1 Umi yudef Yeccu ɣar Ariḥa, icuqq tendint nni, 2 tuɣa din ijj n weryaz qqaren as Zakkayu. Wanita tuɣa d bab n wagřa uřa d ameqqran n ayt n ḍḍariba. 3 Netta tuɣa yarezzu ad iẓar Yeccu d min iɛna, maca war izemmar s ssibbet n řɣaci, minzi tuɣa Zakkayu d aquḍaḍ n tiddi. 4 S uyenni izwar i Yeccu uca igeɛɛed x ijj n wartu n řexřa, ḥima ad t iẓar, minzi tuɣa Netta igga ad dd-yekk ssenni. 5 Umi dd-yusa Yeccu ɣar wemcan nni, ixzar ɣar ujenna, ibarq i-t. Inna as: “A Zakkayu, qeǧeq-dd, hwa-dd deɣya, minzi ass-a ittxeṣṣa ayi ad qqimeɣ di taddart nnek!”

6 Iqeǧeq-dd, ihwa-dd deɣya uca yareḥḥeb zzayes s řefraḥet. 7 Marra inni iẓrin man aya, bdan ttmeɛmiɛen xas, nnan: “Aqa yudef ḥima ad iqqim ɣar ijj n weryaz d amednub!” 8 Ikkar Zakkayu, inna i Yeccu: “Xzar, Sidi, ad wceɣ azyen n wagřa inu i imezřaḍ u marra wenni zi kkseɣ ca n řḥajjet s řɣecc, ad as t arreɣ arebɛa n tseqqar!” 9 Inna as Yeccu: “Ass-a tiweḍ-dd Tudart i taddart-a, minzi uřa d wa d ijj n mmis n Ibrahim. ^■  

10 Minzi Mmis n bnadem yusa-dd ḥima ad yarzu u ad issenjem min iweddaren.” ^■  

11 Umi tuɣa ttesřan aya, yarni-dd ɛawed ijj n umedya, minzi ittɣiř asen, umi tuɣa dd-iqarreb ɣar Urcalim, aqa Tageldit n AREBBI ad dd-teḍhar deɣya.

12 Inna: “Ijj n bnadem zi řejwad iruḥ ɣar ict n temmurt tiggʷej, ḥima ad iṭṭef tagelda i yixef nnes uca xenni ad dd-idweř awarni man aya. ^■  

13 Iřaɣa-dd i ɛecra n imsexxaren nnes uca iwca asen ɛecra n řewzan n nnuqart uca inna asen: ‘Ggem ttijara ař dd ɣa ɛeqbeɣ’.

14 Maca imezdaɣ n tendint tuɣa carrhen t uca ssekken awarni as ireqqasen, nnan: ‘War nexs wanita ad yiři d ajeǧid xaneɣ!’

15 Umi dd-iɛqeb awarni řami d iksi tagelda, yumur maḥend ad řaɣan i imsexxaren nni umi iwca řwuzenat n nnuqart ḥima ad issen arbeḥ i dd-yiwi kuř ijjen di tsebbabt nnes.

16 Yusa-dd umezwar, inna: ‘A sidi, řewzen nnek yiwi-dd ɛecra n řewzan’.

17 Inna as: ‘Mliḥ cek, a amsexxar aṣebḥan, minzi tuɣa cek d amtiqqi x drus, ad tiřid d azeǧif x ɛecra n tneddam.’

18 Yusa-dd wenni wiss tnayen, inna: ‘A sidi, řewzen nnek yiwi-dd xemsa n řewzan.’

19 Inna i wanita ɛawed: ‘Uřa d cek ad tiřid d azeǧif x xemsa n tneddam!’

20 Xenni yusa-dd wenneɣni, inna: ‘A sidi, xzar řewzen nnek i tuɣa xemmřeɣ deg ijj n zzif n řeqṭen azdad. 21 Minzi ggʷedeɣ zzayek, minzi cek d ijj n bnadem tqesḥed. Cek tkessid min war tessrusid u tmejjared min war tzarɛed!’ 22 Inna as: ‘S uqemmum nnek ad xak carrɛeɣ, a amsexxar aɛeffan! Tessned belli necc d bnadem iqseḥ, kessiɣ min war ssrusiɣ, mejjareɣ min war zarɛeɣ. ^■   23 Mayemmi war tessarsed řewzen n nnuqart inu di řbanku? Xenni xmi dd ɣa yaseɣ, ad tent ksiɣ s lfayda.’ 24 Inna i yenni din ibedden akides: ‘Ksim xas řewzen nnes, wcem t i wenni ɣar iǧa ɛecra.’ ”

