1 Yeccu iřaɣa-dd ɣares tenɛac n rrusul nnes, iwca asen jjehd d ṣṣulṭa x marra ccwaṭen u x marra řehřacat ḥima ad ssgenfan iwdan. ^■   2 Issekk i-ten ḥima ad barrḥen s Tgeldit n AREBBI u ḥima ad ssgenfan imehřac. ^■   3 Inna asen: “War kessim walu deg webrid niɣ taɣɣarct niɣ tacyart niɣ aɣrum uřa d nnuqart, war ittiři ɣar ḥed tnayen n tcamirat. ^■   4 Man taddart i ɣa tadfem, qqimem dinni uca ffɣem ssenni. 5 Mařa teffɣem zi tendint, zerzem xenni taɛejjajt zeg iḍaren nwem qibač i yenni war kenniw iqebbřen, d cchadet xasen.” ^■   6 Xas uca ffɣen rrusul, tuɣa ttcuqqan di dcurat, ttbarrḥen s Řexbar Aṣebḥan dinni, ssgenfan imehřac di kuř amcan.

7 Hirudus, řḥakem x ijj n arbeɛ n temmurt isřa x marra min ittwaggen zzayes uca yarjef. Minzi ca n iwdan tuɣa qqaren aqa Yuḥanna ikkar-dd zi taddart n imettinen. ^■   8 Ca nneɣni nnan aqa Iliya iḍhar-dd u ca nneɣni ɛawed aqa ijjen zeg inabiyyen n wecḥař uya ikkar-dd. 9 Inna Hirudus: “Aqa d necc i iqessen azeǧif n Yuḥanna, maca manis Wa i xef sřiɣ marra man aya?” Uca tuɣa yarezzu ad t iẓar.

10 Umi dd-ɛeqben rrusul, ɛawden i Yeccu marra min ggin. Xenni yiwyi ten akides ɣar ijj n wemcan ixřa n Baytṣayda ḥima ad iřin weḥḥedsen akides. ^□  ■  

11 Umi yargeb řɣaci x man aya, iḍfar i-t. Netta tuɣa yareḥḥeb zzaysen, issiweř akidsen x Tgeldit n AREBBI u inni iḥdajen ad ttwasgenfan, issgenfa ten.

12 Ibda řḥař issutum, qarrben-dd ɣares imeḥḍaren nnes, nnan as: “Sekk řɣaci ḥima ad raḥen ɣar ředcur d iyyaren i d asen-dd innḍen, ad dinni afen mani i ɣa ssensen d min ɣa ccen, minzi aqa aneɣ da deg ijj n wemcan ixřan.” ^■  

13 Maca Netta inna asen: “Wcem asen kenniw ḥima ad ccen.” Nnan as: “War ɣarneɣ mɣir xemsa n tecnifin d tnayen n iseřman mɣir mařa nraḥ u ad nseɣ macca i marra iwdan-a!” ^■  

14 Minzi tuɣa aten di ca n xemsařaf n yeryazen. Maca Yeccu inna asen: “Sɣimem ten di tɛurricin n xemsin.”

15 Uca ggin imeḥḍaren amenni uca ssɣimen ten marra.

16 Iksi ticnifin s xemsa uřa d tnayen n iseřman nni, issgeɛɛed tamuɣři nnes ɣar ujenna, uca ibark, yarẓa uca iwca i-ten i imeḥḍaren nnes ḥima ad ten wcen i řɣaci. ^■  

17 Ccin, jjiwnen marra. Ařami d jarwen min iqqimen zeg iřeqqwaz, tuɣa dinni tenɛac n tsuǧatin.

18 Am tuɣa Yeccu ittẓaǧa weḥḥdes, tuɣa imeḥḍaren din akides. Isseqsa ten, inna: “Min iqqar řɣaci min ɛniɣ?” ^■  

19 Arrin-dd, nnan as: “ ‘Yuḥanna Amseɣḍaṣ!’, u inneɣni: ‘Iliya!’, u ca inneɣni: ‘Aqa ikkar-dd ijj n unabi, ijjen zeg inabiyyen n wecḥař uya’.” ^■   20 Inna asen: “I kenniw, min teqqarem min ɛniɣ?” Yarra-dd Cimɛun, inna: “Lmasiḥ n AREBBI.” 21 Xenni iɛřem asen s jjehd uca iweṣṣa ten, war t qqaren i ḥed.

