1 Awarni man aya iruḥ Yeccu ɣar ujemmaḍ n řebḥar n Ljalil, wenni umi qqaren ɛawed řebḥar n\add* Tibiriyas. 2 Iḍfar i-t-i-dd ijj n řɣaci d ameqqran, minzi ẓrin řeɛřamat i igga i imehřac. 3 Řexdenni igeɛɛed Yeccu ɣar wedrar uca iqqim dinni ak-d imeḥḍaren nnes. 4 Taɣarṣt n Useɛdu, Řɛid n Wudayen, war d as iqqim ca. ^■  

5 Řexdenni issgeɛɛed Yeccu tiṭṭawin nnes uca, umi iẓra ijj n řɣaci d ameqqran yusa-dd ɣares, inna i Filippus: “Manis i ɣa nseɣ aɣrum, ḥima ad ccen ina?” ^■   6 Inna ammu ḥima ad t ijarreb, minzi Netta issen min ɣa yegg. 7 Yarra-dd xas Filippus: “Aɣrum s mitayen n dinar war ten ittqeddi ḥima ad iksi kuř ijjen zzaysen mɣir drus waha.” 8 Ijjen zeg imeḥḍaren nnes, netta d Andrawus, umas n Cimɛun Buṭrus, inna as: 9 “Aqa da ijj n uḥenjir ɣares xemsa n tecnifin n imendi d tnayen n iseřman, maca manawya i marra ina?”

10 Yeccu inna asen: “Sɣimem iwdan.” Tuɣa din aṭṭas n řeḥtic deg wemcan nni. S uyenni qqimen yeryazen, aqa aten di xemsa-ařaf idsen.

11 Yeccu iksi ticnifin, u awarni iqada, ibḍa i-tent x yenni din iqqimen. Ibḍa netta amenni ɛawed iseřman ɛlaḥsab anect ixsen ad ccen. ^■  

12 Řami jjiwnen, inna i imeḥḍaren nnes: “Yrum iřeqqwaz iceṭṭen, ḥima uřa d ict n řḥajjet war tᵉttḍeyyiɛ!”

13 Yrun ten xenni uca ɛemmaren tenɛac n tsuǧatin s iřeqqwaz nni iceṭṭen ɣar yenni iccin zi xemsa n tecnifin n imendi.

14 Řami ẓrin iwdan řeɛřamet i igga Yeccu, nnan: “Wa d tidett d Anabi i igguren ad dd-yas ɣar ddunect.” ^■  

15 Umi issen Yeccu, belli ad dd-asen nitni, ad t ṭṭfen ḥima ad t ggen d ajeǧid, xenni innejra ɣar wedrar, ḥaca Netta weḥḥdes.

16 Řami dd-tewḍa tmeddit, hwan-dd imeḥḍaren nnes ɣar řebḥar, ^■  

17 u awarni řami nyin di tɣarrabut, qeḍɛen řebḥar ɣar Kafarnaḥum. Tqarreb-dd taǧest u Yeccu tuɣa ɛad war ɣarsen dd-yusi.

18 Řebḥar innehweř xasen minzi asemmiḍ tuɣa ittṣuḍ aṭṭas.

19 Ařami tuɣa qeddfen řqedd n ɛřaḥař xemsa u-ɛicrin ař třatin ‘istadiyyen’, ɛřaḥař xemsa kilumitr, ẓrin Yeccu iggur x řebḥar, ittqarrab-dd ɣar tɣarrabut, uca ggʷeden. ^□   20 Inna asen: “Aqa d NECC, war tteggʷedem ca.” 21 Nitni xsen ad t ssqebřen di tɣarrabut uca xenni tiweḍ-dd tɣarrabut deɣya ɣar řbarr i ɣar iǧa ttraḥen.

22 Tiwecca nnes iẓra řɣaci nni ibedd x ujemmaḍ n řebḥar, belli war din tuɣi uřa d ict n tɣarrabut nneɣnit mɣir icten, tenni mani dayes udfen imeḥḍaren nnes, u Yeccu war yudif ca di tɣarrabut ak-d imeḥḍaren nnes. 23 Maca usint-i-dd tɣarruba nneɣni zi Tibiriyas zzat i wemcan mani ccin aɣrum nni ibarek Yeccu. 24 Řami iẓra řɣaci belli Yeccu war din iǧi ɛad uřa d imeḥḍaren nnes, udfen uřa d nitni di tɣarruba aya uca usin-dd ɣar Kafarnaḥum arezzun x Yeccu.

