1 Awarni man aya yiweḍ-dd ijj n Řɛid n Wudayen uca igeɛɛed Yeccu ɣar Urcalim. ^■   2 Ɣar Tewwart n Wuǧi di Urcalim tuɣa din ijj n ugeřmam i useɣḍeṣ umi qqaren s Tɛibranit ‘Bayt-Xisda’, tuɣa ɣares xemsa n iseqqifen ak-d ikulwaren d ipilaren. 3 Daysen tuɣa iqqim ijj n řɣaci d ameqqran n imehřac d idarɣařen d iqejdaḥen d ineɛḍaben, ttrajan anhezzi n waman. 4 Minzi zi řweqt ɣar řweqt ihekkwa-dd ijj n lmalak ɣar tyeřmamt-a i useɣḍeṣ, issenhezza aman, u wenni i dd ɣa ihwan d amezwaru awarni anhezzi n waman ad ittwasgenfa, mammec ma iǧa řehřac nnes.

5 Tuɣa din ijj n bnadem dayes řehřac řmijař n tmenya u-třatin n iseggʷusa. 6 Iẓra Yeccu aryaz-a isenned dinni, issen belli tuɣa iḥřec ammu aṭṭas zeg wami. Inna as: “Ma texsed ad teggenfid?” 7 Yarra-dd xas umehřuc, inna: “Wah, a Sidi, maca war ɣari ijjen wenni d ayi ɣa issehwan ɣar tuyeřmamt n useɣḍeṣ xmi i ɣa ttwassenhezzen waman. Xmi ttraḥeɣ necc, ihekkwa-dd wenneɣni zzati.” 8 Yeccu inna as: “Kkar, teksid tassut nnek, tuyured!” ^■   9 Deɣya iggenfa bnadem nni uca iksi tassut nnes, yuyur. Man aya tuɣa deg wass n ssebt. ^■  

10 Nnan Wudayen i wenni tuɣa ittwasgenfan: “Wa d ass n ssebt, war ɣarek bu ttesriḥ maḥend ad teksid tassut nnek!” ^■  

11 Yarra-dd, inna asen: “Wenni d ayi issgenfan, inna: ‘Ksi tassut nnek, traḥed!’ ”

12 Xenni sseqsan t: “Min iɛna Bnadem-a i d ac innan: ‘Ksi tassut nnek, traḥed!’?”

13 Wenni ittwasgenfan war issin min iɛna Yeccu, minzi innejra minzi aqa din aṭṭas n řɣaci deg wemcan nni.

14 Awarni man aya yufa i-t Yeccu di Zzawect Tameqqrant, inna as: “Xzar, aqa teggenfid, war ttegg bu ddnub ɛad, ḥima war d ac ittemsar min iǧan d aɛeffan zi min iǧan qbeř.” ^■  

15 Aryaz iruḥ, ixebbar Udayen belli d Yeccu i-t issgenfan.

16 S uyenni darrcen Wudayen x Yeccu, arezzun ad t nɣen, minzi igga man aya deg wass n ssebt.

17 Maca Yeccu yarra-dd, inna asen: “Aqa Baba ixeddem ař yiḍa u xenni Necc ɛawed aqa xeddmeɣ.” ^■  

18 Di ssibbet-a arezzun Wudayen ɛad ktar ḥima ad t nɣen, war iǧi waha minzi ixařef ssebt, maca uřa minzi Netta inna aqa AREBBI d Babas, issqudda ixef nnes ak-d AREBBI. ^■  

19 Yarra-dd Yeccu, inna asen: “S tidett, s tidett, Necc ad awem iniɣ, Tamemmit war izemmar ad igg uřa d ict n tmesřact s yixef nnes, mɣir mařa iẓra Tababat ittegg i-tt. Min ma ittegg Netta uřa d Tamemmit ittegg amenni. ^■   20 Tababat ittexs Mmis, isscen as marra min ittegg, uca ad as isscen řexdayem timeqqranin x tina ḥima ad tdehcem. ^■   21 Am mammec d issnekkar Tbabat imettinen uca ittic tudart, amenni uřa d Tamemmit ittic tudart i wenni ixs. 22 Tababat war ittḥaseb uřa d ijj, maca iwca lḥisab marra i Tmemmit, ^■   23 ḥima ad weqqaren marra Tamemmit am ttweqqaren Tababat. Wenni war ittweqqaren Tamemmit, war ittweqqar ca uřa d Tababat wenni i-t-i-dd issekken. ^■  

