1 Awarni řami ikemmeř marra awařen nnes am d as sřan iwdan, yudef ɣar Kafarnaḥum. 2 Maca ijj n umsexxar n ijj n řqebṭan x mya, wenni tuɣa issɛizz aṭṭas, tuɣa ihřec, tuɣa iggur ad immet. 3 Umi isřa x Yeccu, issekk ɣares ca n imɣaren n Wudayen, ittar as maḥend ad dd-yas uca ad issenjem amsexxar nnes. 4 Řami dd-iwḍen ɣar Yeccu, ḥeccmen t aṭṭas, nnan: “Aqa isdaheǧ ad as tegged aya, 5 minzi netta ittexs řgens nneɣ u ibna aneɣ tamzida.”

6 Xas uca iruḥ Yeccu akidsen. Ařami tuɣa war iggʷij ɛad x taddart, issekk řqebṭan x mya ca n imeddukkař ɣares, nnan as: “A Sidi, war ssiḥiř ixef nnek, minzi necc war sdiheǧeɣ ad tadfed sadu tazeqqa inu. 7 S uyenni necc war ḥesbeɣ ixef inu sdaheǧeɣ ḥima ad ɣarek dd-aseɣ, maca ini awař waha uca ad iggenfa umsexxar inu. 8 Minzi uřa d necc ɛawed d ijj n bnadem sadu ifassen i ǧiɣ u ɣari iɛeskariyyen swadday i ufus inu. Qqareɣ i wa: ‘Ruḥ!’, xenni ittraḥ, i wenneɣni: ‘As-dd!’, xenni ittas-dd uca i umsexxar inu: ‘Egg aya!’, xenni ittegg i-t.”

9 Umi isřa Yeccu aya, ittebhet dayes. Inneqřeb uca inna i řɣaci wenni tuɣa i-t-i-dd-iḍeffaren: “Necc ad awem iniɣ, war ufiɣ uřa di marra Israil l’iman ameqqran amecnaw řqedd n wa.”

10 Ařami ɛeqben inni ittwassekken ɣar taddart, ufin amsexxar amehřuc iggenfa.

11 Tiwecca nnes iruḥ ɣar ict n tendint qqaren as Nayin. Tuɣa din akides imeḥḍaren nnes d ijj n řɣaci d ameqqran.

12 Ařami dd-iqarreb ɣar tewwart n tendint, xzar, ksin-dd ijj n umettin x řmeḥmeř ɣar barra. Netta d ayenni n wenni i tuɣa ɣar yemmas. Yemmas tuɣa-tt d tajjač u tuɣa akides aṭṭas n řɣaci zi tendint.

13 Umi tt iẓra Yeccu tezziǧez as uca inna as: “War ttru!”

14 Xenni iqarreb-dd, iḥada řmeḥmeř uca bedden yinni t yarbun, inna: “A abřiɣ, i cek umi ɣa iniɣ, kkar-dd!” ^■  

15 Iqqim umettin, ibda issawař, xenni yarra as t-i-dd i yemmas.

16 Tudef tiggʷudi di marra uca ssemɣaren AREBBI, nnan: “Aqa ikkar-dd dayneɣ unabi imɣar!” uca: “Aqa issijj-dd AREBBI x řgens nnes.” ^■  

17 Iffeɣ řexbar-a xas ɣar marra Yahudiyya d ředcur i d as dd-innḍen.

18 Imeḥḍaren n Yuḥanna ɛawden as man aya marra. ^■  

19 Iřaɣa Yuḥanna i tnayen zeg imeḥḍaren nnes uca issekk i-ten ɣar Yeccu, iqqar s uqemmum nsen: “Ma d Cek d wenni dd ɣa yasen niɣ ad nraja wenneɣni?” 20 Umi ɣares ruḥen yeryazen, nnan as: “Yuḥanna Amseɣḍaṣ aqa issekk aneɣ-dd ɣarek, inna: ‘Ma d Cek d wenni i dd ɣa yasen niɣ ad nraja wenneɣni?’ ”

21 Di tsaɛɛet nni tuɣa issgenfa aṭṭas n iwdan zi řehřacat d uweddeb nsen u zi řaryaḥ imengas, uca yarra aṭṭas n idarɣařen ttwařan. 22 Yarra-dd Yeccu, inna asen: “Ruḥem, ɛawdem i Yuḥanna min teẓrim d min tesřim. Aqa idarɣařen ttwařan u ineɛḍaben gguren u yenni di iǧa řbarṣ ttwasizdegen u idehcar ttesřan u imettinen ttekkaren uca ittᵉttwabarreḥ s Řexbar Aṣebḥan i imezřaḍ. ^■   23 Sseɛd n wenni war d ayi inderfen.”