25 Řami t ufin x ujemmaḍ n řebḥar, nnan as: “A Amseřmad nneɣ, meřmi dd-tusid da?” 26 Yeccu yarra-dd xasen, inna: “S tidett, s tidett, Necc ad awem iniɣ: Kenniw tarezzum xafi, war iǧi umi teẓrim řeɛřamat, maca umi teccim aɣrum uca tejjiwnem. 27 War ttxedmem i macca ixessaren, maca i macca ittɣiman i Tudart ittduman, tenni d awem i ɣa iwc Mmis n bnadem, minzi AREBBI, Tababat, issars ṭṭabeɛ nnes xas.” ^■   28 Nnan as: “Min i ɣa negg, ḥima ad nzemmar ad negg řexdayem n AREBBI?” 29 Yarra-dd Yeccu, inna asen: “Ta d řxedmet n AREBBI, maḥend ad tamnem deg Wenni dd-issekk Netta.” ^■   30 Xas uca nnan as: “Man řeɛřamet i ɣa tegged xenni ḥima ad t nẓar uca ad zzayek namen? Man řxedmet i ɣa tegged? ^■   31 Řejdud nneɣ ccin ‘manna’ di řexřa am mammec tura: ‘Netta iwca asen-dd aɣrum zeg ujenna ḥima ad t ccen’.” ^■  

32 Inna asen Yeccu: “S tidett, s tidett, Necc ad awem iniɣ: War iǧi d Musa i d awem iwcin aɣrum zeg ujenna, maca Baba ittic awem Aɣrum n tidett zeg ujenna. 33 Minzi Aɣrum n AREBBI d Netta wenni dd-ihekkwan zeg ujenna uca ittic Tudart i ddunect.” 34 Nnan as: “A Siditneɣ, ewc aneɣ-dd řebda aɣrum-a.” 35 Yeccu inna asen: “NECC d Aɣrum Iddaren. Wenni ɣari dd ɣa yasen, war ittřiẓ ɛemmarṣ u wenni dayi i ɣa yamnen war ittfidi ɛemmarṣ. ^■   36 Maca Necc nniɣ awem, waxxa kenniw teẓrim ayi, war tuminem ca. 37 Kuř ijj i d ayi ɣa iwc Baba, ad ɣari dd-yas u wenni ɣari dd ɣa yasen, war t ssuffuɣeɣ ca ɣar barra. 38 Minzi Necc hwiɣ-dd zeg ujenna, war iǧi ca ḥima ad ggeɣ min xseɣ Necc, maca ḥima ad ggeɣ min ixs wenni d ayi dd-issekken. ^■   39 D man aya min ixs wenni d ayi dd-issekken, aqa Necc war ssweddareɣ uřa d ijjen zeg yenni d ayi iwca, maca ad t-i-dd-ssnekkareɣ deg wass aneggaru. ^■   40 D man aya min ixs Baba wenni d ayi dd-issekken, aqa kuř ijj wenni i ɣa iẓaren Tamemmit uca ad dayes yamen, ad ɣares tiři Tudart ittduman uca ad t-i-dd-ssnekkareɣ deg wass aneggaru.” ^■  

