1 Deg ijj zeg wussan nni, am tuɣa isseřmad řgens di Zzawect Tameqqrant, ittbarreḥ s Řexbar Aṣebḥan, xenni ɣewwɣen xas imeqqranen n ikehhanen d imseřmaden n idlisen ak-d imɣaren n řgens. ^■   2 Ssiwřen akides, nnan: “Ini aneɣ, s man ttesriḥ i tᵉttegged aya niɣ man wen i d ac iwcin ttesriḥ-a?” 3 Yarra-dd Yeccu, inna asen: “Uřa d Necc ad kenniw sseqsiɣ ijj n useqsi. Inim ayi: 4 Ma aseɣḍeṣ n Yuḥanna zeg ujenna niɣ zeg iwdan?” 5 Mcawaren jar asen, nnan: “Mařa nenna: ‘Zeg ujenna!’, ad yini: ‘Mayemmi xenni war zzayes tuminem?’ 6 Mařa nenna: ‘Zeg iwdan!’, ad aneɣ yarjem marra řgens, minzi nitni ttwassqenɛen belli Yuḥanna d anabi.” 7 Nnan as: “Neccin war nessin zi manis!” 8 Xenni inna asen Yeccu: “Xenni uřa d Necc war d awem qqareɣ s man ttesriḥ i tteggeɣ aya!”

9 Ibda ittɛawad i řgens amedya aya: “Ijj n bnadem igga ijj n umarjuɛ n uḍiř, iẓẓu dayes tizayarin, icra amarjuɛ i iɛarraṣen uca isafar ijj n řmijař n řweqt d azirar. ^■  

10 Ařami dd-yiweḍ řḥař, issekk ijj n umsexxar ɣar ixemmasen ḥima ad as wcen zeg uḍiř n umarjuɛ. Wtin t ixemmasen nni uca ssekken t-i-dd ixwa.

11 Xenni issekk ɛawed ijj n umsexxar nneɣni, wtin t ɛawed, deǧen t, xenni sekken t-i-dd ixwa.

12 Issekk ɛawed amsexxar wiss třata, maca nitni ssyizmen t ɛawed uca nḍaren t ɣar barra.

13 Inna bab n umarjuɛ n uḍiř: ‘Min i ɣa ggeɣ? Ad ssekkeɣ mmi iɛizzen. Xmi t ɣa ẓaren, ad sseḍḥan nican.’

14 Umi t ẓrin ixemmasen, mcawaren jar asen, nnan: ‘Aqa d wa d awrit. Zid ad t nneɣ, ḥima ad ɣarneɣ dd-idweř řwart.’ ^■  

15 Ssuffɣen t barra i umarjuɛ n uḍiř uca nɣin t. Min zzaysen i ɣa yegg xenni bab n umarjuɛ n uḍiř?

16 Ad dd-yas, ad ineɣ ixemmasen nni, uca ad iwc amarjuɛ n uḍiř i inneɣni.” Umi sřin aya, nnan as: “Ɛemmarṣ!”

17 Maca Netta ixzar ɣarsen, inna: “Min ixs ad yini xenni wawař-a i yuran:

‘Aẓru i tuɣa iɛiffen ibennayen,

aqa idweř d aẓru azeǧif n teɣmart! ^■  

18 Marra wi i ɣa iwḍan x weẓru aya,

ad ifartek,

u wenni xef i ɣa iwḍa,

ad t iřbez!’?” ^■  

19 Arezzun imseřmaden n idlisen d imeqqranen n ikehhanen ad xas ssarsen ifassen di tsaɛɛet nni, maca nitni ggʷeden zeg iwdan, minzi ssnen belli Netta inna amedya aya xasen.

