1 Iqarreb-dd Řɛid n Weɣrum břa Antun umi qqaren Taɣarṣt n Useɛdu. ^■   2 Tuɣa imeqqranen n ikehhanen d imseřmaden n idlisen arezzun ict n tewwart ḥima ad t nɣen, maca nitni ggʷeden zeg iwdan. ^■   3 Yudef cciṭan di Yahuda wenni umi qqaren Isxariyuṭi. Netta tuɣa d ijjen zi tenɛac n rrusul. ^□  ■   4 Iruḥ, issiweř ak-d imeqqranen n ikehhanen d imseřmaden n idlisen d imgewwaden n iɛessasen n Zzawect mammec t i ɣa isellem i nitni. 5 Farḥen uca ttafqen ad as wcen tinɛacin n nnuqart. 6 Netta iwca asen awař uca yarzu ict n tewwart ḥima ad asen t isellem barra i řɣaci.

7 Yiweḍ-dd wass n Weɣrum břa Antun i di tuɣa ittxeṣṣa ad tᵉttwaɣarṣ Taɣarṣt n Useɛdu. ^■   8 Yeccu issekk-dd Buṭrus d Yuḥanna, inna asen: “Ruḥem, tesswejdem aneɣ Taɣarṣt n Useɛdu ḥima ad tt necc.” 9 Nnan as: “Mani texsed ad tt nessewjed?”

10 Inna asen: “Xzar, xmi i ɣa tadfem ɣar tendint ad kenniw iřqa ijj n weryaz, yarbu ict n teqbuct n waman. Ḍfarem t!

11 Inim i bab n taddart: ‘Amseřmad nneɣ isseqsa: Mani iǧa wexxam n inewjiwen i di i ɣa cceɣ Taɣarṣt n Useɛdu ak-d imeḥḍaren inu?’

12 Netta ad awem isscen ict n tɣurfet tmiriwt sennej, yessu s ipayasen. Swejdem tt din!”

13 Nitni ruḥen, ufin marra am mammec tuɣa d asen inna uca sswejden i Tɣarṣt n Useɛdu.

14 Umi dd-tiweḍ tsaɛɛet, yusa-dd Yeccu, u qqimen tenɛac n rrusul akides ɣar ṭṭabřa. ^■  

15 Inna asen: “Necc tuɣa weḥḥceɣ aṭṭas ad cceɣ Taɣarṣt-a n Useɛdu akidwem qbeř i ɣa weddbeɣ.

16 Minzi ad awem iniɣ, aqa war zzayes ttᵉtteɣ ɛad ař ɣa tᵉttwakemmeř di Tgeldit n AREBBI.”

17 Xenni iṭṭef ijj n řkas uca iqada, inna: “Ksim wa, bḍam t jar awem!

18 Minzi Necc ad awem iniɣ, war sesseɣ ca zi řɣiǧet n tzayart ař dd ɣa tas Tgeldit n AREBBI.”

19 Iksi aɣrum, iqada, yarẓa i-t uca iwca asen t, inna: “Ta d Arrimet inu tenni xawem immewcen. Ggem aya i řidaret inu.” ^■   20 Ammu i inna ɛawed x řkas awarni i umensi: “Řkas-a d Řɛahd n Jdid s Idammen inu inni i xawem i ɣa ittwassizřen.

21 Maca aqa da, afus n wenni d ayi ɣa isellmen aqa-t akidi ɣar ṭṭabřa. ^■   22 Mmis n bnadem ad iraḥ am mammec xas ittwakkes, maca uct x bnadem nni zi ɣa ittwasellem!” ^■  

23 Bdan ttemsseqsan jar asen, man wen zzaysen i ɣa iggen man aya.

24 Tuɣa jar asen ɛawed amcubbec x man wen zzaysen iǧan d ameqqran qaɛ. 25 Xenni inna asen Yeccu: “Ijeǧiden n řegnus ṣellṭen xasen u inni xasen iṣellṭen ttᵉttwařaɣan ‘Tarwa n rejwad!’. ^□  ■   26 Kenniw maca war ttiřim ammu, maca ameqqran daywem ad yiři am umaẓuẓ u amezwar ad yiři am umsexxar. ^■   27 Minzi man wen iǧan d ameqqran? Ma d wenni iqqimen ɣar ṭṭabřa niɣ d wenni ittsexxaren? Maca Necc di řwest nwem am wenni ittsexxaren. ^■  