24 Umi ffɣen imeḥḍaren n Yuḥanna, ibda iqqar i řɣaci x Yuḥanna: “Min ɣar i ɣa dd-teffɣem ɣar řexřa ad tẓarem? Ma ijj n uɣanim issenhezza t usemmiḍ? ^■   25 Mařa lla, min ɣar tuɣa dd-teffɣem ad tẓarem? Ma ijj n bnadem yarḍ arruḍ yarḍeb? Xzar inni yarḍen arruḍ iɣřan u ddaren deg ufuhart, aqa aten di řeqṣur n ijeǧiden. 26 Xenni min ɣar tuɣa dd-teffɣem ad tẓarem? Ma ijj n unabi? Wah, ad awem iniɣ d ameqqran ktar zeg unabi. 27 Aqa d wa i xef ittwari: ‘Aqa Necc ad ssekkeɣ areqqas inu zzat i uɣembub nnek, wenni i ɣa isswejden abrid nnek ɣar zzat nnek.’ ^■   28 Necc ad awem iniɣ, jar inni dd-ittwaxeřqen zi temɣarin uřa d ijj war iǧi d anabi ameqqran x Yuḥanna Amseɣḍaṣ, maca waxxa amenni d ameẓyan qaɛ di Tgeldit n AREBBI imɣar xas.” 29 Marra iwdan nni d as isřin, uřa d ayt n ḍḍariba cehden i tsegda n AREBBI, minzi nitni ttwasɣeḍṣen s useɣḍeṣ n Yuḥanna. 30 Maca Ifarisiyyen d imseřmaden n idlisen ugin x ccwar n AREBBI di daxeř nsen, minzi ugin ad zzayes ttwasɣeḍṣen.

31 Inna Netta: “Min zi ɣa cebbheɣ iwdan n jjiř-a? Wi di yarwesen? ^■  

32 Nitni amecnaw iḥenjiren i iqqimen di ssuq, ttřaɣan ijjen wenneɣni, qqaren: ‘Neccin newta awem di temja, kenniw war tecḍiḥem, u neccin nɣennej ijj n weẓri n wecḍan i kenniw, maca kenniw war trum ca.’ 33 Minzi yusa-dd Yuḥanna Amseɣḍaṣ, war ittett aɣrum, war isess binu uca tennam: ‘Aqa dayes cciṭan!’ ^■   34 Yusa-dd Mmis n bnadem ittett, isess, teqqarem: ‘Xzar, bnadem-a iřhef x macca d binu, aqa-t d ameddukkeř n ayt n ḍḍariba d imednab.’ 35 Aqa tiɣit tᵉttwasegged zi marra řexdayem nnes.”

36 Iɛarḍ i-t ijj n Ufarisi ḥima ad kis icc. Yudef ɣar taddart n Ufarisi uca iqqim ɣar ṭṭabřa. ^■   37 Tuɣa tzeddeɣ ict n temɣart tamednubt di tendint nni. Umi tessen aqa iqqim ɣar ṭṭabřa di taddart n Ufarisi, tusa-dd s ict n tziyyat n alabaster dayes zzect i wedhan, 38 uca umi dd-tbedd ɣar iḍaren nnes ɣar ḍeffar nnes, tru uca tebda tessuffa iḍaren nnes s imeṭṭawen uca tebda tessaẓaɣ i-ten s ucuwwaf n uzeǧif nnes, tessudem as iḍaren uca temseḥ i-ten s ict n zzect n wedhan. 39 Umi iẓra Ufarisi wenni i-t-i-dd-iɛarḍen man aya, ixarreṣ deg yixef nnek, inna: “Mařa wa d anabi s tidett, iři aqa issen min teɛna tanita u mammec tᵉttwassen nettat, minzi tenni t iḥadan, aqa-tt d tamednubt.”

40 Yarra-dd Yeccu, inna as: “A Cimɛun, ɣari ict n řḥajjet ad ac tt iniɣ.” Inna as: “Ini tt, a Amseřmad inu!” 41 Inna as Yeccu: “Ijj n bab n umarwas tuɣa ɣares tnayen ttursen as. Ijjen tuɣa itturs as xemsa-mya n dinar u wenneɣni xemsin. 42 Am war tuɣi ɣarsen min zi ɣa arren amarwas, isamḥ asen amarwas s tnayen idsen. Ini ayi, wi zzaysen t ɣa ixsen ktar?” 43 Yarra-dd Cimɛun, inna as: “Ittɣiř ayi wenni umi isamḥ ktar.” Inna as: “Cek tḥekmed s ṣṣaḥ.” 44 Xas uca inneqřeb Yeccu ɣar tmeṭṭut nni, inna i Cimɛun: “Ma tᵉttwařid tamɣart-a? Aqa udfeɣ ɣar taddart nnek. Aman i iḍaren inu war d ayi ten tewcid. Maca nettat tessird iḍaren inu s imeṭṭawen nnes uca tessiẓeɣ i-ten s ucuwwaf n uzeǧif nnes. 45 Cek war d ayi tessudmed, maca nettat, zeg wami dd-udfeɣ, war tbedd zeg usudem n iḍaren inu. 46 S zzect war tedhined ca azeǧif inu, maca nettat temseḥ iḍaren inu s zzect n wedhan. 47 S uyenni ad ac iniɣ: Aqa ittwaɣfar as aṭṭas n ddnub nnes, minzi texs aṭṭas. Wenni umi ittwaɣfar drus, ad ɣares yiři drus n tayri.” 48 Xenni inna as: “A tameṭṭut, aqa ttwaɣfaren ddnub nnem.” ^■  

49 Inni akides iqqimen ɣar ṭṭabřa bdan qqaren deg ixef nsen: “Min iɛna Wanita maḥend ad iɣfar uřa i ddnub.” ^■   50 Inna as Yeccu i tmeṭṭut nni: “Liman nnem aqa iwca am Tudart. Ruḥ di řehna.”