1 Maca Yeccu iruḥ ɣar wedrar n Zzitun. 2 Di ṣṣbeḥ yusa-dd ɛawed ɣar Zzawect Tameqqrant, usin-dd ɣares iwdan marra. Xenni am iqqim, ibda isseřmad i-ten. 3 Imseřmaden n idlisen d Ifarisiyyen iwyen as-dd ict n temɣart, tᵉttwaṭṭef tᵉttegg zzina. Ssbedden tt di řwest, 4 nnan as: “A Amseɣɣar, tamɣart-a tᵉttwaṭṭef tᵉttegg zzina. 5 Iweṣṣa Musa di Ccariɛa ad narjem timɣarin amecnaw tanita. Xenni min ɣa tinid Cek?” ^■   6 Nnan as aya ḥima ad t jarrben, ḥima ad ɣarsen tiři minzi xas i ɣa cetcan. Maca Yeccu yuḍar swadday, yura s uḍaḍ nnes di temmurt.

7 Řami qqimen ammu t ttesseqsan, ibedd, inna asen: “Wi zzaywem iǧan břa ddnub, ad xas inḍar aẓru amezwaru.” ^■   8 Xenni yuḍar ɛawed swadday uca yura di temmurt. 9 Řami sřin man aya, ffɣen ijjen awarni wenneɣni, imeqqranen d amezwaru. Tamɣart nni ibedden di řwest jjin tt weḥḥdes.

10 Řexdenni Yeccu ikkar, inna i temɣart: “Mani ǧan nitni? Ma war cem iḥakem uřa d ijjen?”

11 Nettat tenna: “Uřa d ijj, a SIDI!” Yeccu inna as: “Uřa d Necc war cem ttḥakameɣ ca. Ruḥ, war ttɛawad ad tegged ddnub zi ssa tsawent!” ^■  

12 Issiweř Yeccu ɛawed akidsen, inna: “NECC d Tafawt n ddunect. Wenni d ayi ɣa iḍfaren, war iggur ɛemmarṣ di taǧest, maca ad yaf Tfawt n Tudart.” ^■  

13 Nnan as Ifarisiyyen: “Cek tcehhded x yixef nnek, cchadet nnek war teǧi ca d tidett.”

14 Yeccu yarra-dd, inna asen: “Ɛad mařa Necc cehdeɣ x yixef inu, waxxa amenni cchadet inu aqa d tidett, minzi Necc ssneɣ manis dd-usiɣ u mani i ɣa raḥeɣ, maca kenniw war tessinem ca manis dd-usiɣ uřa mani i ɣa raḥeɣ. ^■  

15 Kenniw tᵉttḥakamem ɛlaḥsab ddat, Necc war ttḥakameɣ uřa x ijjen.

16 U Necc, mařa ḥakmeɣ, ad yiři řeḥkam inu d tidett, minzi Necc war ǧiɣ bu weḥḥdi, maca Necc d Baba wenni d ayi dd-issekken.

17 Tura ɛawed di Ccariɛa nwem belli cchadet n tnayen n iwdan d tidett. ^■  

18 NECC d wenni icehhden x yixef inu uca uřa d Baba wenni d ayi-dd issekken, iched xafi.” ^■  

19 Nitni nnan as: “Mani iǧa Babac?” Yeccu yarra-dd, inna asen: “Kenniw war d ayi tessinem ca u war tessinem Baba. Maɛlik kenniw d ayi tessnem ad tiři tessnem uřa d Baba.” ^■  

20 Inna awařen-a di mani tuɣa řexzen n ṣṣedqet, am tuɣa isseřmad di Zzawect Tameqqrant. War t iṭṭif uřa d ijj, minzi tasaɛɛet nnes tuɣa ɛad war dd-tiwiḍ. ^■  

21 Yeccu inna asen ɛawed: “Necc ad raḥeɣ, kenniw ad xafi tarzum, ad temmtem di ddnub nwem. Mani i ɣa raḥeɣ Necc, war tzemmarem kenniw ad dd-tasem.” ^■   22 Udayen nnan: “Ma ad ineɣ ixef nnes řexxu, minzi Netta inna: ‘Mani i ɣa raḥeɣ Necc, war tzemmarem kenniw ad dd-tasem!’?” 23 Netta inna asen: “Kenniw zi swadday, Necc zi sennej, kenniw zi ddunect-a, maca Necc war ǧiɣ ca zi ddunect-a. ^■   24 Necc nniɣ awem, ad temmtem di ddnub nwem, maɣar mařa war tuminem ca aqa d NECC, ad temmtem di ddnub nwem.” ^■   25 Nnan as Wudayen: “Min teɛnid Cek?” Yeccu inna asen: “Min bdiɣ ɛad ad awem t iniɣ. 26 Necc ɣari aṭṭas n tmesřayin i xef zemmareɣ ad xawem ssiwřeɣ uca ad xawem ḥekmeɣ, maca wenni d ayi-dd issekken aqa-t d tidett. Uca min zzayes sřiɣ, ad t iniɣ i ddunect.” ^■   27 Nitni war fhimen ca, belli tuɣa issawař akidsen x Tbabat. 28 Yeccu inna asen ɛawed: “Xmi i ɣa tessgeɛɛdem Mmis n bnadem, ad tfehmem belli aqa-t d NECC, u belli war tteggeɣ uřa d ict n řḥajjet zeg ixef inu, maca ssawařeɣ am mammec d ayi isseřmed Baba. ^■   29 Wenni d ayi dd-issekken aqa-t akidi. Baba war d ayi ijji ca weḥḥdi, minzi tteggeɣ řebda min t yarḍan.” ^■   30 Umi tuɣa issawař x tmesřayin-a, umnen dayes aṭṭas. ^■  

