1 Awarni man aya iřeqqem Yeccu ɛawed sebɛin nneɣni zeg imeḥḍaren nnes uca issekk i-ten tyuya tyuya qibač i uɣembub nnes ɣar kuř tandint d wemcan mani tuɣa Netta igga ad iraḥ. 2 Inna asen: “Tameyra aṭṭas, maca ixeddamen drus, s uyenni ttarem i Bab n tmeyra ḥima ad issekk ixeddamen ɣar tmeyra nnes. ^■   3 Ruḥem! Aqa ad kenniw ssekkeɣ amecnaw izmaren jar wuccanen. ^■   4 War kiwem kessim ttesṭim n tmenyat niɣ tacyart uřa d sandaliyat, war ttseǧamem x ḥed deg webrid. ^■   5 Man ma taddart i ɣa tadfem, inim d amezwaru: ‘Řehna x taddart-a.’ ^■   6 Mařa din mmis n řehna, řehna nwem ad xas yarsa, mařa war iǧi amenni, řehna nwem ad ɣarwem dd-iɛqeb. 7 Qqimem di taddart nni, ccem, swem zi min ɣarsen, minzi amsexxar isdaheǧ řmunet nnes. S uya war ggurem ca zi taddart ɣar taddart nneɣni. ^■   8 Man ma tandint i ɣa tadfem uca ad kenniw qebřen, ccem min d awem ɣa wcen. 9 Sgenfam imehřac i din iǧan, inim asen: “Aqa tqarreb-dd ɣarwem Tgeldit n AREBBI.”

10 Man ma tandint i ɣa tadfem, war kenniw qbiřen, ffɣem ɣar zznaqi nnes, inim: ^■  

11 “Ɛad uřa d taɛejjajt i dayneɣ iřeṣqen x iḍaren nneɣ n tendint nwem, ad tt nezzerz xawem. Maca snem aya, aqa tqarreb-dd ɣarwem Tgeldit n AREBBI! ^■  

12 Ad awem iniɣ belli deg wass nni ad yiři řḥař n Sadum ihwen zi tendint nni.”

13 Uct xam, a Xurazin, uct xam, a Baytṣayda! Mři msarent di Ṣur d Ṣaydun řeɛjayeb i ittwaggen daykent, ad tiři tubent zi zman am qqiment di txancet n wecḍan d iɣɣeḍ x izeǧifen nsent.

14 Maca ad yiři řḥař n Ṣur d Ṣaydun ihwen zi řḥař nkent di lḥisab.

15 U cem, a Kafarnaḥum, tenni tuɣa ittwasgeɛɛden ɣar ujenna, aqa ad tᵉttwassehwid ɣar řaxart!

16 Wi daywem i ɣa isřen, ad zzayi iseř, wi kenniw ɣa yagin, ad ayi yagi u wi d ayi ɣa yagin, ad yagi wenni d ayi dd-issekken.” ^■  

17 Xenni ɛeqben sebɛin nni s řefraḥet aṭṭas, nnan as: “A Siditneɣ, uřa d ccwaṭen ṭṭaɛen aneɣ s Yisem nnek.”

18 Xas uca inna asen: “Ẓriɣ cciṭan iwḍa-dd amecnaw assam zeg ujenna. ^■  

19 Xzar, Necc ad awem wceɣ ṣṣulṭa ḥima ad tɛefsem x ifiɣran d iɣarḍmiwen u x marra jjehd n řeɛdu. Uřa d ict n řḥajjet war kenniw teḍarri. ^■   20 Maca war farrḥem ca s uya belli aqa ccwaṭen ad awem ṭṭaɛen, maca farḥem belli aqa ismawen nwem ttwazemmemen deg ijenwan.” ^■  

21 Di tsaɛɛet nni ɛawed ifarḥ Yeccu di Arruḥ Iqeddsen, inna: “Necc ttqadiɣ Cek, a Baba, Bab n ujenna d temmurt, minzi tessnuffared timesřayin-a x imiɣisen u x aytbab n řeɛqeř uca tessaregbed tent i iḥenjiren imeẓyanen. Wah, a Baba, ammu i tuɣa ixs řxaḍar nnek!” ^■   22 Xas uca inneqřeb ɣar imeḥḍaren nnes, inna: “Kuřci immewc ayi zi Baba uca uřa d ijj war issin man wen d Tamemmit mɣir Tababat u man wen d Tababat mɣir Tamemmit, d wenni umi ixs Tmemmit ad t issargeb.” ^■  