22 Inna asen: “Ittxeṣṣa i Mmis n bnadem ad iweddeb aṭṭas uca ad immenḍar zeg imɣaren n řgens d imeqqranen n ikehhanen d imseřmaden n idlisen, ad ittwaneɣ uca deg wass wiss třata ad dd-ikkar.” ^■   23 Xas uca inna i marra: “Mařa ixs ḥed ad dd-yas awarni ayi, ittxeṣṣa as ad inkar ixef nnes, ad iksi ṣṣalib nnes kuř ass uca ad ayi dd-iḍfar. ^■   24 Minzi wi ixsen ad issenjem tudart nnes, ad tt iweddar. Maca wi ixsen ad iweddar tudart nnes di ṭṭweɛ inu, wa ad tt ittwassenjem. ^■   25 Minzi man řefḍeř i bnadem mařa yarbeḥ ddunect, maca ad yareddeǧ nnefs nnes niɣ ad tt iweddar? 26 Minzi wenni i ɣa isseḍḥan zzayi u zeg wawařen inu, ad zzayes isseḍḥa ɛawed Mmis n bnadem xmi dd ɣa yas deg uɛuǧi nnes u deg uɛuǧi n babas d lmalakat iqeddsen. ^■   27 S tidett, Necc ad awem iniɣ, aqa ca zeg inni da iḥḍaren, war ttqisin ca řmewt ař ɣa ẓaren Tageldit n AREBBI.” ^■  

28 Ɛřaḥař tmenya n wussan awarni řami inna awařen-a, iwyi-dd Yeccu akides Cimɛun d Yaɛqub d Yuḥanna uca igeɛɛed ɣar wedrar ḥima ad iẓẓaǧ. ^■   29 Am tuɣa ittẓaǧa, ibeddeř wudem n uɣembub nnes u arruḍ nnes idweř d acemřař ittissiqen. 30 Xzar, tnayen n yeryazen ssiwřen akides, tuɣa aten d Musa d Iliya, 31 inni dd-iḍharen s uɛuǧi, tuɣa ssawařen x wuffuɣ nnes i tuɣa i ɣa ikemmeř di Urcalim. 32 Cimɛun d yenni akides, tuɣa ikka xasen yiḍeṣ, ařami ɛřayen war zemmaren ad qqimen faqen. Nitni ẓrin aɛuǧi nnes d tnayen n yeryazen bedden akides. 33 Ařami xas farqen ina, inna Cimɛun i Yeccu: “A Amseřmad inu, aqa mliḥ umi i da neǧa. Ejj aneɣ ad newwet třata n iɛuccuten, ijjen i Cek, ijjen i Musa u ijjen i Iliya.” Netta maca war issin min inna. 34 Awarni řami inna man aya, ikka-dd xasen ijj n useynu, issduři ten s tiři nnes uca nitni dewřen ggʷeden umi ẓrin Musa d Iliya udfen ɣar useynu. 35 Tusa-dd ict n tmijja zeg ujenna, teqqar: “D wa d Mmi Iɛizzen, sřem ɣares!” ^■   36 Ařami dd-tusa tmijja, ufin Yeccu weḥḥdes. Nitni ssqaren uca war xebbaren ḥed deg wussan nni s min ẓrin.

37 Tiwecca nnes ařami tuɣa dd-hekkwan zeg wedrar, iřqa t-i-dd ijj n řɣaci d ameqqran. ^■   38 U xzar, ijj n weryaz zi řɣaci isɣuy, inna: “A Amseɣɣar, ttᵉttareɣ zzayek, ḥinn xafi, aqa-t d ayenni n mmi i ɣari. 39 Xzar, itteṭṭef i-t ijj n řaryaḥ, xenni isɣuyyu deɣya, ittɣeẓẓa tiɣmas u ittekk as-dd kuffu zeg uqemmum, u s tamara aṭṭas waha i d as yarexxu am t iyezzem ammu. 40 Ttareɣ zeg imeḥḍaren nnek ad t ssuffɣen, maca war zemmaren.” 41 Yarra-dd Yeccu, inna: “A jjiř i war yuminen imɛewwjen, mecḥař ɣarwem i ɣa kkeɣ ad kenniw ksiɣ? Awi-dd mmic da!” 42 Ařami ɣares t-i-dd-issqarreb, inḍar i-t cciṭan di temmurt, imezzeq i-t. Maca Yeccu iwebbex řaryaḥ amengus, issgenfa aḥenjir uca yarra i-t i baba as.