41 Udayen cetcan zzayes, minzi inna: “NECC d Aɣrum i dd-ihwan zeg ujenna.” 42 Nnan: “Ma d wanita war iǧi bu d Yeccu, mmis n Yusuf, neccin nessen babas d yemmas? Mammec i ɣa yini: ‘Necc hwiɣ-dd zeg ujenna?’ ” ^■   43 Yeccu yarra-dd xasen, inna: “War ttcetcam ca jar awem. 44 War izemmar uřa d ijj ad ɣari dd-yas, mɣir mařa ijebd i-t-i-dd Tbabat wenni d ayi dd-issekken uca Necc ad t-i-dd-ssnekkareɣ deg wass aneggaru. ^■   45 Aqa tura deg idlisen n inabiyyen: ‘Nitni marra ad ttwasřemden zi AREBBI!’ S uyenni kuř ijj wenni d as isřin zi Tbabat u iřmed i-t zzayes, ad ɣari dd-yas. ^■   46 Uřa d ijj war iẓri Tababat, mɣir wenni iǧan zi AREBBI d Netta i iẓrin Tababat. ^■   47 S tidett, s tidett, Necc ad awem iniɣ: Wenni dayi ittamnen, ad ɣares tiři Tudart ittduman. ^■   48 NECC d Aɣrum Iddaren. 49 Řejdud nwem ccin ‘manna’ di řexřa uca mmuten. ^■   50 Maca man aya d Aɣrum i dd-ihwan zeg ujenna, ḥima bnadem ad zzayes yecc, war ittmetti ca. 51 NECC d Aɣrum Iddaren i dd-ihwan zeg ujenna. Mařa ijjen icca zeg Weɣrum-a, ad iddar i řebda. Aɣrum nni i ɣa wceɣ Necc, netta d ddat inu i ɣa wceɣ i Tudart n ddunect.” ^■  

52 Udayen mmenɣen jar asen, nnan: “Mammec i ɣa yegg wanita ad aneɣ iwc ddat nnes ḥima ad t necc?” ^■   53 Inna asen Yeccu: “S tidett, s tidett, Necc ad awem iniɣ: Mařa war teccim ca ddat n Mmis n bnadem u war teswim idammen nnes, war ɣarwem bu Tudart deg ixef nwem. 54 Wenni i ɣa iccen ddat inu uca ad isu idammen inu, ad ɣares tiři Tudart ittduman u Necc ad t-i-dd-ssnekkareɣ deg wass aneggaru. ^■   55 Minzi ddat inu d macca d tidett uca idammen inu d tissit d tidett. 56 Wenni i ɣa iccen ddat inu uca ad isu idammen inu, ad dayi iqqim u Necc dayes. 57 Am mammec d ayi dd-issekk Tbabat iddaren uca Necc ddareɣ zi Tbabat, ammu ɛawed wenni zzayi i ɣa iccen ad zzayi iddar. 58 Wa d Aɣrum i dd-ihwan zeg ujenna. War iǧi ca amecnaw mammec ccin řejdud ‘manna’ uca mmuten. Wenni i ɣa iccen Aɣrum-a, ad iddar i řebda.” ^■   59 Inna man aya di temzida am tuɣa isseřmad di Kafarnaḥum.

60 Aṭṭas n imeḥḍaren nnes, umi sřin man aya, nnan: “Awař-a iqseḥ. Wi izemmaren ad as iseř?” 61 Maca Yeccu issen deg ixef nnes, aqa imeḥḍaren nnes cetcan x man aya, uca inna asen: “Ma man aya d řefḍiḥet i kenniw? 62 I mammec mařa teẓrim Mmis n bnadem ittgeɛɛad ɣar mani iřa iǧa qbeř? ^■   63 Arruḥ d Netta isseddaren. Ddat war ineffeɛ i walu. Awařen i d awem nniɣ aqa aten d Arruḥ d Tudart. ^■   64 Maca aqa din ca jar awem inni war yuminen.” Minzi Yeccu issen zeg umezwaru man yen iǧan inni war yuminen u man wen t i ɣa iɣdaren. ^■   65 Inna asen: “S uyenni nniɣ awem: War izemmar uřa d ijj ad ɣari dd-yas mɣir mařa temmewc as zi Baba.” ^■  

66 Zi řweqt nni dewřen aṭṭas zeg imeḥḍaren nnes ɣar ḍeffar, war qqimen ca gguren akides. 67 Inna Yeccu i tenɛac: “Ma uřa d kenniw texsem ad tuyurem?” 68 Cimɛun Buṭrus yarra-dd xas, inna: “A Sidi, wi ɣar i ɣa nraḥ? Cek ɣarek awařen n Tudart ittduman, ^■   69 u neccin numen u nessen aqa Cek d Lmasiḥ, Mmis n AREBBI Iddaren.” ^■  

70 Yeccu yarra-dd xasen: “Ma war iǧi d Necc i kenniw dd-ixḍaren d tenɛac? Uca ijjen zzaywem d cciṭan.” ^■   71 Inna man aya x Yahuda, mmis n Cimɛun Isxariyuṭi, minzi wanita tuɣa ixs ad t isellem. Netta d ijjen zi tenɛac.