24 S tidett, s tidett, Necc ad awem iniɣ: Wenni ittesřan i wawař inu uca yumen deg wenni d ayi dd-issekken, ɣares Tudart ittduman, war dd-ittis ca ɣar lḥisab, maca netta aqa immuṭi zi řmewt ɣar tudart. ^■   25 S tidett, s tidett, Necc ad awem iniɣ: Ad dd-tas tsaɛɛet, aqa-tt řexxu, i di imettinen ad sřen tmijja n Mmis n AREBBI u inni i tt ɣa isřen, ad ddaren. ^■   26 Maɣar am mammec ɣar Tbabat ɣares Tudart deg ixef nnes, ammu i iwca uřa i Tmemmit ḥima ad ɣares tiři Tudart deg ixef nnes, 27 uca iwca as ṣṣulṭa ḥima ad iḥaseb, minzi Netta d Mmis n bnadem. 28 War ttɛejibem ca s man aya, aqa ad dd-tas tsaɛɛet i di marra inni iǧan deg imeḍřan ad sřen tmijja nnes, ^■   29 uca ad dd-ffɣen zeg imeḍřan: inni iggin taṣebḥant ad kkaren ad raḥen ɣar tnukra i tudart u inni iggin tuɛeffna ad kkaren, ad raḥen ɣar tnukra i lḥisab. ^■  

30 Necc war zemmareɣ ad ggeɣ ca zeg ixef inu, maca am mammec ttesřiɣ, ad ḥasbeɣ u lḥisab inu d řḥeqq, minzi Necc war arezzuɣ min xseɣ, maca min ixs wenni d ayi dd-issekken. ^■   31 Maɛlik cehhdeɣ i ixef inu, iři aqa cchadet inu war teǧi ca nican. ^■   32 Aqa din Ijjen nneɣni wi xafi icehhden, u Necc ssneɣ belli cchadet i xafi icehhed, aqa d tidett i teǧa. ^■   33 Kenniw tessekkem-dd ca ɣar Yuḥanna uca netta iched i tidett. ^■   34 Maca Necc war qebbřeɣ ca cchadet n bnadem, maca Necc qqareɣ marra man aya ḥima ad teddarem. 35 Netta d řefnar yareqqen, ittlillicen, kenniw texsem ad tfarḥem s tfawt nnes ɣar ict n tsaɛɛet. 36 Maca Necc ɣari ict n cchadet d tameqqrant x tenni n Yuḥanna, minzi řexdayem i d ayi iwca Tbabat ḥima ad tent kemmřeɣ, řexdayem nni i tteggeɣ cehhdent simant nsent aqa d Tababat d Netta i d ayi dd-issekken. ^■   37 U Tababat wenni d ayi-dd issekken, d Netta i xafi icehhden. Kenniw ɛemmarṣ war tesřim tmijja nnes uca war teẓrim ca addud nnes ^■   38 uca awař nnes war daywem ittɣimi ca řebda, minzi kenniw war tᵉttimnen ca deg wenni i-t-i-dd-issekken. 39 Arzum deg Idlisen, minzi ittɣiř awem aqa daysen Tudart ittduman, u aqa aten d inni i xafi icehhden. ^■   40 Waxxa amenni kenniw war tᵉttexsem ad ɣari dd-tasem ḥima ad ɣarwem tiři Tudart ittduman.

41 War qebbřeɣ ca aɛuǧi n iwdan, 42 maca ssneɣ kenniw, aqa kenniw war ɣarwem bu tayri n AREBBI deg ixef nwem. 43 Necc usiɣ-dd s Yisem n Baba, kenniw war d ayi tqebbřem ca. Mařa yusa-dd ca n yijjen s yisem nnes, ad t tqebřem. 44 Mammec tzemmarem ad tamnem, mařa kenniw tᵉttexsem aɛuǧi n wayawya, maca war tarezzum ca x uɛuǧi n uyenni n AREBBI d Ijjen? ^■   45 War d awem ittɣiř ad zzaywem cetciɣ ɣar Tbabat. Wenni zzaywem i ɣa icetcan d Musa x wenni tessrusam asitem nwem. 46 Minzi maɛlik tumnem zi Musa, iři tumnem dayi ɛawed, minzi netta yura xafi. ^■   47 Mařa kenniw war tuminem ca deg idlisen nnes, mammec i ɣa teggem ad tamnem deg wawařen inu?”