1 Marra řɣaci nsen ikkar uca nedhen t ɣar Pilaṭus. ^■   2 Bdan ad t ḍeřmen, nnan: “Neccin nufa aqa Wa issefsed řgens nneɣ am imenneɛ ad wcen ḍḍariba i kuř azeǧif i qayṣar, iqqar belli Netta d Ajeǧid, Lmasiḥ!” ^■   3 Isseqsa t Pilaṭus, inna: “Ma Cek d Ajeǧid n Wudayen?” Yarra-dd, inna: “Cek i t iqqaren!” ^■  

4 Inna Pilaṭus i řɣaci u i imeqqranen n ikehhanen: “Aqa war ufiɣ bu uřa d ijj n řɛib di Bnadem-a!” 5 Maca sɣuyyen nitni, nnan: “Netta issɣewwaɣ řgens, isseřmad di marra Yahudiyya, ibda zi Ljalil ař da.” 6 Umi isřa Pilaṭus ‘Ljalil’, isseqsa: “Ma aryaz-a d Ajalili?” 7 Umi ifhem belli Netta tuɣa sadu ufus n Hirudus, issekk i-t ɣar Hirudus, minzi wanita tuɣa-t di Urcalim deg wussan nni. ^■  

8 Ařami iẓra Hirudus Yeccu, ifarḥ aṭṭas, minzi aṭṭas zeg wami tuɣa ixs ad t iẓar, minzi isřa xas aṭṭas n tmesřayin, u tuɣa issitim ad zzayes iẓar ict n řeɛřamet. ^■   9 Isseqsa t x waṭṭas n tmesřayin, maca Yeccu war xas dd-yarri s ca.

10 Imeqqranen n ikehhanen d imseřmaden n idlisen kkaren, ḍeřmen t s řḥarret.

11 Hirudus ak-d řɛeskar nnes sseḥqaren t, u awarni řami istehza zzayes, yarḍ as ijj n useřham adehmani, uca issekk i-t ɣar Pilaṭus.

12 Dewřen Pilaṭus d Hirudus d imeddukkař deg wass nni, minzi qbeř tuɣa din řeɛdawet jar asen. ^■  

13 Iřaɣa Pilaṭus x imeqqranen n ikehhanen d imeqqranen n řgens, ^■  

14 inna asen: “Kenniw tiwyem ayi-dd bnadem-a am ijjen wenni issɛiǧen iwdan. Xzar, necc sseqsiɣ t zzatwem, war dayes ufiɣ bu uxeṭṭu i zzayes tᵉttcetcam kenniw.

15 Uřa d Hirudus war dayes yufi ca, minzi necc ssekkeɣ t ɣares. U xzar, war din uřa d ict n řḥajjet tesdaheǧ řmewt.

16 Necc ad t hettkeɣ s urekkuḍ uca ad as arxuɣ.”

17 Maɣar tuɣa din ict n tnamit maḥend ad asen yarxu i yijjen di Řɛid. ^■  

18 Maca řɣaci isɣuyy deg ijj n umur, inna: “Kksem Wa, arxu aneɣ-dd i Bar-Abbas!” ^■  

19 Wa tuɣa ittwammenḍar di řeḥbes x ssibbet n ijj n uɣuwweɣ i imsaren di tendint u x ssibbet n wenɣay. 20 Iřaɣa asen ɛawed Pilaṭus, minzi tuɣa ixs ad yarxu i Yeccu. 21 Maca sɣuyyen nitni, nnan: “Ṣelleb i-t! Ṣelleb i-t!” 22 Inna asen i twařa wiss třata: “Man tuɛeffna igga Wa xenni? Necc war dayes ufiɣ bu uxeṭṭu i isdaheǧen řmewt? S uyenni awarni řami t hettkeɣ s urekkuḍ, ad as arxuɣ!” 23 Maca nitni ziyyaren xas, sɣuyyun s tmijjawin jjehdent, ttaren ad ittwaṣelleb Netta. Timijjawin nsen d tenni n imeqqranen n ikehhanen tuɣa arennyent di jjehd. 24 Xenni iḥkem Pilaṭus ad asen iqḍa cɣeř nsen. ^■   25 Iḍřeq asen i wenni immenḍaren di řeḥbes zi ssibbet n uɣuwweɣ d wenɣay, d wenni ttaren nitni uca isellem Yeccu i nitni am mammec tuɣa xsen.

