1 Am tuɣa ittẓaǧa deg ijj n wemcan, imsar, umi ikemmeř Netta taẓaǧit nnes, aqa ijjen zeg imeḥḍaren nnes inna as: “A Siditneɣ, seřmed aneɣ ad neẓẓaǧ amecnaw mammec tuɣa Yuḥanna isseřmad ɛawed imeḥḍaren nnes.” 2 Inna asen: “Meřmi ma teẓẓuǧem, inim:

‘Babatneɣ i iǧan deg ijenwan,

ad ittwaqeddes Isem nnek,

ad dd-tas Tgeldit nnek,

ad tᵉttwagg am mammec texsed Cek,

am deg ujenna, ammu ɛawed di temmurt.

3 Ewc aneɣ kuř ass aɣrum nneɣ i kuř ass,

4 uca ɣfar aneɣ ddnub nneɣ,

minzi neccin ɛawed nsameḥ i marra inni dayneɣ ittursen.

War d aneɣ ssidif ca deg uɣekkwi,

maca senjem aneɣ zeg umɛeffan.’ ”

5 Xenni inna asen: “Man wen zzaywem i ɣar iǧa ijj n umeddukkeř, ad ɣares iraḥ deg wezyen n ǧiřet uca ad as ini: ‘A ameddukkeř, arḍeř ayi třata n tecnifin, 6 minzi ijj n umeddukkeř inu, ixecc-dd ɣari zeg usafar, war ɣari min d as ɣa qeddmeɣ!’, 7 uca xenni ad xas dd-yarr umeddukkeř nnes zi daxeř, ad as yini: ‘War dd ayi ttṣeddaɛ, tawwart tbelleɛ u tarwa aqa-tt akidi di tassut, war zemmareɣ ad dd-kkareɣ maḥend ad ac wceɣ aɣrum.’ 8 Ad awem iniɣ, mařa war dd-ikkar ḥima ad as iwc umi netta d ameddukkeř nnes, iwa ad dd-ikkar ad as iwc mecḥař ma iḥdaj x ssibbet n řewɛaret nnes.

9 Ad awem iniɣ: Tttarem, xenni ad awem immewc, arzum, xenni ad tafem, ssqarqbem, xenni ad awem arezmen. ^■  

10 Minzi marra wi i ɣa ittaren ad iksi u wi i ɣa yarzun ad yaf u wi i ɣa issqarqben ad as ittwarzem.

11 Niɣ din jar awem ijj n tbabat, wenni umi d as i ɣa ittar mmis aɣrum, ad as iwc aẓru? Niɣ umi ɣa ittar asřem, ad as iwc afiɣar? ^■  

12 Niɣ mařa ittar zzayes tameǧač, ad as iwc taɣarḍent?

13 Mařa kenniw, inni iǧan d iɛeffanen, tessnem ad tewcem timewca tiṣebḥanin i tarwa nwem, mecḥař s waṭṭas ad iwc Tbabat i iǧan deg ujenna Arruḥ Iqeddsen i yenni d as t ittaren!”

14 Umi issuffeɣ Netta ijj n cciṭan nni ittarrin bnadem d agnaw, imsar, awarni řami issuffeɣ cciṭan nni, aqa agnaw ibda issawař. Uca xenni ittebhet řɣaci marra. ^■  

15 Maca ca zzaysen nnan: “Issuffuɣ ccwaṭen s webrid n Bᵉɛalzabub, ibřis, ameqqran n ccwaṭen.” ^■  

16 Inneɣni jarrben t, ttaren zzayes ict n řeɛřamet zeg ujenna.

17 Maca Netta yargeb x ixarriṣen nsen, inna asen: “Kuř tageldit i ibḍan x yixef nnes ad tᵉttwareddeǧ u taddart i ibḍan x yixef nnes, ad tewḍa. ^■  

18 Mařa ibḍa cciṭan x yixef nnes, mammec i ɣa teqqim tgeldit nnes? Minzi kenniw teqqarem belli Necc ssuffuɣeɣ ccwaṭen s Bᵉɛalzabub.

