1 Umi munen ibarruten n řɣaci, ařami bdan ɛřayen ɛeffsen ijj x wenneɣni, ibda iqqar i imeḥḍaren nnes: “Ɣar umezwar ḥḍam ixef nwem zeg wentun n Ifarisiyyen, aqa-t d nnifaq! ^■   2 Minzi war din min idřin uca war ggur ad ittwasseḍhar, u war din min inuffaren uca war ggur ad ittwassen. ^■   3 Minzi marra min tennam di taǧest, ad ittwaseř di tfawt, u min xef tessiwřem deg umezzuɣ deg wexxam n daxeř, ad ittwabarreḥ zzayes x tzeɣwin.”

4 “Necc ad awem iniɣ, a imeddukkař inu: War teggʷdem ca zeg inni ineqqen arrimet maca awarni man aya war zemmaren ad ggen ktar ɛad. ^■   5 Maca Necc ad awem ssecneɣ wenni zi ɣa teggʷedem: Ggʷedem zeg Wenni ɣar iǧa ṣṣulṭa maḥend ad inḍar di jᵉhennama awarni řami inɣa. Wah, ad awem iniɣ, zeg wanita i ɣa teggʷedem! 6 Ma war ttmenzin xemsa n ẓẓawec s tnayen n uqiyyat n nnḥas? Uca uřa d ijj zzaysen war ittᵉttwattu zzat i AREBBI. ^■   7 Maca zzaywem, ɛad iẓuṭṭan n ucewwaf n uzeǧif nwem ttwaḥesben marra. War teggʷdem ca, kenniw ḥsen zi ẓẓawec aṭṭas!” ^□  ■  

8 “Necc ad awem iniɣ, marra wi zzayi i ɣa icehden qibač i iwdan, ad zzayes iched ɛawed Mmis n bnadem zzat i lmalakat n AREBBI. ^■   9 Wi d ayi ɣa inkaren qibač i iwdan, uřa d netta s yixef nnes ad ittwankar qibač i lmalakat n AREBBI. ^■  

10 Kuř ijj wenni i ɣa inin awař ḍidd n Mmis n bnadem, aqa ad as ittwaɣfar man aya. Maca wenni i ɣa iceqqfen di Arruḥ Iqeddsen war d as ittᵉttwaɣfar ca man aya!” ^■  

11 “Xmi kenniw i ɣa nedhen ɣar temzidawin u zzat i řḥukkam d ṣṣulaṭat, war kessim ca s wemnus min zi i dd ɣa tarrem niɣ min ɣa tinim, ^■  

12 minzi Arruḥ Iqeddsen ad awem isseřmed di tsaɛɛet nni min ittxeṣṣa ad tinim.”

13 Inna as ijjen zi řɣaci: “A Amseɣɣar, ini as i uma ḥima ad kidi ibḍa řwart.”

14 Yeccu inna as: “A bnadem, wi d ayi yarrin xawem d řqaḍi niɣ d řɛadeř?”

15 Inna i imeḥḍaren nnes: “Ɣarwem, ḥḍam ixef nwem zi ṭṭmeɛ, maɣar tudart war teǧi deg ufeyyeḍ n wagřa.” ^■  

16 Xas uca iḥaja asen ijj n umedya: “Iyyar n ijj n weryaz d bab n wagřa yiwyi as-dd ṣṣabet aṭṭas.

17 Ixarreṣ deg ixef nnes: ‘Min i ɣa ggeɣ? Minzi war ɣari bu řmarsi i di i ɣa yarweɣ marra řɣiǧet inu.’

18 Inna: ‘Ammu i ɣa ggeɣ: Ad hedmeɣ řemrasi inu, xenni ad bniɣ řemrasi d imeqqranen xasen uca ad daysen xezneɣ marra řɣiǧet d wagřa inu.