26 Umi t gewwden ssenni, ṭṭfen Cimɛun zi Qayrawan, tuɣa yusa-dd zi řkampu, uca ssarsen xas ṣṣalib ḥima ad t yarbu awarni Yeccu. 27 Iḍfar i-t-i-dd ijj n řɣaci imɣar n iwdan d temɣarin tinni tuɣa iwtin agejdur u ttrunt xas. 28 Inneqřeb-dd ɣarsent Yeccu, inna: “A yessis n Urcalim, war ttrunt ca xafi, maca runt x ixef nkent d tarwa nkent. 29 Minzi ad dd-asen wussan i di i ɣa inin: ‘Sseɛd n temɣarin i war izemmaren ad urwent u sseɛd n iɛeddisen inni war yurwen d tibbac tinni war issuṭṭuḍen!’ 30 Xenni ad inin i idurar: ‘Wḍam-dd xaneɣ!’, u i tiwririn: ‘Dřent aneɣ!’ ^■   31 Minzi mařa ggin aya s ukeccuḍ aziza, min ɣa imsaren xenni i ukeccuḍ yuẓɣen?” ^■   32 Nedhen akides ɛawed tnayen nneɣni inni tuɣa iqeṭṭɛen abrid, ḥima ad ten nɣen akides. ^■  

33 Řami iwḍen ɣar wemcan umi qqaren ‘Taceqquft n uzeǧif’, ṣellben t din ak-d yenni tuɣa iqeṭṭɛen abrid, ijjen x yeffus nnes u wenneɣni x uzeřmaḍ nnes. ^■   34 Maca Yeccu inna: “A Baba, ɣfar asen, minzi nitni war ssinen min tteggen!” Uca bḍan arruḍ nnes, nḍaren xas akeccuḍ. ^■   35 Tuɣa iwdan bedden din, xezzaren. Uřa d imeqqranen n řgens sthezzan zzayes, nnan: “Tuɣa issenjem inneɣni, řexxu ejj i-t ad issenjem Ixef nnes mařa Netta d Lmasiḥ, d Wenni ittwafarzen zi AREBBI?” 36 Uřa d iɛeskariyyen qarrben-dd ɣares maḥend ad zzayes stehzan, wcin as řxeǧ. 37 Nnan as: “Mařa Cek d Ajeǧid n Wudayen, xenni senjem Ixef nnek!” 38 Tuɣa din ɛawed ict n tira sennej nnes urin tt s lḥuruf n Tyunanit d Tlatinit d Tɛibranit: ‘Wa d Ajeǧid n Wudayen.’ ^■  

39 Ijjen zeg iqṭaṭɛiyyen i tuɣa ittwayuyřen, tuɣa ittceqqaf dayes, iqqar: “Mařa Cek d Lmasiḥ, senjem ixef nnek u uřa d neccin akidek!” 40 Maca wenneɣni iwebbex i-t, inna: “Ma cek war teggʷided ca ɛad zi AREBBI umi cek iřqef ccreɛ d ijjen? 41 Neccin s řḥeqq minzi neṭṭef axeǧeṣ n min negga. Maca Wa war iggi min war iḥřin!” 42 Xas uca inna i Yeccu: “Ɛqeř xafi, a Sidi inu, xmi dd ɣa tased di Tgeldit nnek.” 43 Inna as Yeccu: “S tidett, Necc ad ac iniɣ, aqa ass-a ad tiřid akidi di jjennet.”

44 Tuɣa tasaɛɛet ɛřaḥař d setta, xenni tewḍa-dd taǧest x temmurt marra ařami d tesɛa. ^□  ■   45 Tebbarcen tfuct uca ařeḥḥaf n wadaf ɣar Zzawect Tameqqrant icarreg deg wezyen. ^■   46 Yeccu iřaɣa s jjehd, inna: “A Baba, deg ifassen nnek ad ssarseɣ Arruḥ inu.” Umi inna aya, isellem ixef nnes ɣares. ^■   47 Umi iẓra řqebṭan x mya min tuɣa imsaren, ibda issemɣara di AREBBI, inna: “S tidett tuɣa Bnadem-a d amseggad.” ^■  

48 Marra řɣaci i d imunen ḥima ad ẓaren afurrej-a, ɛeqben awarni řami ẓrin min imsaren, wtin deg idmaren nsen. 49 Marra imqarraben d temɣarin i-t-i-dd-iḍfaren jmiɛ zi Ljalil, bedden ɣar řaggʷaj, ẓrin man aya.

50 Ijj n weryaz, qqaren as Yusuf, tuɣa-t d amcawar zi Lmeḥkama Tameqqrant. Netta zi Ramta, ict n tendint di Yahuda, - aqa-t d ijj n weryaz d aṣebḥan d amseggad - , ^■   51 war yarḍi ca x ccwar nsen u x min ggin, u netta tuɣa ittraja Tageldit n AREBBI. 52 Wanita yuyur ɣar Pilaṭus uca ittar as řxecbet n Yeccu. 53 Issehwa t-i-dd zi ṣṣalib, inneḍ i-t di řecfen n řeqṭen azdad uca issars i-t deg wenḍeř i iɣza di sseǧaḥ mani war inḍiř ḥed ɛad. ^■   54 Tuɣa d ass n Usewjed, aqa ssebt tqarreb-dd.

55 Uřa d timɣarin i dd-yusin zi Ljalil ḍfarent t-i-dd, qarrbent-i-dd, ẓrint anḍeř d mammec ssarsen řxecbet nnes. ^■   56 Xas uca ɛeqbent, ssewjdent řeɛṭur d zzect ittfuḥen, maca di ssebt areyyḥent am mammec teǧa di tewṣeyyet.