43 Marra tuɣa ttɛejjben di řemɣaret n AREBBI. Umi tbehten marra nitni di marra min igga Yeccu, inna Yeccu i imeḥḍaren nnes: 44 “Ggem uřa d kenniw awařen-a deg imezzuɣen nwem, minzi Mmis n bnadem ad immewc deg ifassen n iwdan.” ^■   45 Maca nitni war fhimen i wawař-a, tuɣa ittwasnuffar xasen maḥend war t fehhmen. Uca nitni ggʷeden ad t sseqsan x wawař-a. ^■  

46 Yudef i-ten ijj n umcubbec x man wen zzaysen i ɣa yiřin d ameqqran qaɛ. ^■   47 Issen Yeccu axarreṣ n wuřawen nsen uca iksi ijj n uḥenjir issbedd i-t ɣares, 48 inna asen: “Wi i ɣa iqebřen aḥenjir-a s Yisem inu, iqbeř ayi Necc u wi d ayi ɣa iqebřen, iqbeř wenni d ayi dd-issekken. Minzi wenni d ameẓyan qaɛ jar awem, netta ad yiři d ameqqran.” ^■  

49 Iṭṭef Yuḥanna deg wawař, inna: “A Amseřmad nneɣ, neẓra ijjen issuffuɣ ccwaṭen s Yisem nnek uca nessbedd i-t, minzi Netta war Cek iḍeffar jmiɛ akidneɣ.” ^■   50 Inna as Yeccu: “War t ssbeddam, minzi wi war iǧin ḍidd nwem, aqa-t akidwem.” ^■  

51 Umi dd-iwḍen ad kemmřen wussan n tkessit nnes ɣar ujenna, yarra aɣembub nnes ɣar Urcalim. ^■   52 Issekk zzates ireqqasen. Ruḥen ina uca iwḍen ɣar ijj n dcar n Isamariyyen ḥima ad as wejden din. 53 Nitni maca war t qbiřen, minzi yarra aɣembub nnes ḥima ad iraḥ ɣar Urcalim. ^■   54 Umi ẓrin Yaɛqub d Yuḥanna, imeḥḍaren nnes, man aya, nnan: “A Siditneɣ, ma texsed ad numur ḥima timessi ad dd-tehwa zeg ujenna, maḥend ad ten tecc amecnaw mammec igga ɛawed Iliya?” 55 Maca am dd-inneqřeb, iwebbex i-ten, inna: “War tessinem ca man arruḥ i zi teǧam kenniw? 56 Minzi Mmis n bnadem war dd-yusi ca ḥima ad isshellek řeɛmur n iwdan, maca ḥima ad iwc Tudart!” Xenni ruḥen ɣar dcurat nneɣni. ^■  

57 Am gguren nitni deg webrid, inna as ijj n weryaz: “Ad Cek ḍfareɣ mani ma i ɣa traḥed.” ^■   58 Inna as Yeccu: “Iceɛbawen ɣarsen ifran d ijḍaḍ n ujenna ɣarsen řeɛwacc, maca Mmis n bnadem war ɣares uřa mani i ɣa isenned azeǧif nnes.”

59 Inna i wenneɣni: “Ḍfar ayi-dd!” Maca wanita inna: “A Sidi inu, ejj ayi amezwar ad areggʷeḥeɣ ad neḍřeɣ baba!” ^■  

60 Maca inna as Yeccu: “Ejj imettinen ad neḍřen imettinen nsen, maca cek ruḥ, tbarrḥed s Tgeldit n AREBBI.” ^■  

61 Inna as wenneɣni: “Ad Cek ḍfareɣ, a Sidi, maca ejj ayi amezwar ad ggeɣ allah ihennik x yenni ɣari di taddart inu, xenni ad dd-aseɣ.” 62 Inna as Yeccu: “Uřa d ijj, mařa issrusa afus nnes x usɣar, xenni ad ixzar ɣar ḍeffar, ad iṣřeḥ i Tgeldit n AREBBI.” ^■