19 Mařa Necc ssuffuɣeɣ ccwaṭen s Bᵉɛalzabub, s minzi i ten ssuffuɣen tarwa nwem? S uyenni ad iřin nitni d lquḍat xawem. 20 Maca mařa tuɣa s uḍaḍ n AREBBI i zi ssuffuɣeɣ ccwaṭen, xenni aqa tqarreb-dd ɣarwem Tgeldit n AREBBI. 21 Min ɣa yekk weryaz ijehden iḥezzmen s řesnaḥ ittɛessa x řemraḥ nnes, ad yiři wagřa nnes di řaman. 22 Maca meřmi i dd ɣa yas wenni iǧan d jjiheř xas uca ad t iɣřeb, aqa netta ad as ikkes řesnaḥ min xef tuɣa ittcař uca ad ibḍa min tuɣa zzayes iksi.

23 Wenni war iǧin akidi, aqa-t ḍidd inu u wenni war kidi issmunin, aqa netta izuzzara.”

24 “Xmi i ɣa iffeɣ řaryaḥ amengus zi bnadem, ad icuqq deg imucan war daysen bu waman, ad yarzu arraḥet uca xmi war tt ittif, ad yini: ‘Ad ɛeqbeɣ ɣar taddart inu tenni zi dd-ffɣeɣ.’ ^■   25 Xmi dd ɣa yas, ad tt yaf, tfarḍ, teɛdeř. 26 Xenni ad iraḥ, ad iksi sebɛa n řaryaḥ nneɣni iɛeffanen xas, ad dd-adfen uca ad zedɣen dinni. Xenni ad idweř uneggar n bnadem nni war iḥři ktar x mammec t tuɣa ɣar umezwar.” ^■  

27 Am issawař s uya, tessgeɛɛed ict n temɣart zi řɣaci tmijja nnes, tenna as: “Sseɛd n uɛeddis i Cek iksin u tabbuct i zi tᵉṭṭḍed!” 28 Netta inna: “Sseɛd n yinni ittesřan awař n AREBBI uca ḥeffḍen t.” ^■  

29 Am tuɣa imun řɣaci, ibda iqqar: “Jjiř-a d aɛeffan ittᵉttar řeɛřamet, war d as tᵉttmewci řeɛřamet mɣir řeɛřamet n Yunus anabi. ^■   30 Minzi amecnaw mammec tuɣa Yunus d řeɛřamet i aytbab n Ninwa, ammu i ɣa yiři Mmis n bnadem ɛawed d řeɛřamet i jjiř-a. 31 Tajeǧidt n ljanub ad tekkar deg wass n lḥisab ak-d yeryazen n jjiř-a, ad ten tḥaseb. Minzi tusa-dd zi tneggura n temmurt ḥima ad tseř i tiɣit n Suliman. Xzar, aqa da wenni imɣaren x Suliman. ^■   32 Iryazen n Ninwa ad dd-kkaren deg wass n lḥisab ak-d jjiř-a uca ad ten ḥasben, minzi nitni tuben awarni i ubarreḥ n Yunus. Xzar, aqa da wenni imɣaren x Yunus!” ^■  

33 Uřa d ijj war issreqqi řqendiř uca issrusa t deg wemcan inuffaren niɣ sadu řmud n imendi, maca issrusa t x řmerfeɛ ḥima inni dd ɣa yadfen ad ẓaren tfawt. ^■   34 Řqendiř n arrimet nnek d tiṭṭ. Mařa tiṭṭ nnek teṣfa, ad tiři tfawt uřa di marra arrimet nnek. Mařa tiṭṭ nnek d taɛeffant, uřa d arrimet nnek ad tiři d taǧest. ^■   35 Ḥḍa xenni, ḥima tafawt i dayek iǧan war tᵉttiři d taǧest. 36 Mařa marra arrimet nnek teccur s tfawt, war dayes uřa d ijj n uɣezdis ibarrcen, xenni ad dayes tiři tfawt kuřci, amecnaw mammec xmi yareqq řqendiř s ṭṭya nnes.”