20 Ḥḍan t uca ssekken ibergagen inni iggin ixef nsen amecnaw imseggaden, ḥima ad as ggen taxceft di ssibbet n ijj n wawař maḥend ad t sellmen i řqaḍi d jjehd n lɛamil. ^■   21 Sseqsan t, nnan: “A Amseɣɣar, nessen belli Cek tessawařed u tesseřmaded nican, war tᵉttegged ca s tefras n bnadem, u tesseřmaded abrid n AREBBI s tidett. 22 Ma iḥeǧeř aneɣ ad newc řeɛcur i kuř ijjen uzeǧif i qayṣar niɣ lla?” 23 Yuca s teḥraymect nsen uca inna asen: “Mayemmi d ayi tᵉttjarrabem? 24 Secnem ayi-dd dinar. Wi yiřan taṣwirt-a d tira aya?” Nnan as: “N qayṣar!” 25 Xas uca inna asen Yeccu: “Wcem xenni i qayṣar min iǧan i qayṣar u i AREBBI min iǧan i AREBBI!” ^■   26 War zemmaren ad t ṭṭfen s wawař nnes qibač i iwdan, maca qqimen ttbehten s temwarrit nnes uca sseɣden.

27 Usin-dd ca zeg Iṣaduqiyyen inni ittɛekkasen tamesřact n tnukra. Sseqsan t, ^■   28 nnan as: “A Amseɣɣar, yura aneɣ Musa, mařa immut i ḥed umas i ɣar iǧa tamɣart uca immut břa iḥenjiren, xenni ad yawi umas tamɣart nni maḥend ad issgeɛɛed dduriyet i umas. ^■   29 Tuɣa din sebɛa n wawmaten. Amezwar yiwi ict n temɣart, maca immut břa iḥenjiren. 30 Yiwi wenni d wiss tnayen tamɣart nni uca uřa d netta immut břa iḥenjiren. 31 Xenni wenni d wiss třata yiwi tamɣart nni uca ammu inneɣni ař wiss sebɛa. Mmuten nitni marra idsen, war dd-jjin ca iḥenjiren. 32 Ɣar uneggar temmut temɣart ɛawed. 33 Di tnukra i man wen zzaysen i ɣa tiři d tamɣart? Minzi tuɣa-tt d tamɣart n sebɛa!”

34 Inna asen Yeccu: “Ayt n ddunect-a iwyen timɣarin, u timɣarin ttwasmeǧacent i yeryazen. 35 Maca inni ittwaḥesben sdaheǧen ad awḍen ɣar ddunect nni u ɣar tnukra zi taddart n imettinen, war ttiwyen timɣarin, u timɣarin war ttiřin i yeryazen. 36 Maɣar war zemmaren ɛad ad mmten, minzi nitni amecnaw lmalakat u nitni d arrawen n AREBBI, minzi nitni dewřen d arrawen n tnukra. ^■   37 Maca zi jjihet n imettinen ad ttwassnekkaren, tuɣa issbeyyan Musa ɛawed, umi ihaja x cbarq ak-d isennanen i zi inna SIDI: ‘NECC d AREBBI n Ibrahim d AREBBI n Isḥaq d AREBBI n Yaɛqub.’ ^■   38 Maɣar Netta war iǧi ca d AREBBI n imettinen, maca n yinni iddaren, minzi ɣares Netta nitni marra ddaren.” 39 Arrin-dd ca zeg imseřmaden n idlisen, nnan: “A Amseɣɣar, tessiwřed mliḥ aṭṭas!” 40 Xenni war zɛimen ɛad ad t sseqsan x ca.

41 Inna asen: “Mammec zemmaren imseřmaden n idlisen xenni ad inin belli Lmasiḥ d Mmis n Dawud? ^■   42 Dawud simant nnes iqqar deg wedlis n Izehhiden:

‘SIDI inna i Sidi inu:

Qqim x ufusi inu ^■  

43 ař d ɣa ssarseɣ řɛedyan nnek sadu iḍaren nnek.’ ^■  

44 Mařa Dawud isemma t ‘Sidi’, mammec i ɣa yiři Netta d mmis?”

45 Am tuɣa marra iwdan zemmaren ad sřen, inna i imeḥḍaren nnes:

46 “Ḥḍam ixef nwem zeg imseřmaden n idlisen inni ittexsen ad uyuren s ijeǧaben iziraren, inni umi teɛjib asen ad xasen seǧmen iwdan di řeswaq u ad qqimen x řekrasi iṣebḥen di temzidawin u x řekrasi imezwura ɣar umensi. ^■   47 Nitni ttᵉtten tudrin n tijjař am ttẓaǧan aṭṭas umi d asen tticent tiwhibin. Nitni ad ksin ijj n řḥukm iqseḥ.” ^■