28 Aqa kenniw d inni akidi iqqimen deg ijarriben inu. 29 Necc ad awem ggeɣ Tageldit am mammec i d ayi tt igga Baba, ^■   30 ḥima ad teccem ad teswem x ṭṭabřa inu di Tgeldit inu uca ad teqqimem x řekrasi n tgeldit ad tḥekmem x tenɛac n tqebbař n ayt n Israil.” ^■  

31 Inna Yeccu i Cimɛun: “Cimɛun, Cimɛun, aqa cciṭan tuɣa yarezzu ad kenniw izuzzar amecnaw irden. ^■   32 Maca Necc ẓuǧeɣ xak ḥima war ifenni l’iman nnek. U cek, xmi i ɣa tᵉtubed, xenni stebbet aytmac.” 33 Inna as Cimɛun: “A Sidi, necc aqa wejdeɣ ḥima ad kik raḥeɣ uřa ɣar řeḥbes d řmewt.” 34 Maca Yeccu inna as: “Necc ad ac iniɣ, a Cimɛun, war issququɛ uyaẓiḍ ass-a qbeř ma ad ayi tenkared třata n twařawin belli aqa tessned ayi.” ^■  

35 Inna asen: “Řami kenniw ssekkeɣ břa tacyart niɣ řeɛweč niɣ sandaliyat, ma tuɣa ittxeṣṣa awem ca?” Nnan as: “Walu!” ^■   36 Xas uca inna asen: “Maca řexxu wenni ɣar iǧa tecyart, ad tt iksi, ammu uřa d řeɛweč. Wenni war ɣar iǧi, ad izzenz arruḍ nnes uca ad zzayes iseɣ ssif.

37 Minzi Necc ad awem iniɣ, aqa ittxeṣṣa ad ttwakemmřent tira aya dayi: ‘Aqa ittwaḥseb ak-d iqṭaṭɛiyyen!’, minzi min xafi yuran, ad ittwakemmeř.” ^□  ■   38 Nnan asen: “A Siditneɣ, aqa da tnayen n řesyuf!” Inna asen: “Ikfa!”

39 Iffeɣ, iruḥ, ɣar wedrar ‘Taddart n Zzitun’ am mammec tuɣa innum, uca ḍfaren t ɛawed imeḥḍaren nnes. ^■   40 Umi ixecc ɣar wemcan nni, inna asen: “Ẓaǧem ḥima war dd-tidfem deg uɣekkwi.” 41 Ifekk ixef nnes zzaysen ɛřaḥař ticti n ijj n uḥejjar n weẓru uca iwḍa x ifadden nnes, iẓẓuǧ, ^■   42 inna: “A Baba, mařa texsed, ejj řkas-a ad xafi iɛdu. Maca war ittiři min xseɣ Necc maca min texsed Cek.” 43 Xenni iḍhar as-dd ijj n lmalak zeg ujenna, iwca as jjehd. 44 Tuɣa dayes tiggʷudi temɣar, ittẓaǧa aṭṭas uca tidi nnes tuɣa tᵉttegg amecnaw tineqqiḍin n idammen weṭṭant ɣar temmurt. ^■   45 Xenni ikkar zi tẓaǧit, yusa-dd ɣar imeḥḍaren nnes uca yufa i-ten ṭṭṣen s wecḍan. 46 Inna asen: “Mayemmi tᵉṭṭṣem? Kkarem, teẓẓaǧem ḥima war tᵉttidfem deg uɣekkwi.”