25 Nnan as: ‘A Siditneɣ, aqa ɣares ɛecra n řewzan ɛad?” 26 “Netta inna asen: ‘Ad awem iniɣ, belli marra wenni ɣar iǧa, ad as immewc, maca wenni war ɣar iǧi, ad as ittwakkes ɛad uřa d min ɣares. ^■   27 Maca řɛedyan inu inni war ixsen ad xasen dewřeɣ d ajeǧid, awyem ten-dd danita uca ɣarṣem asen zzati.’ ”

28 Awarni řami inna Yeccu man aya, izwar asen uca igeɛɛed ɣar Urcalim. 29 Ařami dd-iqarreb ɣar Bayt-Faji d Bayt-Ɛanya ɣar uɣezdis n wedrar umi qqaren ‘Taddart n Zzitun’, issekk tnayen n imeḥḍaren nnes, ^■   30 inna asen: “Ruḥem ɣar dcar i iǧan ɣar zzat nwem. Xzar, xmi din i ɣa tadfem, ad tafem ijj n wesnus iqqen, war xas inyi uřa d ijj n bnadem ɛad. Fesyem as uca awyem t-i-dd da. 31 Mařa isseqsa kenniw ca n ijjen: ‘Mayemmi i d as tfesyem?’, ad as tinim ammu: ‘Aqa Siditneɣ iḥwaj i-t!’ ”

32 Inni dd-ittwassekken ruḥen uca ufin t am mammec i d asen inna. 33 Ařami d fesyen i wesnus, sseqsan ten aytbab nnes: “Mayemmi tfessyem i wesnus?” 34 Nnan asen: “Aqa Siditneɣ iḥwaj i-t!” 35 Usin-dd zzayes ɣar Yeccu, nḍaren arruḍ nsen x wesnus, ssenyen Yeccu xas. ^■   36 Am tuɣa iggur, ssun nitni abrid s warruḍ nsen. 37 Umi dd-iqarreb ɣar teysart n wedrar n ‘Taddart n Zzitun’, ibda řɣaci n imeḥḍaren marra ad farḥen, ttsebbḥen AREBBI s ict n tmijja tejhed aṭṭas x ssibbet n lmuɛjizat timeqqranin nni i tuɣa ẓrin. 38 Nitni nnan:

“Sseɛd n Ujeǧid i dd-yusin s Yisem n SIDI!

Řehna deg ujenna d uɛuǧi di řuɛřa x řuɛřa qaɛ!” ^■  

39 Maca ca n Ifarisiyyen jar řɣaci nnan as: “A Amseřmad inu, webbex imeḥḍaren nnek!” 40 Inna asen: “Ad awem iniɣ, mařa sqaren ina, xenni ad řaɣan yeẓra.” ^■   41 Ařami dd-iqarreb uca iẓra tandint, iru xas, 42 inna: “Mři tfehmed deg wass-a min d am dd ɣa yawyen řehna nnem! Maca řexxu aqa man aya inuffar x tiṭṭawin nnem. 43 Aqa ad ɣarem dd-asen wussan i d am dd ɣa quwwaren řɛedyan nnem u ad cem ḥṣaren zi marra iɣezdisen, 44 ad cem nḍaren x temmurt, cem d tarwa nnem akidem, war dayem ttejjin aẓru ibedd x weẓru nneɣni, minzi war teftined i řweqt n warzef n Arebbi ɣarem.” ^■  

45 Umi yudef ɣar Zzawect Tameqqrant, ibda issuffuɣ inni i tuɣa issaɣen u izznuzan dayes. 46 Inna asen: “Aqa tura: ‘Taddart inu d Taddart n tẓaǧit!’, maca kenniw tarrim tt d ijj n ifri n iceffaren!” ^■   47 Tuɣa isseřmad marra ussan di Zzawect Tameqqrant, maca imeqqranen n ikehhanen d imseřmaden n idlisen d imɣaren n řgens tuɣa arezzun ḥima ad t nɣen. ^■   48 Maca war ufin ca min dayes i ɣa sřesqen, minzi marra iwdan tuɣa řeṣqen dayes, ttesřan ɣares.