1 Awarni uya tuɣa iggur zi tendint d dcar ɣar nneɣni, ittbarreḥ s Tgeldit n AREBBI. Tuɣa akides tenɛac n rrusul nnes, 2 d ca n temɣarin nni tuɣa ittwassgenfan zi řeḥřacat u zi řaryaḥ iɛeffanen, aqa at Maryam, qqaren as: ‘tenni n Majdala’, i zi ttwasuffɣen sebɛa n ccwaṭen, ^■   3 d Yuḥanna, tamɣart n Xuzi, awkiř n Hirudus, d Susanna, d tinneɣni aṭṭas i tuɣa ttsexxarent xasen s wagřa nsent.

4 Řami din issmun ijj n řɣaci d ameqqran, usin-dd ɣares zi marra tineddam, inna asen s yijj n umedya: ^■   5 “Iffeɣ-dd ijj n umzarraɛ ḥima ad izarɛ zzariɛet nnes. Am izarreɛ, tewḍa cwayt n zzariɛet deg webrid, iɛfes xas uca ineqb i-tt ijj n ujḍiḍ. 6 Tewḍa cwayt n zzariɛet nneɣni x weẓru, umi dd-iɣmi deɣya, yuẓeɣ, minzi war ɣares tuɣi tuffet. 7 Tewḍa cwayt n zzariɛet nneɣni di řwest n isennanen uca isennanen ɣemyen-dd akides uca jeyyfen tt. 8 Tewḍa cwayt n zzariɛet nneɣni di temmurt yareḍben d issɣemmayen, uca umi dd-iɣmi, igga řɣiǧet n mya imuren.” Awarni řami tuɣa iqqar man aya, iřaɣa: “Wenni ɣar iǧa imezzuɣen i useǧi, ejj i-t ad iseř.”

9 Sseqsan t imeḥḍaren nnes: “Min ixs ad yini umedya-a?” ^■  

10 Inna asen: “I kenniw umi immewc ad tessnem ssirr n Tgeldit n AREBBI, maca i inneɣni s imedya, ařami nitni ttwařan maca war ttwiřin uca ttesřan war fehhmen. ^■  

11 D wa d řmeɛna n umedya: zzariɛet nettat d Awař n AREBBI. ^■  

12 Ina x ṭṭarf n webrid, nitni d inni ittesřan Awař, maca xenni ittas-dd ibřis, ittekkes Awař zeg wuř nsen ḥima war ttimnen, ad nejmen u ad ddaren.

13 Ina x weẓru, nitni d inni xmi i ɣa sřen i Wawař, ad t qebřen s řefraḥet, maca war ɣarsen bu weẓwar, ttamnen ɣar xennit, di řweqt n ujarreb ttneqřaben. ^■  

14 Ina i iwḍan deg isennanen, nitni d inni ittesřan Awař, xenni ttraḥen, ttbuxsuyen deg imnusen d wagřa d ṭṭamuɛ n ddunect, war ssendayen ca řɣiǧet. ^■  

15 Ina di temmurt yareḍben, nitni d inni ittesřan i Wawař, xemmřen t deg wuř nican, iṣbeḥ, uca ssendayen řɣiǧet s ṣṣbar.”

16 “Uřa d ijj war issruɣi řefnar uca iqebbar xas s yijj n uqedduḥ niɣ issrusa t sadu qama, maca s řemqřub issrusa t x řmerfeɛ ḥima inni dd-ittadfen ad ẓaren tafawt. ^■  

17 Minzi war din min idřin, war ggur ad dd-iffeɣ i marra ɣar barra, u war din min innuffaren war ittwissin uca ggur ad dd-iffeɣ i marra ɣar barra. ^■  

18 Ḥḍam mammec tᵉttesřam, minzi wenni ɣar iǧa ad as immarni, u wenni war ɣar iǧi, min d as ittɣiř ɣares, ad zzayes ittwakkes.” ^■  

19 Yemmas d aytmas usin-dd ɣares, war zemmaren ad akides ssiwřen s ssibbet n řɣaci. ^■   20 Xebbaren t, nnan as: “Yemmac d aytmac bedden barra, xsen ad Cek ẓaren.” 21 Yarra-dd, inna asen: “Yemma d aytma, aqa d inni ittesřan Awař n AREBBI u tteggen zzayes.” ^■  

22 Deg ijjen zeg wussan nni inya deg ict n tɣarrabut, Netta d imeḥḍaren nnes. Inna asen: “Ejj aneɣ ad neẓwa ɣar ujammaḍin n řebḥar!” ^■   23 Am ten tuɣa ruḥen di řebḥar, ikka xas yiḍeṣ. Xenni tehwa-dd ict n tḥaryaḍt n usemmiḍ di řebḥar, tebda tɣarrabut ɛřayen ad tehwa. 24 Qarrben ɣares uca ssfaqen t, nnan as: “A Amseřmad nneɣ, a Amseřmad nneɣ, aqa nɣarreq.” Netta ikkar-dd, iwebbex asemmiḍ d řemwaj n waman uca ssqaren, yarsa řḥař. 25 Xenni inna asen: “Mani iǧa l’iman nwem?” Ggʷeden, tbehten, nnan jar asen: “Min iɛna Wa, aqa ittamar uřa d asemmiḍ d waman uca ṭaɛan as.” ^■  