47 Am tuɣa ɛad issawař, xzar, aqa yusa-dd ijj n řɣaci ak-d Yahuda, wenni d ijjen zi tenɛac, uca netta tuɣa izwar asen, iqarreb-dd ɣar Yeccu, issudem i-t, maɣar aqa iwca asen ict n řeɛřamet: “Wenni i ɣa ssudmeɣ, d wenni Netta!” ^■   48 Inna as Yeccu: “A Yahuda, ma s usudem ad tsellmed Mmis n bnadem?” 49 Umi ẓrin inni d as dd-innḍen min imsaren, nnan as: “A Siditneɣ, ma ad t newwet s ssif?” 50 Ijjen zzaysen tuɣa iwta amsexxar n arrays n ikehhanen, iqess as amezzuɣ afusi. ^■   51 Iṭṭef Yeccu deg wawař, inna: “Ṣafi baraka!” Xenni iḥada as amezzuɣ uca issgenfa i-t.

52 Inna Yeccu i imeqqranen n ikehhanen d imgewwaden n iɛessasen n Zzawect Tameqqrant d imɣaren n řgens, inni tuɣa ɣares dd-yusin: “Ma teffɣem-dd ɣari axmi dd-teffɣem ɣar ijj n uxewwan, s řesyuf d iɛumad? ^■   53 Ass x wass tuɣa ayi akidwem di Zzawect Tameqqrant, kenniw war ɣari tesswiẓẓdem s ifassen, maca ta d tasaɛɛet nwem d ṣṣulṭa n taǧest.”

54 Ṭṭfen t, nedhen t uca ssidfen t di taddart n arrays n ikehhanen. Uca iḍfar i-t Cimɛun zi řaggʷaj. ^■   55 Nitni ssarɣen timessi di řwest n řemraḥ, xenni qqimen deg wenneḍ nnes, uca iqqim Cimɛun jar asen. ^■   56 Teẓra i-t ict n tayya am iqqim ɣar tmessi uca texzar dayes mliḥ, tenna: “Uřa d wa tuɣa-t akides.” 57 Maca netta inkar t, inna: “A tamɣart, necc war t ssineɣ!” 58 War din min iɛdun iẓra i-t wenneɣni, inna: “Uřa d cek d ijjen zzaysen.” Maca Buṭrus inna: “War iǧi bu d necc!” 59 Umi teɛdu ɛřaḥař ict n tsaɛɛet, ibda wenneɣni ad iqaceḥ, inna: “S tidett, uřa d wa tuɣa-t akides, minzi uřa d netta d Ajalili.” 60 Inna Buṭrus: “A bnadem-a, necc war ssineɣ min xef tessawařed!” Řexdenni, am tuɣa ɛad issawař, issquqeɛ uyaẓiḍ. 61 Inneqřeb Yeccu uca ixzar ɣar Buṭrus. Uca iɛqeř Cimɛun x wawař i d as inna Siditneɣ: “Qbeř i ɣa issquqeɛ uyaẓiḍ, ad ayi tenkared třata n twařawin!” ^■   62 Uca iffeɣ-dd Cimɛun barra, iru imeṭṭawen imerzagen.

63 Iryazen nni iṭṭfen Yeccu, tuɣa sthezzan zzayes, ^■   64 dřin tiṭṭawin nnes, xenni wtin t ɣar uɣembub, nnan: “Nabb, man wen i Cek iwtin?” 65 S waṭṭas n tmesřayin nneɣni tuɣa ttceqqafen dayes u ssawařen ḍidd nnes.

66 Umi dd-yiweḍ uziř, munen imɣaren n řgens d imeqqranen n ikehhanen d imseřmaden n idlisen uca nedhen t ɣar Wexxam n Lmeḥkama Tameqqrant nsen. ^■   67 Nnan as: “Mařa Cek d Lmasiḥ, xenni ini aneɣ t.” Inna asen: “Mařa nniɣ awem t, war dayi tᵉttimnem, 68 u mařa sseqsiɣ kenniw, war xafi tarrim niɣ war d ayi tarexxum. 69 Zi řexxu d tsawent ad iqqim Mmis n bnadem x ufus afusi n jjehd n AREBBI.” ^■   70 Nnan marra: “Ma Cek d Mmis n AREBBI?” Inna asen: “Kenniw teqqarem, aqa d NECC!” 71 Nnan: “Umi neḥdaj ɛad řechud? Minzi aqa neccin s yixef nneɣ nesřa t zeg uqemmum nnes.”