19 Ad iniɣ i yixef inu: ‘A řeɛmar inu, ɣarek aṭṭas n wagřa i ittwaxzen din i waṭṭas n iseggʷusa. Areyyeḥ, tecced, teswed u tfarḥed!’ ^■   20 Maca inna as AREBBI: ‘A afɣuř, aqa ǧiřet-a ad zzayek ittwattar řeɛmar nnek. Xenni i umi ɣa yiři min tessewjded?’ ^■   21 Ammu i ɣa imsar i wenni iyarrwen řeknuz i yixef nnes, maca war iǧi d bab n wagřa di AREBBI.”

22 Inna i imeḥḍaren nnes: “S uyenni Necc ad awem iniɣ: War kessim s wemnus i yixef nwem min ɣa teccem, uřa i arrimet nwem min ɣa tyarḍem. ^■   23 Řeɛmar ktar zi macca u arrimet ktar zeg werruḍ. 24 Xzarem ɣar ibaɣřiwen! Aqa war zarrɛen, war mejjaren, war ɣarsen tisarfin niɣ d řemrasi u AREBBI issecca i-ten. Mecḥař tuɛřam kenniw x ijḍaḍ! ^■   25 Man wen zzaywem izemmar s wemnus nnes ad yarni di tuzzeggart nnes ijj n uɣiř waha? ^■   26 Mařa kenniw war tzemmarem uřa x min iǧan d ameẓyan qaɛ, mayemmi i ɣa teksim s wemnus x min iqqimen?”

27 “Xzarem mammec ɣemmyent tlillicin! War xeddment, war ttqareḍcent, waxxa amenni ad awem iniɣ, aqa uřa d Suliman di qaɛ aɛuǧi nnes war yarḍ ca amecnaw uřa d ijj zzaysen. ^□   28 Mařa AREBBI issyarḍ ammu řeḥtic i iǧan ass-a deg iyyar uca tiwecca ad immenḍar di tefqunt, mecḥař iḥřa aṭṭas ad yiři Netta i kenniw i di iǧa drus n l’iman!”

29 “S uyenni war arezzum ca x min ɣa teccem uřa x min ɣa teswem, war tᵉttejjim ixarriṣen nwem ad ɣefřem x man aya. 30 Minzi marra timesřayin-a arezzun daysent řegnus n ddunect, maca Babatwem issen belli teḥdajem tent. 31 Maca arzum Tageldit n AREBBI uca timesřayin-a marra ad awem ttwammarnint.” ^■  

32 “War tteggʷed, cem, a taḥimart tameẓyant, minzi yarḍa Babatwem ad awem iwc Tageldit. 33 Zenzem min ɣarwem, wcem ṣṣedqet! Ggem i yixef nwem ticyarin n tmenyat i war yareccin, ijj n řkenz i war iqeṭṭin deg ijenwan, mani war ittidef uceffar uřa d tcinda war tᵉttegg ssuss. ^■   34 Minzi mani i ɣa yiři řkenz nwem, dinni i ɣa yiři ɛawed wuř nwem.”

35 “Ad iřint tejɛinnatin nwem ḥezzmemt s ibuyas u řefnarat nwem areqqent. ^■   36 Iřim amecnaw iwdan i ittrajan sidi nsen xmi dd ɣa yeɛqeb zeg wurar, ḥima, xmi dd ɣa yas, ad issqarqeb, zemmaren nitni ad as arzmen deɣya. 37 Sseɛd n imsexxaren nni, xmi dd ɣa yas siditsen, ad ten yaf faqen. S tidett, Necc ad awem iniɣ, aqa ad iḥezzem ixef nnes uca ad ten issɣim ɣar ṭṭabřa, xenni ad dd-yas ad xasen isexxar. 38 Mařa yusa-dd ɣar ḥeṭṭu wiss tnayen n ǧiřet niɣ ɣar ḥeṭṭu wiss třata uca yufa i-ten ammu, sseɛd n imsexxaren nni. ^■   39 Maca ssnem aya: mařa bab n taddart issen di man tsaɛɛet i di dd ɣa ixecc uceffar, xenni ad yiři ifaq uca war ittejji taddart nnes ad tt acaren. ^■   40 Iřim kenniw ɛawed twejdem, minzi Mmis n bnadem ad dd-yas deg ict n tsaɛɛet i war tᵉttrijim.” ^■  