26 Uyuren, usin-dd ɣar jjihet n Gadarinus tenni qibač i Ljalil. ^■   27 Umi dd-iffeɣ ɣar temmurt, iřqa t-i-dd ijj n weryaz zi tendint, aṭṭas zeg wami tuɣa dayes ccwaṭen u tuɣa war ittirḍ arruḍ, war izeddeɣ di taddart maca deg imeḍřan. 28 Umi iẓra Yeccu, isɣuy, iwḍa ɣar iḍaren nnes, inna s jjehd “Min din jar aneɣ necc d Cek a Yeccu, Mmis n AREBBI, Amɛuǧi x kuřci? Ttzawageɣ Cek, war d ayi ttɛeddab?” 29 Maɣar Netta yumur i řaryaḥ amengus ḥima ad dd-iffeɣ zi bnadem nni, minzi tuɣa-t dayes ɛad ijj n řmijar d ameqqran. Tuɣa arezzun ad t carfen s snaseř d iceddiyyen, maca netta tuɣa ittareẓẓa iceddiyyen uca xenni yuẓẓeř xas cciṭan ɣar řexřa. 30 Isseqsa t Yeccu: “Mammec d ac qqaren?” Inna as: “Lixyun ”, minzi ccwaṭen aṭṭas tuɣa udfen dayes. 31 Nitni ttaren zzayes ḥima war ten ittamar ad raḥen ɣar weḥfur.

32 Tuɣa din ict n tḥimart d tameqqrant n iřfan, tuɣa thedda deg wedrar. Ttaren zzayes ḥima ad ten ijj ad dayes adfen. Uca Netta isamḥ asen. 33 Ffɣen ccwaṭen zi bnadem nni, udfen deg iřfan, xenni teqnunni tḥimart zi jjarf di řebḥar uca tɣarq.

34 Umi ẓrin imeksawen min imsaren, arewřen uca ɛawden t di tendint u di dcurat. 35 Ffɣen-dd iwdan ḥima ad ẓaren min imsaren, usin-dd ɣar Yeccu, ufin bnadem nni i zi tuɣa ffɣen ccwaṭen, yarḍ, s řeɛqeř, iqqim ɣar iḍaren n Yeccu, uca ggʷeden nitni. 36 Inni iẓrin man aya, ɛawden asen mammec ittwasgenfa umaryaḥ. 37 Řɣaci n Ijadariyyen zawgen t ḥima ad xasen iggʷej, minzi tudef i-ten tiggʷudi temɣar. Xas uca yenya Yeccu di tɣarrabut, iggʷej xasen. ^■  

38 Aryaz i zi ffɣen ccwaṭen, ittar zzayes, ma ad taɣ izemmar ad ɣares iqqim, maca Yeccu issekk i-t, inna as: ^■   39 “Ɛqeb ɣar taddart nnek, ɛawed i ayt bab n taddart min dayek igga AREBBI.” Xas uca iruḥ, ibarreḥ di qaɛ tandint s marra min dayes igga Yeccu.

40 Ařami dd-iɛqeb Yeccu, yareḥḥeb zzayes řɣaci, minzi tuɣa marra arezzun xas. 41 U xzar, yusa-dd ijj n weryaz qqaren as Yayrus, tuɣa-t d ameqqran n temzida. Iwḍa ɣar iḍaren n Yeccu uca izawg i-t ad yadef ɣar taddart nnes, ^■   42 minzi ayenni n yeǧis i ɣares tenni ɣar iǧa tenɛac n iseggʷusa, tuɣa ɛřayen ad temmet. Am kides iggur Yeccu, issdeḥḥes i-t řɣaci.

43 Ict n temɣart, tuɣa ttazzřen zzayes idammen řqedd n tenɛac n iseggʷusa, tseyyar marra řeɛweč nnes x iḍbiben uca teqqim war iǧi wi izemmaren ad tt issgenfa, ^■   44 tusa-dd ɣares zi ḍeffar, tḥada abeḥřuř n warruḍ nnes, uca řexdenni ibedd usizzeř n idammen nnes. 45 Inna Yeccu: “Wi d ayi iḥadan?” Umi nkaren marra, inna Cimɛun Buṭrus d yenni akides: “A Amseřmad nneɣ, řɣaci issdeḥḥes i-c u Cek teqqared: ‘Wi d ayi iḥadan?’ ” 46 Maca Yeccu inna: “Aqa ijjen iḥada ayi, minzi Necc uciɣ jjehd iffeɣ zzayi.” 47 Umi tessen temɣart belli war teqqim war temẓar, tusa-dd s uqefqef uca tewḍa ɣar iḍaren n Yeccu. Txebbar qibač i marra iwdan x man ssibbet i zi t tḥada d mammec tᵉttwasgenfa deɣya. 48 Inna as Netta: “Egg uř, a yeǧi, aqa l’iman nnem iwca am Tudart. Ruḥ di řehna.”

49 Am issawař ɛad, yusa-dd ijjen zi taddart n umeqqran n temzida, inna as: “Aqa yeǧic temmut, war ssaḥař ɛad Amseɣɣar.” ^■   50 Maca Yeccu isřa man aya, inna i babas n tḥenjirt: “War teggʷed ca! Amen waha, nettat ad teddar!” 51 Umi dd-yusa Yeccu ɣar taddart, war ijji uřa d ijjen ad yadef mɣir Cimɛun d Yaɛqub d Yuḥanna d babas n tḥenjirt d yemmas. 52 Tuɣa marra ittru, wtin xas agejdur. Netta inna: “War ttrum, nettat war temmut ca, maca nettat tᵉṭṭeṣ.” ^■   53 Nitni ḍeḥcen dayes, ssnen belli nettat tuɣa temmut.

54 Maca awarni řami issuffeɣ marra, iṭṭef i-tt zeg ufus nnes, iřaɣa, inna as: “A taḥenjirt, kkar!” 55 Idweř-dd dayes buḥbeř uca tekkar řexdenni. Xenni yumur ad as wcen min ɣa tecc. 56 Tbehten lwalidin nnes, maca Netta iweṣṣa i-ten, war qqaren i ḥed min imsaren.