzayes? ^■   49 Maca řɣaci aya i war issinen ca Ccariɛa, aqa ittwanɛeř.” 50 Nikudimus wenni dd-yusin ɣar Yeccu s ǧiřet u tuɣa d ijjen zzaysen, inna asen: ^■   51 “Ma ad teḥkem Ccariɛa nneɣ x ijj n bnadem, břa ma ad zzayes sřen, ad ssnen min igga?” ^■   52 Arrin-dd, nnan as: “Ma uřa d cek ad taɣ zi Ljalil? Arzu, xzar, uřa d ijj n unabi war dd-ittekk ca zi Ljalil.” 53 Xas uca iruḥ kuř ijjen ɣar taddart nnes.