23 Xenni inneqřeb-dd ɣar imeḥḍaren weḥḥedsen, inna: “Sseɛd n tiṭṭawin i ittwařan min tᵉttwařam kenniw. ^■   24 Minzi Necc ad awem iniɣ, aqa aṭṭas n inabiyyen d ijeǧiden xsen ad ẓaren min tᵉttwařam kenniw uca war tt tᵉttwiřin, uřa ad sřen min tᵉttesřam uca war tt ttesřin.” ^■  

25 Xzar, ijj n umseřmad n idlisen ikkar-dd ḥima ad t iqeǧeb, inna: “A Amseɣɣar, min ɣa ggeɣ ḥima ad warteɣ Tudart ittduman?” 26 Inna as: “Mammec t yurin di Ccariɛa? Mammec teqqared?” 27 Yarra-dd, inna as: “Ad texsed SIDI, AREBBI nnek s marra wuř nnek, s marra řeɛmar nnek, s marra jjehd nnek, s marra řeɛqeř nnek uca ad texsed amqarreb nnek amecnaw ixef nnek.” ^■   28 Inna as: “Aqa tarrid nican. Egg man aya uca ad teddared.” 29 Maca netta ixs ad issegged ixef nnes, inna as: “Man wen iǧan d amqarreb inu?”

30 Yarra-dd xas Yeccu, inna as: “Ijj n weryaz ihwa-dd zi Urcalim ɣar Ariḥa uca iwḍa deg ifassen n iceffaren, kksen as arruḍ, wtin t s weɛmud, xenni ruḥen, jjin t jar řmewt d tudart. 31 Xenni ihwa-dd ijj n ukehhan ɣar webrid nni. Netta iẓra i-t, maca ikka ɣar ujemmaḍ n webrid. 32 Ammu ɛawed uřa d ijj n Ulawi iɛdu-dd x wemcan nni, maca ikka xas. 33 Maca ijj n weryaz zi Samarya, tuɣa-t deg usafar, yiweḍ-dd ɣares, iẓra i-t uca iḥinn xas aṭṭas. 34 Iqarreb-dd ɣares, icedd as iyezzimen nnes, iseyyeḥ xasen binu d zzect, issenya i-t x zzayřet nnes, yiwyi i-t ɣar wenwař, ithella dayes. 35 Tiwecca nnes řami iruḥ, iwca tnayen n dinar i bab n wenwař, inna as: ‘Thilla dayes u mařa txeǧṣed ktar zi man aya, ad cek xeǧṣeɣ xmi dd ɣa ɛeqbeɣ.’ 36 Man wen zi třata nni tᵉttwařid d amqarreb n wenni iwḍan deg ifassen n iceffaren?” 37 Inna as: “Wenni xas iḥinnen!” Inna as Yeccu: “Iwa uyur, uřa d cek tegged amenni!”

38 Am tuɣa gguren nitni, yudef ɣar ijj n dcar. Ict n temɣart, qqaren as Marta, tareḥḥeb zzayes di taddart nnes. 39 Tuɣa ɣar ta ict n učmas, qqaren as Maryam, tenni tuɣa teqqim ɣar iḍaren n Siditneɣ uca tuɣa tessḥessa i wawař nnes. 40 Maca Marta tuɣa tecɣeř aṭṭas s tsexxart. Nettat tusa-dd ɣares, tenna as: “A Sidi, ma war d ac icqi belli učma tejja ayi ttsexxareɣ weḥḥdi? Ini as ḥima ad ayi tɛawen.” 41 Maca Yeccu yarra-dd, inna as: “Marta, Marta, cem tceɣřed u tqeǧiqed x waṭṭas n tmesřayin, 42 maca ittxeṣṣa ict n řḥajjet waha! Aqa Maryam tixḍar tasɣart taṣebḥant tenni war zzayes ittwattekksen.”