1 Xenni isweḍ Yeccu ɣar aytbab n wagřa ssrusan ṣṣdaqi nsen di ssenduq. ^■   2 Iẓra ɛawed ict n tajjač tamezřuḍt tessars dayes tnayen n uqiyyat n nnḥas. 3 Inna asen: “S tidett, Necc ad awem iniɣ, aqa tajjač-a řmeskina tenḍar dayes ktar zzaysen marra. ^■   4 Minzi marra nitni nḍaren zi zziyada nsen ɣar wexxam n ṣṣdaqi n AREBBI, maca nettat zi řexṣeṣ nnes aqa tenḍar dayes marra min ɣares.”

5 Ařami tuɣa ca n iwdan ssawřen x Zzawect Tameqqrant, tenni tzewweq s iẓra iṣebḥen d ṣṣdaqi, inna asen Yeccu: ^■   6 “Ma tᵉttwařam timesřayin-a? Ad dd-asen wussan war ittɣimi uřa d ijj n weẓru x weẓru nneɣni i war ittareddǧen.” ^■   7 Sseqsan t, nnan: “A Amseɣɣar, meřmi i ɣa yiři uya d man řeɛřamet aqa timesřayin-a udsent-i-dd?” 8 Inna asen: “Ɛessem, war ttᵉttwaɣarrem, minzi aṭṭas ad dd-asen s Yisem inu, ad inin: ‘Aqa NECC d Lmasiḥ!’ u: ‘Řweqt aqa tiweḍ-dd!’, maca war ggurem awarni asen. ^■   9 Mařa tesřim x řbaruḍ d iɣewwɣen, war ttnexřiɛem ca, minzi s uɣiř ad yiři uya d amezwar, maca war ittiři ɛad deɣya uneggar.

10 Maɣar ijj n řgens ad dd-igeɛɛed ḍidd n ijj n řgens nneɣni u ict n tgeldit ḍidd n ict n tgeldit nneɣnit. ^■  

11 Ad iřin inhezziyyen n temmurt mɣaren di ɛřam kuř imucan d řaẓ d jjrayeḥ d tiggʷudi d usnexřiɛ, uca ad dd-banent řeɛřamat mɣarent deg ujenna u ad din iřint tḥaryaḍin ijehden.

12 Maca qbeř man aya marra ad xawem ssarsen ifassen, ad kenniw sellmen ɣar temzidawin d řeḥbusat, uca ad kenniw nedhen zzat i ijeǧiden d řḥukkam x ssibbet n Yisem inu. ^■  

13 Maca man aya ad idweř d cchadet i kenniw.

14 Ggem deg wuřawen nwem maḥend war tesseřmidem ixef nwem mammec i dd ɣa tarrem. ^■  

15 Minzi Necc ad awem wceɣ aqemmum d tiɣit i war zemmaren ad ten ssbedden marra řɛedyan nwem. ^■  

16 Kenniw ad ttwasellmen zi lwalidin u zi tawmat u zi řaǧ uřa zeg imeddukkař uca ad nɣen ca zzaywem, ^■  

17 u kenniw ad tᵉttwacarhem zi marra s ssibbet n Yisem inu. ^■  

18 Waxxa amenni uřa d ijj n uẓeṭṭu n ucuwwaf n uzeǧif nwem war ittweddari ca, ^■  

19 maca s ṣṣbar nwem ad tarebḥem řeɛmur nwem.

20 Xmi i ɣa tẓarem Urcalim aqa inneḍ as-dd řɛeskar, xenni snem belli aqa iqarreb-dd wareddeǧ nnes. ^■   21 Xenni ittxeṣṣa ad arweřen inni iǧan di Yahudiyya ɣar idurar, d yenni iǧan di řwest nnes ad zzayes dd-ffɣen ad arewřen d yenni iǧan di dcurat war tt ttidfen, 22 minzi ina d ussan n nneqmet ḥima ad ittwakemmeř marra min yurin. ^□  ■   23 Uct x temɣarin nni s ddeyset d tinni issuṭṭuḍen deg wussan nni, minzi ad din tiři řmeḥnet d tameqqrant x temmurt d weɣḍab x řgens-a. 24 Nitni ad wḍan s řeqḍeɛ n ssif, ad ttwaḥebbsen am ttwanedhen jar marra řegnus, uca Urcalim ad xas ɛefsen řegnus ař ɣa kemmřen ikuden n řweqt n řegnus. ^■  

25 Ad din iřint řeɛřamat di tfuct, di tziri u deg itran uca x temmurt ad din tiři řmeḥnet di řegnus, ař d asen iweddar min ɣa ggen zeg unexřiɛ n zzhir ameqqran n řebḥar, ^■   26 u ijj n wenhezzi n temmurt d ameqqran ad issnexřiɛ řeɛmar n iwdan zi tiggʷudi zi min i dd ɣa yasen x temmurt, u ṣṣulaṭat n ijenwan ad ttwanhezzent. 27 Řexdenni ad ẓaren Mmis n bnadem, xmi dd ɣa yas deg iseynuten, s jjehd d uɛuǧi aṭṭas. ^■   28 Xmi i ɣa bdant tmesřayin-a, ggem taryast, sgeɛɛdem izeǧifen nwem minzi aṣřaḥ nwem aqa yiweḍ-dd.” ^■  

29 Iɛawed asen ijj n umedya: “Xzarem ɣar wartu n tazart u ɣar marra ticejjura. ^■   30 Xmi i ɣa ssneḍyent, ad tessnem s man aya aqa anebdu yiweḍ-dd. 31 Ammu ɛawed, xmi i ɣa tᵉttwařam timesřayin-a ttemsarant, snem xenni belli Tageldit n AREBBI tudes-dd. 32 S tidett ad awem iniɣ, aqa war iɛeddu jjiř-a ař ɣa yiři uya kuřci. 33 Ajenna d temmurt ad fnan, maca awařen inu war fennin ca. ^■  

34 Ḥḍam ixef nwem ḥima war tteḍqiřen wuřawen nwem zi řheff d uscar d imunas n ddunect-a, u war xawem dd-iwḍi wass nni deɣya. ^□  ■   35 Minzi ad dd-yas am texceft x marra inni iqqimen x uɣembub n temmurt. ^■   36 Ḥḍam xenni řebda, ẓaǧem ḥima ad tiřim tesdaheǧem maḥend ad tnejmem zi marra min ɣa imsaren uca ad tbeddem zzat i Mmis n bnadem.” ^■  

37 S uziř tuɣa isseřmad di Zzawect Tameqqrant, maca s ǧiřet tuɣa itteffeɣ, ittɣima ittnusa x wedrar umi qqaren: ‘Taddart n Zzitun’. ^■   38 Di ṣṣbeḥ zic tuɣa marra iwdan ttasen-dd ɣares ɣar Zzawect Tameqqrant ḥima ad sřen Awař nnes. ^□