37 Am tuɣa issawař s man aya, iɛarḍ i-t ijj n Ufarisi ɣar umecři akides. Xenni yudef, iqqim ɣar ṭṭabřa. 38 Umi t iẓra Ufarisi, ittebhet minzi Netta war issird ca d amezwar qbeř i umecři.

39 Maca Yeccu inna as: “Kenniw, a Ifarisiyyen, tessizdagem barra n řkas d ṭṭebṣi, maca daxeř nwem iccur s řexcunect d řɣar. ^■   40 Kenniw, a ifɣař, ma war iǧi Wenni iggin min iǧan ɣar barra, igga uřa d min iǧan daxeř? 41 Wcem maca min iǧan daxeř d ṣṣedqet, u xzar, marra min daywem ad yiři d amezdag.” ^■  

42 Maca uct xawem, a Ifarisiyyen minzi ttɛeccaram nneɛnaɛ d wazar d marra tibbi, xenni tejjim řḥeqq d tayri n AREBBI ɣar uɣezdis. Iwa ittxeṣṣa awem ad teggem marra timesřayin-a, nhřa ma ad tᵉttum inneɣni. ^■  

43 Uct xawem, a Ifarisiyyen, minzi iɛjeb awem ad teqqimem x řekrasi n zzat di temzidawin u iɛjeb awem ad xawem seǧmen iwdan di řeswaq. ^■  

44 Uct xawem, a imseřmaden n idlisen d Ifarisiyyen, kenniw, a imnafqen, minzi kenniw tᵉtteggem am imeḍřan idduřyen min xef gguren iwdan am war ssinen.” ^■  

45 Ijjen zeg imseřmaden n idlisen iṭṭef deg wawař, inna as: “A Amseɣɣar, aqa xmi d aneɣ teqqared aya, tessfeṭṭaḥed aneɣ uřa d neccin.”

46 Maca Netta inna: “Uct xawem, a imseřmaden n idlisen, minzi tessarebbum řeḥmuř iḍeqřen i tkessit x iwdan, maca kenniw s yixef nwem war tᵉttḥidim řeḥmuř nni uřa s ijjen zeg iḍewḍan nwem! ^■  

47 Uct xawem, minzi tbennam imeḍřan n inabiyyen, am řejdud nwem nɣin ten. ^■   48 S man aya tneɛɛmem, aqa kenniw tareṭṭam s min ggin řejdud nwem, minzi nitni nɣin ten uca kenniw tbennam imeḍřan nsen. 49 S uyenni tiɣit n AREBBI tenna: “Aqa ad asen dd-ssekkeɣ inabiyyen d rrusul. Ad aẓẓřen nitni x ca zzaysen uca ad ten nɣen, ^□  ■   50 ḥima ad ttwattaren zi jjiř-a idammen n marra inabiyyen i ittwassizřen zeg wami tᵉttwagg ddunect: 51 zeg idammen n Habil ař idammen n Zakariyya wenni nɣin jar uɛalṭar d Taddart Iqeddsen! Wah, ad awem iniɣ belli ggur ad ttwattaren idammen nsen zi jjiř-a. ^■  

52 Uct xawem, a imseřmaden n idlisen, minzi tkessim tasarut n tussna. Kenniw s yixef nwem war tᵉttidfem u inni tuɣa ittadfen, tᵉṭṭfem ten.” ^■  

53 Am tuɣa akidsen issawař s uya, bdan imseřmaden n idlisen d Ifarisiyyen ttḍaddan t aṭṭas. Ffugmen, ḥeccen x wawařen nnes, 54 uca arzun ad as ggen taxceft s tḥraymect ḥima ad t ṭṭfen s ca zeg uqemmum nnes, ḥima ad t ḍeřmen.