31 Xenni inna Yeccu i Wudayen inni dayes yumnen: “Mařa teqqimem tᵉṭṭfem deg wawař inu, ad tiřim s tidett d imeḥḍaren inu 32 uca ad tessnem tidett uca tidett ad kenniw tḥarr.” ^■   33 Nnan as: “Neccin d zzariɛet n Ibrahim, ɛemmarṣ war neɛbid ḥed. Mammec tzemmared ad tinid: ‘Kenniw ad tᵉttwaḥarrem!’?” ^■   34 Yeccu yarra-dd xasen: “S tidett, s tidett, Necc ad awem iniɣ: Marra wenni itteggen ddnub netta d amsexxar n ddnub. ^■   35 Amsexxar war ittɣimi ca di taddart řebda, maca mmis ad din iqqim i řebda. 36 Xmi kenniw i ɣa iḥarr Tmemmit, ad tiřim s tidett d iḥurriyyen. ^■  

37 Necc ssneɣ, aqa kenniw d tarwa n Ibrahim, maca kenniw tarezzum ad ayi tenɣem, minzi awař inu war tzemmarem ad t tfehmem. 38 Necc ssawařeɣ s min ẓriɣ zi Baba. Uřa d kenniw tᵉtteggem zi min teẓrim zi babatwem.” ^■   39 Arrin-dd, nnan as: “Babatneɣ d Ibrahim.” Inna asen Yeccu: “Maɛlik kenniw teǧim zeg ayt n Ibrahim ad yiři aqa tᵉtteggem řexdayem n Ibrahim. ^■   40 Maca řexxu tarezzum ad ayi tenɣem, Necc d ijj n Bnadem i tuɣa akidwem issawařen s tidett i sřiɣ zi AREBBI. Man aya war t iggi ca Ibrahim. ^■   41 Kenniw tᵉtteggem řexdayem n babatwem.” Nitni nnan as: “Neccin war dd-nexřiq ca zi farq-ccɣeř, aqa ɣarneɣ ijjen wenni d Babatneɣ, aqa-t d AREBBI.”

42 Inna asen Yeccu: “Maɛlik AREBBI d Babatwem, iři aqa texsem ayi, minzi Necc ffɣeɣ-dd zi AREBBI uca war dd-usiɣ ca zeg ixef inu, maca Netta issekk ayi-dd. ^■   43 Mayemmi war tefhimem i wawařen inu? Minzi kenniw war tzemmarem ad tesřem i wawař inu! 44 Aqa kenniw teffɣem zi babatwem, ibřis, uca texsem ad teggem imeẓran n babatwem. Netta tuɣa ineqq iwdan zeg umezwaru u war ibedd di tidett, minzi war dayes bu tidett. Meřmi ma issawař s uxarriq, issawař s min dayes, minzi netta d bu-ixarriqen uřa d tababat n uxarriq. ^■   45 Maca umi Necc qqareɣ awem tidett, kenniw war dayi tᵉttimnem ca. 46 Wi zzaywem ad ayi isseqneɛ x ddnub? Umi qqareɣ tidett, mayemmi war dayi tᵉttimnem ca? 47 Wenni iǧan zi AREBBI, ittesřa i wawařen n AREBBI. Minzi kenniw war teǧim ca zi AREBBI, s uyenni kenniw war tᵉttesřim ca.” ^■  

48 Udayen arrin-dd, nnan as: “Ma war iǧi nican umi nenna, aqa Cek zi Samarya u dayek cciṭan?” ^■   49 Yeccu yarra-dd, inna: “Necc war dayi bu cciṭan, maca Necc ttweqqareɣ Baba uca kenniw tesseḥqaram ayi. ^■   50 Necc war arezzuɣ ca aɛuǧi inu. Aqa din Ijjen i xas yarezzun u Ijjen i ɣa iḥkem. 51 S tidett, s tidett, Necc ad awem iniɣ: Mařa ca n yijjen iṭṭef deg wawař inu, ɛemmarṣ war ittwiři řmewt i řebda.” ^■   52 Nnan as Wudayen: “Řexxu nessen belli dayek cciṭan. Aqa Ibrahim d inabiyyen mmuten. Cek teqqared: ‘Mařa ca n yijjen iṭṭef deg wawař inu, ɛemmarṣ ad iqqas řmewt i řebda!’ 53 Ma Cek temɣared x jedditneɣ Ibrahim wenni immuten? Uřa x inabiyyen nni immuten. Min tḥesbed ixef nnek?” ^■   54 Inna asen Yeccu: “Mařa Necc ssɛuǧiɣ ixef inu, aɛuǧi inu war iǧi d walu. Baba, aqa issɛuǧa ayi, wenni min xef teqqarem: ‘Netta d AREBBI nneɣ!’ 55 Kenniw war t tessinem, maca Necc aqa ssneɣ t. Mařa nniɣ: ‘War t ssineɣ!’, ad iřiɣ Necc d bu-ixarriqen am kenniw. Maca Necc ssneɣ t uca ttᵉṭṭfeɣ deg wawař nnes. 56 Jedditwem Ibrahim tuɣa ittraja s řefraḥet ḥima ad iẓar ass inu uca iẓra i-t, ifarḥ.” ^■   57 Nnan as Wudayen: “Ɛad war ɣarek bu xemsin n iseggʷusa, mammec teggid teẓrid Ibrahim?” 58 Inna asen Yeccu: “S tidett, s tidett, Necc ad awem iniɣ, qbeř ma tuɣa Ibrahim, tuɣa NECC ǧiɣ.” 59 Xenni ksin iẓra ḥima ad t arejmen. Maca Yeccu issnuffar ixef nnes uca iffeɣ zi Zzawect Tameqqrant am icuqq di řwest nsen, uca ammu i iruḥ. ^■