41 Inna as Cimɛun Buṭrus: “A Siditneɣ, ma i neccin i tɛawded amedya aya niɣ i marra?” 42 Inna as Yeccu: “Man wen iǧan xenni d awkiř i di iǧa řaman d amiɣis wenni i ɣa yegg sidi nnes x imsexxaren nnes ḥima ad asen iwc řeɛweč nsen di řweqt nnes? ^■   43 Sseɛd n umsexxar nni i ɣa yaf sidi nnes xmi dd ɣa yas, ittegg ammu. 44 S tidett, Necc ad awem iniɣ, belli ad t yegg x marra agřa nnes. 45 Maca mařa amsexxar nni innan deg wuř nnes: ‘Aqa sidi inu iɛeṭṭař x weɛqab!’, uca ibda iccat imsexxaren d tiyya, ittett, isess, isscar, 46 xenni ad dd-yas sidi n umsexxar nni deg ijj n wass war ittriji u deg ict n tsaɛɛet i war issin. Wanita ad t iqeṭṭes d iceǧiqen, ad igg tasɣart nnes ak-d iɣeddaren. 47 Amsexxar nni wenni issnen řxaḍar n sidi nnes uca war issewjed ixef nnes uřa war iggi ɛlaḥsab řxaḍar nnes, ad ittwawwet s tiyyita aṭṭas, ^■   48 maca wenni war issinen řxaḍar n sides uca igga min isdaheǧen tiyyita, ad ittwawwet s drus n tiyyita. Zi kuř ijjen umi immewc aṭṭas, ad zzayes ittwattar aṭṭas u wi umi x ittwakellef aṭṭas, ad zzayes ittwattar ktar.”

49 “Usiɣ-dd ḥima ad nḍareɣ timessi x temmurt u meɛlik ufiɣ ad tiři tarɣa. 50 Maca ittxeṣṣa ad ttwasɣeḍṣeɣ s yijj n useɣḍeṣ u ttwaḥṣareɣ aṭṭas ař d ɣa ittwakemmeř. ^■   51 Ma ittɣiř awem belli usiɣ-dd ḥima ad wceɣ řehna x temmurt? Lla, ad awem iniɣ, ad din yiři ubeṭṭu. ^■   52 Minzi zi řexxu d tsawent ad mmsebḍan xemsa deg ict n taddart, třata ḍidd tnayen u tnayen ḍidd třata. 53 Babas ad imsebḍa x mmis, u mmis x babas, u yemmas x yeǧis, u yeǧis x yemmas, u řallas x tesřit, u tasřit x řallas.” ^■  

54 Inna i řɣaci: “Xmi i ɣa tẓarem ijj n useynu igeɛɛed-dd zi řɣarb, deɣya ad tinim: ‘Ad yiři wenẓar!’ uca ammu i ɣa imsar! 55 Xmi i ɣa tẓarem asemmiḍ n ljanub ittṣuḍ, xenni ad tinim: ‘Ad yiři řeḥmu!’, uca ammu i ɣa imsar. 56 A imnafqen, aqa tessnem ad tmeyyzem udem n temmurt d ujenna. Ma zman-a mammec war tzemmaren ad t tmeyyzem?”

57 “Mayemmi war tḥekkmem s yixef nwem min iǧan d ṣṣaḥ? 58 Minzi, xmi i ɣa traḥed ɣar řmexzen ak-d weɣrim nnek, egg tizemmar aṭṭas am teǧid ɛad akis deg webrid maḥend ad zzayes tᵉttwafekked, ḥima war cek ittjarri ɣar řqaḍi uca řqaḍi ad cek isellem i wemxazni, xenni ad cek inḍar umxazni di řeḥbes. 59 Ad ac iniɣ, cek war dd ssenni tᵉtteffɣed ař ɣa txeǧṣed aṣuldi aneggaru!”